ပလိၵ်ႈမၢၼ်ႈတင်း သိုၵ်းမၢၼ်ႈ ႁူမ်ႈၵၼ် ပႂ်ႉၵူတ်ႇထတ်းၵူၼ်းၵႂႃႇမႃး ၼိူဝ်သဵၼ်ႈတၢင်းလူင် ၼႂ်းၵႄႈၼမ်ႉတူႈ – လႃႈသဵဝ်ႈ ႁၢဝ်ႈႁႅင်း ၵူၼ်းမိူင်း ၵႂႃႇမႃး ယၢပ်ႇၽိုတ်ႇၶၢၼ်ၸႂ်။

ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းမိူင်းမႃးၼႆႉ တီႈၵဵတ်ႉလၢၼ်ႇတၢင်းၶဝ်ႈ/ ဢွၵ်ႇဝဵင်းလႃႈသဵဝ်ႈ၊ တီႈၶူဝ်ဢီႇၼၢႆးလႄႈ တီႈတၢင်းၽႄမိူင်းယဵၼ် ၼိူဝ်သဵၼ်ႈတၢင်းလူင် ၼမ်ႉတူႈ – လႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ယူႇတီႈပလိၵ်ႈမၢၼ်ႈတင်း သိုၵ်းမၢၼ်ႈ ပႂ်ႉၵူတ်ႇထတ်းၸႅတ်ႈထၢမ် ၵူၼ်း မိူင်းၵႂႃႇမႃး ႁၢဝ်ႈႁႅင်းသေ မၢင်ပွၵ်ႈ ၵူတ်ႇထတ်းပႃးဝႂ်ႁေႃႈရူတ်ႉ သင်ဢမ်ႇမီး ယွၼ်းငိုၼ်းထိုင် 1 သႅၼ်ပျႃးၵေႃႈမီး။

ၵူၼ်းၵႂႃႇမႃး တၢင်းသၢႆၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်ၵူတ်ႇထတ်းႁႅင်းတႄႉ ပဵၼ် 3 တီႈၼႆႉ။ မၢင်ပွၵ်ႈပေႃးမီးသၢႆသိုၵ်းၶဝ်ယူႇ ၼႂ်း ၵႄႈၸိူဝ်းၼၼ်ႉတႄႉ တေၵူတ်ႇထတ်းပႃးလိူဝ်ထႅင်ႈတီႈၼိုင်ႈ။ ဢၼ်ၶဝ်ၵူတ်ႇထတ်းတႄႉ မၢင်ပွၵ်ႈတေၵူတ်ႇထတ်းပႃးၵႃးပႃးၵူၼ်း ၽႅဝ်ၼႂ်းၵႃး၊ တႂ်ႈရူတ်ႉၶိူင်ႈ ၸိူဝ်းၼႆႉ။ မၢင်ပွၵ်ႈ  ထၢမ်ၵူၼ်းၵႂႃႇမႃးၸိူင်ႉၼၼ်ၵူၺ်း။ ဝၢႆးသေ ၶဝ်ယိုတ်း မိူင်းၼႆႉ ၵူတ်ႇထတ်းမႃးႁႅင်းၶႃႈဢေႃႈ”- ဝႃႈၼႆ။

 ၵူၼ်းၸိူဝ်းယူႇတၢင်းပွတ်းတွၼ်ႈၼၼ်ႉ ယၢပ်ႇၽိုတ်ႇလွင်ႈၵႂႃႇမႃး ၵိၼ်းၸႂ် ၸိူဝ်းဢမ်ႇမီးဝႂ်ႁေႃႈရူတ်ႉ လႆႈပၼ်ငိုၼ်းထိုင် 1 သႅၼ်ပျႃး ၵေႃႈမီး။

ၵူၼ်းပိုၼ်ႉတီႈ သၢႆၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ယၢပ်ႇၽိုတ်ႇၶႃႈဢေႃႈ ၶဝ်ၵူတ်ႇထတ်းပႃး ဝႂ်ႁေႃႈရူတ်ႉ ။ ႁဝ်းၶႃႈၺႃးၼႆႉ တေမီး 3-4 ပွၵ်ႈၼႆႉၶႃႈ။ 1 ပွၵ်ႈလႆႈပၼ်ၶဝ် 3 မိုၼ်ႇ၊ 4 မိုၼ်ႇ ထိုင် 7 မိုၼ်ႇ”  ဝႃႈၼႆ။

  သင်ဝႃႈ ၵူၼ်းတၢင်းပွတ်းတွၼ်ႈၼၼ်ႉ ဢမ်ႇယူႇလီ တေမႃးႁႃမေႃ တႃႇယူတ်းယႃတူဝ် ၼႂ်းဝဵင်းလႃႈသဵဝ်ႈ  မၢင်ၵေႃႉ ထိုင်တီႈ ဢမ်ႇႁတ်းမႃး  ၵေႃႈမီး ယွၼ်ႉဢမ်ႇမီးဝႂ်ႁေႃႈရူတ်ႉ ။  

“မၢင်ပွၵ်ႈမႃးၼႆႉ ၵူၼ်းပဵၼ်မၢင်ၵေႃႉ ဢမ်ႇယူႇလီ တေမႃးႁႃမေႃ ယူတ်းယႃ တီႈၼႂ်းဝဵင်းလႃႈသဵဝ်ႈၼႆ ဢမ်ႇၸၢင်ႈမႃးၵေႃႈမီး ယွၼ်ႉဢမ်ႇမီးဝႂ် ႁေႃႈ ရူတ်ႉ။ ပႂ်ႉၵႃးပရႁိတၵႂႃႇႁပ်ႉမႃးၵူၺ်း သင်ဝႃႈ ၵႃးၶဝ် ဢမ်ႇၵႂႃႇႁပ်ႉၵေႃႈ ဢမ်ႇလႆႈမႃး။ ယွၼ်ႉဢမ်ႇမီးဝႂ်ႁေႃႈရူတ်ႉ  ”- ၵူၼ်းပိုၼ်ႉတီႈ သၢႆ ၼၼ်ႉ သိုပ်ႇလၢတ်ၼႄၼင်ႇၼႆ။

ၵူၼ်းပိုၼ်ႉတီႈ တၢင်းပွတ်းတွၼ်ႈၼၼ်ႉ မၢင်ၵေႃႉ ၸိူဝ်းဢမ်ႇမီးဝႂ်ႁေႃႈရူတ်ႉ ပေႃးတေၶဝ်ႈဝဵင်းၸိုင် ထိုင်တီႈပေႃးလႆႈႁွင်ႉၵူၼ်းႁေႃႈလႅင်းၵႃး မႃး ႁပ်ႉႁေႃႈၶၢမ်ႈၵဵတ်ႉလၢၼ်ႇ ၵေႃႈမီး။