မိူဝ်ႈၼႆႉ ဝၼ်းတီႈ 1/2/2022 ယၢမ်းၵၢင်ၼႂ် မွၵ်ႈ 9:45 မူင်း သဵင်ၵွင်ႈတႅၵ်ႇ 4-5 ၵမ်း ၼႂ်းၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ ၵူၼ်းမိူင်းတူၵ်းၸႂ် ၵူၼ်းၶၢႆၶူဝ်းၼႅတ်ႈသိမ်းၶူဝ်း ဢိုတ်းႁၢၼ်ႉ ပွၵ်ႈႁိူၼ်း ။
ၵူၼ်းၶၢႆၶူဝ်းၼႂ်းၵၢတ်ႇ ၼႂ်းဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ ၵူၼ်းၶၢႆၶူဝ်းတူၵ်းၸႂ် ၼႅတ်ႈဢွၼ်ၵၼ်ပိၵ်ႉႁၢၼ်ႉပွၵ်ႈႁိူၼ်းဢေႃႈ။ ဢၼ်ဢမ်ႇပိၵ်ႉႁၢၼ်ႉသေသိုပ်ႇပိုတ်ႇၶၢႆဝႆႉတႄႉ မီး ႁၢၼ်ႉ သွင်ႁၢၼ်ႉၵူၺ်းၶႃႈ။ တၢင်းၼွၵ်ႈၵၢတ်ႇတႄႉ ပိုတ်ႇၵမ်ႈၽွင်ႈ ပိၵ်ႉၵမ်ႈၽွင်ႈ ”- ဝႃႈၼႆ။
မိူဝ်ႈၼႆႉသမ်ႉပဵၼ်ဝၼ်းပီမႂ်ႇၶႄႇလႄႈ သဵင်တႅၵ်ႇတီႈဝဵင်းမူႇၸေႊၼၼ်ႉပဵၼ်သဵင်မူၵ်ႇၾႆးႁိုဝ် သဵင်ၵွင်ႈ ဢမ်ႇႁူႉတႅတ်ႈတေႃး။ ၵူၺ်းၵႃႈ ၵူၼ်းမိူင်းတႄႉ တူၵ်းၸႂ်သေ ၼႅတ်ႈပိၵ်ႉႁၢၼ်ႉ ဝႃႈၼႆ။
လိူဝ်ၼၼ်ႉ ယၢမ်းဝၢႆးဝၼ်းသမ်ႉ တီႈႁိမ်းႁေႃၼႃႇလီႇၵၢင်ဝဵင်းမူႇၸေႊ ၊ တီႈၸဵင်ႇတၢင်း သဵၼ်ႈတၢင်းလူင်လႄႈ ၵိဝ်ႇ ႁႃႈသၢမ်တူဝ် ဢၼ်မီးတီႈပွၵ်ႉႁွင်ႇဝဵင်းမူႇၸေႊ။ ၼၼ်ႉၵေႃႈ ႁဵတ်းႁႂ်ႈၵူၼ်းမိူင်း တူၵ်းၸႂ် ဢမ်ႇႁတ်းဢွၵ်ႇႁိူၼ်းလဵပ်ႈႁိမ်းၸမ် – ၵူၼ်းမူႇၸေႊၵေႃႉၼိုင်ႈလၢတ်ႈ။
ထူင်မၢၵ်ႇၼၼ်ႉ ပဵၼ်ၽ်ႂမႃးၵေႃႉႁၢင်ႈၵၢင်တႄႉဢမ်ႇႁူႉ ဝႃႈၼႆ။
ၼွၵ်ႈလိူဝ်ၼၼ်ႉ မိူဝ်ႈၼႆႉ တီႈပၢင်ႇႁိူဝ်းမိၼ်ၵဝ်ႇ ၸႄႈဝဵင်းမူႇၸေႊ မီးပၢင်မူၼ်ႈသိူဝ်း ပွႆးလိူၼ်သီႇၶႄႇ၊ တီႈၵၢင်ဝဵင်း(မဵဝ်ႉတေႃႇၶၢၼ်းမ) ၼၼ်ႉၵေႃႈ မီးသိုၵ်းမၢၼ်ႈ ပႂ်ႉတဵမ် လွမ်ႉႁွပ်ႈမူတ်း ၼိုင်ႈတီႈလႂ် မီးသိုၵ်းပႂ်ႉ 4-5 ၵေႃႉ ။ ယွၼ်ႉဝႃႈ တီႈၼၼ်ႈ မီးၸၢဝ်းၶႄႇ မႃးၸႃႇၵႃႉလဵင်ႉလူ (ၶဝ်ႈတၢၼ်ႇပွၵ်ႉ) ၽွင်း ပီမႂ်ႇၶႄႇ မီးၸၢဝ်းၶၢင် လႄႈ ၸုမ်းပျီႇတူႉၸိတ်ႉ မႃးဢဝ်ႁူမ်ႇလူမ်ႈပႃးထႅင်ႈ ၵူၼ်း မူႇၸေႊလၢတ်ႈ။
