ၼႂ်းဝၼ်းသိုၵ်းမၢၼ်ႈ ႁိမ်ၸိင်းယိုတ်းဢႃႇၼႃႇဝၢၼ်ႈမိူင်းတဵမ်ပီၼၼ်ႉ မၢၵ်ႇတႅၵ်ႇလၢႆလၢႆတီႈၼႂ်းၸႄႈဝဵင်းတူၼ်ႈတီး ၊ သိုၵ်းမၢၼ်ႈပႂ်ႉၵူတ်ႇထတ်းၵူၼ်းမိူင်းၵႂႃႇမႃး ဢၼ်တီႉၺွပ်းၵႂႃႇၵေႃႈမီးၼမ်။
မိူဝ်ႈဝႃး ဝၼ်းတီႈ 1/2/2022 ယၢမ်းႁူဝ်ၶမ်ႈ မၢၵ်ႇတႅၵ်ႇ ၼႂ်းဝဵင်းတူၼ်ႈတီး လၢႆတီႈလၢႆၵမ်း။ ဝၢႆးၼၼ်ႉ သိုၵ်းမၢၼ်ႈ ထႅမ်ႁႅင်းၶဝ်ႈဝဵင်း ပႂ်ႉတီႈတၢင်းၶွႆႈ တင်းၽႄ ၵူႈတီႈသေ ႁႄႉၵူတ်ႇထတ်းၵူၼ်းၵႂႃႇမႃး။ ပိူင်လူင်ၵူတ်ႇထတ်းၵူၼ်းၼုမ်ႇ။ ၵူတ်ႇထတ်းမိုဝ်းထိုဝ်။ ၵူၼ်းမိူင်း သုၵ်ႉၸႂ်၊ ၵႂႃႇမႃးဢမ်ႇလွတ်ႈလႅဝ်း။
ၵူၼ်းၼုမ်ႇ ဢၼ်ၺႃးၵူတ်ႇထတ်းၾူၼ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ႁႄႉၵိုတ်းသေ ၵူတ်ႇၸႅတ်ႈၾူၼ်း/ မိုဝ်းထိုဝ်။ ပွင်ႉလႃႇႁိုတ်းႁၢတ်ႇ လွၵ်ႇငိုတ်ႈပႃး။ ၼႂ်းၾူၼ်း ၸိူဝ်းၼႆႉၵေႃႈ သွၵ်ႈတူၺ်း ပိုတ်ႇတူၺ်းမူတ်း။ ၶိူင်ႈမိုဝ်းတႃႇၶဝ်တေၵူတ်ႇထတ်းတူၺ်း ၼႂ်း ၾူၼ်းၼၼ်ႉၵေႃႈ ၶဝ်ႁၢင်ႈႁႅၼ်းမႃးတဵမ်ထူၼ်ႈ ။ ယွၼ်ႉဝႃႈ ၼႂ်းၾူၼ်းၶႃႈ ဢမ်ႇမီးလွင်ႈၽိတ်းမၢႆမီႈသင်လႄႈ ၾၢႆႇသိုၵ်းမၢၼ်ႈ ၸင်ႇပွႆႇတူဝ် ၶိုၼ်း”- ဝႃႈၼႆ။
လွင်ႈသိုၵ်းမၢၼ်ႈ ႁႄႉၵူၼ်းမိူင်းသေ ၵူတ်ႇထတ်းၼႂ်းၾူၼ်းၼႆႉ ဢမ်ႇၵႃးတီႈတူၼ်းတီးၵူၺ်း မိူဝ်ႈဝူင်ႈပူၼ်ႉမႃးၼၼ်ႉ လၢႆၸႄႈဝဵင်းၵေႃႈ ထုၵ်ႇသိုၵ်း မၢၼ်ႈၵူတ်ႇထတ်းၸႅတ်ႈထၢမ်မိူၼ်ၵၼ်။ မိူၼ်ၸိူင်ႉ ၸွမ်းတၢင်းၶဝ်ႈ/ ဢွၵ်ႇဝဵင်း၊ ၸွမ်းၼႂ်းၵၢင်ဝဵင်း ၸိူဝ်းၼႆႉ။
မၢင်တီႈ သိုၵ်းမၢၼ်ႈ ဢဝ်ၶေႃႈဢၢင်ႈဝႃႈ သွၵ်ႈ VPN ၼႂ်းၾူၼ်းၼႆသေ သင်ဝႃႈ မီးၶေႃႈၽိတ်းမၢႆမီႈလႄႈသင်၊ မီး App VPN လႄႈသင် ၸိူဝ်းၼႆႉ တီႉၺွပ်း ၊ မႂ်ငိုၼ်း ၸိူဝ်းၼႆႉ ၵေႃႈမီး။
သိုၵ်းမၢၼ်ႈ ပႂ်ႉၵူတ်ႇထတ်းၾူၼ်း ႁဵတ်းၶဵၼ်တေႃႇၵူၼ်းမိူင်းၼႃႇလႄႈ ၵူၼ်းဝဵင်းတူၼ်ႈတီး လႃႈသဵဝ်ႈ ဢိၵ်ႇလၢႆလၢႆဝဵင်း လၵ်ႉလွမ် ပၼ်ၾၢင်ႉၵၼ်ဝႃႈ ဢမ်ႇထုၵ်ႇလီဢွၵ်ႇႁိူၼ်း ယၢမ်းၵၢင်ၶမ်ႈၵၢင်ၶိုၼ်း။ သင်ဝႃႈ မီးၵၢၼ်လမ်ႇလွင်ႈလႄႈလႆႈဢွၵ်ႇၵေႃႈ ထုၵ်ႇလႆႈ ၽဵဝ်ႈလၢင်ႉၶေႃႈမုၼ်းၼႂ်းမိုဝ်းထိုဝ်လီလီ။ ႁၢင်ႈလႄႈ သဵင် ဢၼ်ၸၢင်ႈပဵၼ်ၽေးၼၼ်ႉ ထုၵ်ႇၶၢႆႉဢွၵ်ႇမူတ်းမူတ်း ဝႃႈၼႆ။
