ပၢင်ပွႆးတၢင်ႇထီးထၢတ်ႈ ၵျွင်းၽြႃးလူင် (ဝတ်ႉၽၸဝ်ႈလူင်/ ၽြႃးရၶႅင်ႇ/ ၽြႃးမႁႃမုၼိ) ၵၢင်ဝဵင်းၵဵင်းတုင်တေၸတ်းႁဵတ်းၼႂ်းၵၢင်လိူၼ်ၼႆႉ  မီးၶၢဝ်ႇဝႃႈ ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇတေမႃးၶဝ်ႈႁူမ်ႈၼႆလႄႈ ၵူၼ်းမိူင်းမႆႈၸႂ်လွင်ႈႁူမ်ႇလူမ်ႈၸဝ်ႈၵဝ်ႇ။

ပၢင်ပွႆးၼႆႉ တေၸတ်းၼႂ်း ဝၼ်းတီႈ 15/2/2022 ၼႆႉ။ တေႃႇထိုင်ယၢမ်းလဵဝ်တႄႉ ၵူၼ်းမိူင်းၵႂႃႇမႃး တိုၵ်ႉငၢႆႈယူႇ သိုၵ်းမၢၼ်ႈပႆႇပေႃးၵူတ်ႇထတ်းႁၢဝ်ႈႁႅင်းသေတႃႉ ပေႃးဝၼ်းပွႆးၸမ်မႃး ၸၢင်ႈမီးလွင်ႈၵူတ်ႇထတ်းလႄႈၸၢင်ႈမီးလွင်ႈလီမႆႈၸႂ်ၼႂ်းလွင်ႈႁူမ်ႇလူမ်ႈ၊ ၵူၼ်းမိူင်းၵဵင်းတုင်ဢွၼ်ၵၼ်မႆႈၸႂ်။

ၵူၼ်း  ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းဝႃႈ မိၼ်းဢွင်ႇလၢႆႇ ဢမ်ႇၼၼ် ၵႅမ်မၼ်း ၼႂ်းၸၼ်ႉသုင်ၸိူဝ်းၼႆႉတေမႃးၼႆ။ ပေႃးပွႆႇၶၢဝ်ႇဝႃႈ တေမႃးၸိူင်ႉၼႆတႄႉ ၵူၼ်းမိူင်း တေဢမ်ႇမီးလွင်ႈလွတ်ႈလႅဝ်း လႄႈတေဢမ်ႇမီးလွင်ႈႁူမ်ႇလူမ်ႈ ယဝ်ႉၶႃႈ။ သိုၵ်းတေၵူတ်ႇထတ်း ၵူၼ်းၵႂႃႇမႃး ၸွမ်းၼႂ်းဝဵင်း တေပႂ်ႉဢဝ်ႁူမ်ႇလူမ်ႈ ။ တေၵူတ်ႇသွၵ်ႈထဵတ်ႈထၢမ်ႁၢဝ်ႈႁႅင်း။ ဢမ်ႇလီ ဢမ်ႇႁၢႆႉ ၵူဝ်မၢၵ်ႇတႅၵ်ႇဝႃႇ သင်ဝႃႇၸိူဝ်းၼႆႉၵူၺ်းယဝ်ႉၶႃႈဢေႃႈ။  ”- ဝႃႈၼႆ။

ပွႆး 100 ပီတဵမ်လႄႈ ပွႆးတၢင်ႇထီးထၢတ်ႈ ဝတ်ႉၽြႃးလူင် ၵၢင်ဝဵင်းၵဵင်းတုင်ၼႆႉဢၢၼ်ၸတ်းႁဵတ်းမိူဝ်ႈႁၢင်ပီ 2021 ။ ယွၼ်ႉတၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁၢဝ်ႈႁႅင်းၵေႃႈပိူင်ၼိုင်ႈ၊ ငဝ်းလၢႆးၵၢၼ်မိူင်းသုၵ်ႉယုင်ႈၵေႃႈပိူင်ၼိုင်ႈလႄႈ ဢမ်ႇပဵၼ် ၸတ်းႁဵတ်းမႃး။

ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈထႅင်ႈဝႃႈ – “  ပွႆး 100 ပီတဵမ်လႄႈတၢင်ႇ ထီးၼႆႉ လႅပ်ႈတေၸတ်းႁဵတ်းယႂ်ႇလူင်ယူႇၶႃႈဢေႃႈ”- ဝႃႈၼႆ။

သိုပ်ႇၶၢဝ်ႇတႃႈၶီႈလဵၵ်း TNA တႄႉ ဢွၵ်ႇဝႆႉဝႃႈ တႃႇမၢႆတွင်း ပွႆး 100 ပီတဵမ်လႄႈ ပွႆးတၢင်ႇထီးထၢတ်ႈ တီႈဝတ်ႉၽြႃးလူင်ၵၢင်ဝဵင်းၵဵင်းတုင်ၼႆႉ မိၼ်းဢွင်ႇလၢႆႇ တေမႃးၶဝ်ႈႁူမ်ႈတၢင်ႇထီးၸွမ်း တေမႃးႁွတ်ႈထိုင်ၵဵင်းတုင် ၼႂ်းဝၼ်းတီႈ 13 – 14။ ပေႃးထိုင်ဝၼ်းတီႈ 15 တွၼ်ႈ ၵၢင်ၼႂ် တေၶဝ်ႈႁူမ်ႈတၢင်ႇထီး တီႈဝတ်ႉၽြႃးလူင် ၵၢင်ဝဵင်းၵဵင်းတုင်- ဝႃႈၼႆဝႆႉ။

တီႈဝဵင်းၵဵင်းတုင်ၼႆႉ ယၢမ်းလဵဝ် ၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ ဢမ်ႇၼမ်သေတႃႉ ယၢင်းတိုၵ်ႉမီးယူႇၵူႈဝၼ်း။ ၵူၼ်းၸပ်းတၢင်းပဵၼ်ဢၼ်ယူႇတီႈႁိူၼ်းသေယူတ်းယႃတူဝ်ဝႆႉၵေႃႈယင်းတိုၵ်ႉမီးယူႇ ၵူၼ်းၵဵင်းတုင်လၢတ်ႈၼင်ႇၼႆ။