သိုၵ်းမၢၼ်ႈ တီႉၺွပ်းၵူၼ်းပၢႆႈၽေးသိုၵ်းတီႈၵျွၵ်ႉမႄးၵႂႃႇၵေႃႉၼိုင်ႈ လႆႈၶိုၼ်းၼိုင်ႈသေ ထိုင်မိူင်းလႅင်းမႃး ႁွင်ႉဢဝ်ပေႃႈမႄႈၵူၼ်းႁိူၼ်းၵႂႃႇႁပ်ႉတူဝ်တၢႆတီႈ ႁူင်းယႃ။
မိူဝ်ႈဝၼ်းတီႈ 2/2/2022 ယၢမ်းၵၢင်ၶိုၼ်း ၵူၼ်းပၢႆႈၽေးသိုၵ်း ၵေႃႉၼိုင်ႈ ဢၼ်ပၢႆႈမႃးသွၼ်ႈဝႆႉတီႈ ပွၵ်ႉ 9 ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ထုၵ်ႇ သိုၵ်းမၢၼ်ႈ ၶဝ်ႈတီႉၺွပ်း တူဝ်မၼ်းၸၢႆးၵႂႃႇ ။
ၵူၼ်း ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်းသိုၵ်းမၢၼ်ႈၶဝ် မႃးတီႉၼၼ်ႉ ၾူၼ်း ၶွမ်ႊပိဝ်ႊတိူဝ်ႊ ၸိူဝ်းၼႆႉ ဢဝ်ၵႂႃႇမူတ်း။ ဢဝ်ၵႂႃႇ ပႃးသၢႆၶေႃးၶမ်းပိူၼ်ႈသဵၼ်ႈၼိုင်ႈ။ သိုၵ်းမၢၼ်ႈၼုင်ႈၶူဝ်းၵူၼ်းႁိူၼ်းသေ မႃးတီႉမၼ်းၵႂႃႇ ယၢမ်းၵၢင်ၶိုၼ်း။ ထိုင်ၵၢင်ၼႂ်မႃး ပီႈၼွင်ႉၵူၼ်းႁိူၼ်း ၵူၼ်းဝၢၼ်ႈလႆႈၵႂႃႇဢဝ်တူဝ်တၢႆမၼ်းတီႈႁူင်းယႃ။ ၸွမ်းတူဝ်တၢႆမၼ်းၸၢႆး မီးႁွႆးၸဵပ်းသႅပ်ႇၺႃး ပေႃႉထုပ်ႉ မၢၼ်ႉလွၵ်ႈဝႆႉတင်းၼမ်”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ၺႃးသိုၵ်းမၢၼ်ႈတီႉၺွပ်းႁွင်ႉၵႂႃႇပေႃႉထုပ်ႉထိုင်တီႈလႆႈလူႉတၢႆၵႂႃႇၼၼ်ႉ ၸိုဝ်ႈႁွင်ႉၸၢႆးထုၼ်းထုၼ်းဝိၼ်း ဢႃယု 44 ပီ ပဵၼ်ၵူၼ်းဝၢၼ်ႈ ဢိူင်ႇတေႃႉသၢင်ႇ။ ပၢင်တိုၵ်းပဵၼ်ႁိမ်းဝၢၼ်ႈၶဝ် ႁၢဝ်ႈႁႅင်းသေ လႆႈပၢႆႈၽေးသိုၵ်းမႃးသွၼ်ႈဝႆႉတီႈၼႂ်းဝဵင်း။
“ၼႂ်းဝဵင်းၵျွၵ်ႉမႄးၼႆႉ သိုၵ်းမၢၼ်ႈၵႆႉၶဝ်ႈတီႉၺွပ်းၵူၼ်းမိူင်းမႃးၶိူဝ်းယႂ်း ႁၢၼ်ႉတေႃႇထိုင်ယၢမ်းလဵဝ်၊ တၢင်းဝၢၼ်ႈၵုင်းသႃႇ ၼၼ်ႉၵေႃႈ ၶဝ်ၵႂႃႇတီႉၺွပ်း ပဵၼ်ၽူႈၸၢႆးၵေႃႉၼိုင်ႈ ပဵၼ်ၵူၼ်းဢႃႇယုယႂ်ႇ။ ၼၼ်ႉၵေႃႈ လုၵ်ႈယိင်းမၼ်း တိုၵ်ႉတေႁဵတ်းပွႆးပၢင်ၶႅၵ်ႇ ယူႇ ထိုင်တီႈပၢင်ၶႅၵ်ႇပေႃးၵၢတ်ႈပႅတ်ႈၶႃႈဢေႃႈ ”- ၵူၼ်း ၵျွၵ်ႉမႄး သိုပ်ႇလၢတ်ႈၼႄၼင်ႇၼႆ။
တႄႇႁၢင်လိူၼ်ၵျႅၼ်ႊၼိဝ်ႊရီႊ မႃးၼႆႉ ၵူၼ်းၵျွၵ်ႉမႄး ၺႃးသိုၵ်းမၢၼ်ႈ တီႉၺွပ်းၵႂႃႇ ဢမ်ႇယွမ်း 4 ၵေႃႉယဝ်ႉ ပဵၼ်ၵူၼ်းမိူင်းၽၵ်းၵႃႇလွၼ်ႉလွၼ်ႉ။ ၺႃးသိုၵ်းမၢၼ်ႈမၢပ်ႇၼႄးဝႃႈပဵၼ်ၸုမ်းၵမ်ႉထႅမ်ၸုမ်းၼၼ်ႉၸုမ်းၼႆႉ ၼႆသေတီႉၺွပ်းၵူၼ်းၵူၺ်းဢမ်ႇၵႃး ဢဝ်ငိုၼ်းၶမ်းၵူၼ်းမိူင်းၵႂႃႇပႃး – ၵူၼ်းပိုၼ်ႉတီႈလၢတ်ႈၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 23/1/2022 ၼၼ်ႉ သိုၵ်းမၢၼ်ႈ ၶဝ်ႈတီႉၺွပ်းၵူၼ်းမိူင်းၵျွၵ်ႉမႄး တီႈပွၵ်ႉ 7 ၽူႈၸၢႆး ၵႂႃႇၵေႃႉၼိုင်ႈသေ ထိုင်မႃးဝၼ်းတီႈ 24 ၶိုၼ်းပွႆႇတူဝ်မႃးၶိုၼ်း။
ၼွၵ်ႈလိူဝ်ၼၼ်ႉ ၼႂ်းဝဵင်းၵျွၵ်ႉမႄး ၸွမ်းသဵၼ်ႈတႃႈသၢႆတၢင်း ၸိူဝ်းၼႆႉ ထုၵ်ႇသိုၵ်းပလိၵ်ႈမၢၼ်ႈ ပႂ်ႉၵူတ်ႇထတ်း ၵူၼ်းၵႂႃႇမႃးၸွမ်းတၢင်း ။ ၾူၼ်း မိုဝ်းထိုဝ်လႄႈ ထူင်ထွင်းၸိူဝ်းၼႆႉ ၺႃးသိုၵ်းမၢၼ်ႈ ၸူၵ်းသွၵ်ႈ၊ မၢင်တီႈ ၶဝ်ႈသွၵ်ႈထိုင်ၼႂ်းႁိူၼ်းယေးၵူၼ်းဝၢၼ်ႈ – ၵူၼ်းၵျွၵ်ႉမႄး လၢတ်ႈ ။
