ၵူၼ်းၵျွၵ်ႉမႄး ဢၼ်ပၢႆႈၽေးသိုၵ်း မႃးႁွတ်ႈထိုင်ဝႆႉ တီႈဝဵင်းၸွၵ်ႉၸွၵ်ႇ ႁူဝ်ၵူၼ်း 500 ပၢႆၼၼ်ႉ လႆႈသိုပ်ႇပၢႆႈၽေးသိုၵ်း ထႅင်ႈ။
ဝၼ်းတီႈ 9/2/2022 ယၢမ်းႁူဝ်ၶမ်ႈ ၵူၼ်းမိူင်းၵျွၵ်ႉမႄး ၸိုင်ႈတႆးပွတ်းႁွင်ႇ ႁူဝ်ၵူၼ်း 560 ပၢႆ ဢၼ်ပၢႆႈၽေးသိုၵ်း မႃးသွၼ်ႈ ဝႆႉတီႈ ဢိူင်ႇၵဵင်းၶမ်း ဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်းၼၼ်ႉ ပၢင်တိုၵ်းပဵၼ်မႃးၸမ်ႁိမ်းဝၢၼ်ႈ ၵဵင်းၶမ်းထႅင်ႈလႄႈ ၶိုၼ်းဢွၼ်ၵၼ်သိုပ်ႇပၢႆႈထႅင်ႈ ၵႂႃႇယူႇသဝ်းဝႆႉတီႈဝတ်ႉၵျီႇတေႃး ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း ။
ၵူၼ်းမိူင်းဝဵင်းလွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်သိုပ်ႇပၢႆႈၵႂႃႇတၢင်းႁူဝ်ပူင်းၼႆႉ ပဵၼ်ၵူၼ်းဝၢၼ်ႈႁူးသူၼ်၊ ႁူးၵွတ်ႈ တၢင်းၵျွၵ်ႉမႄး ၊ ၶဝ်လုၵ်ႉတီႈလုမ်းၵေႃလိၵ်ႈလၢႆး ၵျွၵ်ႉမႄးသေ သိုပ်ႇပၢႆႈမႃးယူႇတီႈၵဵင်းၶမ်း ၊ ၵျွၵ်ႉၵူႈ ၼၼ်ႉ ၶႃႈၼႃႇ။ တင်းမူတ်းႁူဝ်ၵူၼ်းမီး 560 ပၢႆ။ တိုၵ်ႉႁဵတ်းသုမ်ႉယဝ်ႉသေ တိုၵ်ႉႁႃဢၢင်ႈတေႁဵတ်းတီႈၽုၵ်ႇ တီႈသွမ်ႈၵူၺ်း၊ မိူဝ်ႈ လဵဝ် ပၢင်တိုၵ်းသမ်ႉ လၢမ်းထိုင်မႃးထႅင်ႈ၊ လႆႈယိၼ်းသဵင်ၵွင်ႈ သဵင်မၢၵ်ႇ သိုၵ်းမၢၼ်ႈဢဝ်ၶိူင်ႈမိၼ် မႃးယိုဝ်း တူၵ်းႁိမ်း ၸမ်ၶဝ်လႄႈ ၶဝ်သိုပ်ႇပၢႆႈၵႂႃႇယူႇတီႈ ၵျွင်းၵျီႇတေႃး တီႈႁိမ်းဝၢၼ်ႈၽႃလၢႆး မိူင်းပဵင်းဢေႃႈ။ ပဵၼ်ၼႂ်းၸႄႈဝဵင်းႁူဝ်ပူင်းဢေႃႈ”- ဝႃႈၼႆ။
ဝၼ်းတီႈ 8-9-10/2/2022 ၼၼ်ႉ ၸုမ်းဢူၺ်းလီပွတ်းႁွင်ႇလႄႈ RCSS ပိုတ်းယိုဝ်းၵၼ်ၼႂ်းၸႄႈဝဵင်းလွၵ်ႉၸွၵ်ႇ ထႅင်ႈႁၢဝ်ႈႁႅင်း။ တီႈပၢင်တိုၵ်းၼၼ်ႉ သိုၵ်းမၢၼ်ႈသမ်ႉဢဝ်ၶိူင်ႈမိၼ်ယိုဝ်းသိုၵ်း မႃးယိုဝ်းလူင်းထႅင်ႈ။ ၵူၼ်းမိူင်းလွၵ်ႉၸွၵ်ႇတူၵ်းၸႂ်ၵူဝ်ႁႄ။ ၵူၼ်းဝၢၼ်ႈၸင်ႇသိုပ်ႇပၢႆႈၽေးသိုၵ်းထႅင်ႈ။
ယၢမ်းလဵဝ် ၵူၼ်းပၢႆႈၽေးသိုၵ်း ၸိူဝ်းမီးတီႈ ၵျွင်းၵျီႇတေႃး လူဝ်ႇတၢင်းၸွႆႈထႅမ် ၽႃႈႁူမ်ႇၶူဝ်းၼွၼ်း လႄႈ ၶွင်ၵိၼ်ယႅမ်ႉ မေႃႈဝၢၼ်ႇတူမ်ႈႁုင် ၸိူဝ်းၼႆႉ တင်းၼမ်။
ပၢင်တိုၵ်းၼႆႉ တႄႇပဵၼ်တၢင်းလႅၼ်ၶႅၼ်ႈ လွၵ်ႉၸွၵ်ႇ- ၼမ်ႉလၼ်ႈ တၢင်းဢိူင်ႇၼွင်ဝူဝ်း ၊ ယၢမ်းလဵဝ် လၢမ်းလူင်းမႃးတၢင်း ၵျွၵ်ႉၵူႇ ၊ ဢၢင်ႇတေႃး ၸမ်ထိုင်လႅၼ်ၶႅၼ်ႈႁူဝ်ပူင်းယဝ်ႉ ၵူၼ်းလွၵ်ႉၸွၵ်ႇ သိုပ်ႇလၢတ်ႈ ၼင်ႇၼႆ။
