မီးၶၢဝ်ႇၽၢင်း/ ပွမ် လိုဝ်းၵၼ်ဝႃႈ ၸုမ်းဢူၺ်းလီပွတ်းႁွင်ႇ ႁွတ်ႈထိုင်တၢင်းဝဵင်းပၢင်လူင် ၼႆလႄႈၵူၼ်းပွတ်းဝၢၼ်ႈ ၼိူဝ်လွႆ ၵူဝ်ပဵၼ်ပၢင်တိုၵ်း၊ ဢွၼ်ၵၼ်ပၢႆႈၶဝ်ႈဝဵင်း ။
ႁၢင်လိူၼ်ၵျႅၼ်ႊၼိဝ်ႊရီႊ 2022 ၼႆႉ မီးၶၢဝ်ႇၽၢင်း/ ပွမ်(တု) လိုဝ်းၵၼ်ၼိူဝ် Social Media ဝႃႈ မီးၸုမ်းဢူၺ်းလီပွတ်းႁွင်ႇ ႁွတ်ႈထိုင် တၢင်းဢိူင်ႇသၼဵၼ်း ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆး ပွတ်းၸၢၼ်းၼႆလႄႈ ၵူၼ်းမိူင်း ပွတ်းတွၼ်ႈၼၼ်ႉ ဢွၼ်ၵၼ် တူၵ်းၸႂ်တိုၼ်ႇသၢၼ်ႈ ပၢႆႈၶဝ်ႈဝဵင်းၵမ်ႈၽွင်ႈ။
ၵူၼ်းပိုၼ်ႉတီႈ ၼႂ်းဢိူင်ႇသၼဵၼ်း လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ဢွၵ်ႇၶၢဝ်ႇဝႃႈ မီးၸုမ်းဢူၺ်းလီပွတ်းႁွင်ႇ ႁွတ်ႈထိုင်မႃးပွတ်းသၼဵၼ်း ၼႆၼၼ်ႉ ပဵၼ်ၶၢဝ်ႇပွမ်/ ၶၢဝ်ႇၽၢင်းၵူၺ်းၶႃႈ။ ဢမ်ႇၸႂ်ႈလွင်ႈတႄႉမၼ်း။ ယွၼ်ႉၶၢဝ်ႇပွမ်ၼၼ်ႉသေ ႁဵတ်းႁႂ်ႈၵူၼ်းမိူင်းတိုၼ်ႇသၢၼ်ႈတူၵ်းၸႂ်ၵူဝ်လႄႈပၢႆႈ ဢေႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ ၵူၼ်းတၢင်းဢိူင်ႇသၼဵၼ်း လႆႈႁပ်ႉငိၼ်းၶၢဝ်ႇပွမ်ဝႃႈ မီးၵႃးသိုၵ်းမၢၼ်ႈတင်း ၵႃးသိုၵ်းဝႃႉ UWSA ၽႅဝ်ႁွတ်ႈထိုင်ဝႆႉ တီႈဝဵင်း ပၢင်လူင်ယဝ်ႉလႄႈ ဢွၼ်ၵၼ်တိုၼ်ႇသၢၼ်ႈတူၵ်းၸႂ်ၵူဝ်ၵၼ်သေ ပၢႆႈၶဝ်ႈဝဵင်း။ ၵွပ်ႈၼႆ ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်း။
“ပၢင်တိုၵ်းတႄႉ ဢမ်ႇပဵၼ်ၶႃႈ ပဵၼ်ၶၢဝ်ႇပွမ်/ ၶၢဝ်ႇၽၢင်း လိုဝ်းၵၼ်ဢွၵ်ႇမႃးၵူၺ်း။ ၶဝ်လႆႈငိၼ်းဝႃႈ ၵႃးသိုၵ်းဝႃႉ၊ ၵႃးသိုၵ်းမၢၼ်ႈ ႁွတ်ႈထိုင်မႃး ပၢင်လူင် ၼႆဝႃႇ။ ယင်းဢမ်ႇမီးၵႃးလမ်းလႂ် မႃးႁွတ်ႈထိုင်တီႈၼႂ်းဢိူင်ႇသၼဵၼ်းႁဝ်းၶႃႈၼႆႉ။ ၵွၼ်ႇၼႃႇဝၼ်းတီႈ 1 ၼႆႉ မွၵ်ႈသွင်ဝၼ်း ၵႃးသိုၵ်းမၢၼ်ႈတႄႉ ပၼ်ႇလဵပ်ႈၵႂႃႇတၢင်းဝၢၼ်ႈ ပၢင်မူင်ႈၵူၺ်းဢေႃႈမီး။”- ၵူၼ်းပိုၼ်ႉတီႈ ၼႂ်းဢိူင်ႇသၼဵၼ်း လၢတ်ႈသိုပ်ႇလၢတ်ႈထႅင်ႈၼင်ႇၼႆ။
ၵဵဝ်ႇလူၺ်ႈလွင်ႈၶၢဝ်ႇပွမ်/ ၽၢင်းၼႆႉသေ ၵူၼ်းပိုၼ်ႉတီႈတၢင်းပွတ်းဢိူင်ႇသၼဵၼ်း ၵမ်ႈၽွင်ႈ ဢွၼ်ၵၼ်ပၢႆႈမႃးသွၼ်ႈဝႆႉ ၸွမ်းႁိူၼ်းယေးပီႈ ၼွင်ႉ ၽႂ်မၼ်း ၼႂ်းဝဵင်းပၢင်လူင် ။
ၼႂ်ၼႆႉၸဵမ်ၸဝ်ႉၵေႃႈ ၽႂ်ၵေႃႉတႄႇၽူႇၶၢဝ်ႇဢမ်ႇႁူႉ – ဝႃႈသိုၵ်းဝႃႉ ၶဝ်ႈမႃးၼႂ်းဝဵင်းပၢင်လူင်၊ လၢတ်ႈၵႂၢမ်းတႆးတေႃႇၵေႃႈဢမ်ႇပွင်ႇ- ၼႆလႄႈ ယင်းႁဵတ်းႁႂ်ႈၵူၼ်းပၢင်လူင် တူၵ်းၸႂ်တိုၼ်ႇၵၼ်ယူႇၵမ်းၼိုင်ႈ။ ၵူၺ်းၵႃႈ ၵူၼ်းယူႇၵၢင်ဝဵင်းတႄႉဝႃႈ ၼွၵ်ႈလိူဝ်ၵႃးသိုၵ်းမၢၼ်ႈ ဢမ်ႇႁၼ်သိုၵ်းဝႃႉ သိုၵ်းတႆးသင်ဝႃႈၼႆ။
 လိုဝ်းၵၼ်ၼိူဝ် Social Media ဝႃႈ မီးၸုမ်းဢူၺ်းလီပွတ်းႁွင်ႇ ႁွတ်ႈထိုင် တၢင်းဢိူင်ႇသၼဵၼ်း ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆး ပွတ်းၸၢၼ်းၼႆလႄႈ ၵူၼ်းမိူင်း ပွတ်းတွၼ်ႈၼၼ်ႉ ဢွၼ်ၵၼ် တူၵ်းၸႂ်တိုၼ်ႇသၢၼ်ႈ ပၢႆႈၶဝ်ႈဝဵင်းၵမ်ႈၽွင်ႈ။){kind=link}