ၽူႈလၵ်ႉၵူၼ်းၸူၼ် လိူင်ႇၼမ်ႁႅင်း ၼႂ်းဝဵင်းတႃႈၶီႈလဵၵ်း ၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ လႆႈၾၢင်ႉၵိၼ်ၾၢင်ႉၼွၼ်း ဢမ်ႇမီးလွင်ႈဢုၼ်ႇၸႂ်။
ၵူၼ်း တႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ၽူႈလၵ်ႉၵူၼ်းၸူၼ်ၼႆႉ ၼမ်ၼႃႇယဝ်ႉၶႃႈ တီႈတႃႈၶီႈလဵၵ်းၼႆႉ။ ၵူႈပီတႄႉ ဢမ်ႇႁၢင်ႈႁၢႆႉ ပဵၼ် တၢၼ်ႇၼႆႉ။ ၽူႈလၵ်ႉၼမ်တၢၼ်ႇၼႆႉ မႆႈၸႂ်ၶႃႈဢေႃႈ ၽွင်းၵၢင်ၶမ်ႈ/ ၶိုၼ်းၵေႃႈ လႆႈၾၢင်ႉသေ ၼွၼ်း။ ၸဵမ်ၵၢင်ဝၼ်းလႄႈၵၢင်ၶိုၼ်း ၽၵ်းတူဝၢင်းႁိူၼ်းၼႆႉ ပိုတ်ႇဝႆႉတိုၼ်းဢမ်ႇလႆႈယဝ်ႉၶႃႈ။ ၼွၼ်းၶိုၼ်းၵေႃႈတိုၼ်းဢမ်ႇလိုမ်းၸႂ်သေလပ်းလႆႈၼင်ႇမိူဝ်ႈၵွၼ်ႇယဝ်ႉၶႃႈ”- ဝႃႈၼႆ။
တီႈဝဵင်းတႃႈၶီႈလဵၵ်းၼႆႉ ၵႆႉမီးၽူႈလၵ်ႉၸၵ်ႉၶူတ်ႈ ၶီႇရူတ်ႉၶိူင်ႈမႃးသွင်ၵေႃႉသွၼ်ႉၵၼ်။ ပေႃးပဵၼ်တီႈၶၢတ်ႇသၢႆတႃၵူၼ်းဢိတ်းဢိတ်းၵူၺ်းၵေႃႈ ႁၼ်ၽႂ်မႃးၵေႃႈ ၸၵ်ႉၶုတ်ႈၶူဝ်းၶွင်။ ၵူၼ်းၶီႇရူတ်ႉၶိူင်ႈမႃးၵေႃႈ ၸၵ်ႉၶုတ်ႈထူင်၊ ၶူဝ်းၶွင်ၵႃႈၶၼ်ယႂ်ႇၸိူဝ်းၼႆႉ မၢင်တီႈႁဵတ်းႁႂ်ႈ ရူတ်ႉၶိူင်ႈလူမ်ႉၵၢင်တၢင်းလူးၵွၼ်ႇ ၵူၼ်းတႃႈၶီႈလဵၵ်းလၢတ်ႈထႅင်ႈၼင်ႇၼႆ။
ၸႄႈဝဵင်းတႃႈၶီႈလဵၵ်းၼႆႉ ဝၢႆးလင်သိုၵ်းယိုတ်းမိူင်းယဝ်ႉ ၵူၼ်းတၢင်ႇတီႈသီႇလႅၼ် ၵမ်ႈၼမ်ပဵၼ်ၸၢဝ်းမၢၼ်ႈ၊ တၢင်ႇၸၢဝ်း ၶိူဝ်း ၵေႃႈပႃး၊ ၽူႈလၵ်ႉၵူၼ်းၸူၼ် ၶဝ်ႈၸူၼ်ၶူဝ်းၶွင်ထိုင်ၼႂ်းႁိူၼ်းယေး၊ ပလိၵ်ႈ ဢမ်ႇဢဝ်လိူင်ႈ ဢမ်ႇလမ်းတီႉၺွပ်း ပၼ်တူတ်ႈတၢမ်ႇသင် ၊ ဢမ်ႇဢဝ်ပုၼ်ႈၽွၼ်းၸွႆႈၵႅတ်ႇၶႄပၼ်သင် ၵူၼ်းတႃႈၶီႈလဵၵ်းလၢတ်ႈၼင်ႇၼႆ။
