ၵူၼ်းပၢႆႈၽေးသိုၵ်း တီႈၸႄႈဝဵင်းၵျွၵ်ႉမႄး ႁူဝ်ၵူၼ်း 1,000 ပၢႆ လူဝ်ႇတၢင်းၸွႆႈထႅမ် ၶွင်ၵိၼ်ယႅမ်ႉလႄႈ ၽိုၼ်းတႃႇသႂ်ႇၾႆး ၸိူဝ်းၼႆႉ။
လုင်းၸၢႆးလႅင်းႁၢၼ် ႁူဝ်ပဝ်ႈ ၵေႃလိၵ်ႈလၢႆး ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် ဢၼ်ယၢပ်ႇၼႆႉတႄႉ ပဵၼ်လွင်ႈၵိၼ်ယႅမ်ႉ။ ဢၼ်ၼႆႉ မၼ်းသဵင်ႈၵႂႃႇၵူႈတီႈယဝ်ႉ။ တီႈၵေႃလိၵ်ႈလၢႆးႁဝ်းၼႆႉၵေႃႈ မီးၶဝ်ႈသၢၼ်ၵူၺ်းယဝ်ႉ ၼမ်ႉမီႇၼမ်ႉမၼ်း ၸိူဝ်းၼႆႉတႄႉ ဢမ်ႇ မီးယဝ်ႉ။ၽိုၼ်းၵေႃႈယၢပ်ႇၽိုတ်ႇ။ ၵႃႈၽိုၼ်းၵေႃႈ မိူဝ်ႈလဵဝ် ၼိုင်ႈဝႃး 6 မိုၼ်ႇပျႃး။ ၽိုၼ်းၼိုင်ႈဝႃးၼႆႉ လႆႈၸႂ်ႉမွၵ်ႈ 4 ဝၼ်းၼႆႉၵူၺ်း။ ၵႃႈၽိုၼ်း ၵႃႈၽၵ်းၵေႃႈ ဢမ်ႇငၢႆႈငၢႆႈ သဵင်ႈၼမ်ၶႃႈဢေႃႈ”- ဝႃႈၼႆ။
ပၢင်တိုၵ်းတၢင်းပွတ်းသၼ်လွႆႁူးသူၼ် ၸိူဝ်းၼၼ်ႉ ယၢမ်းလဵဝ် ယဵၼ်ဝႆႉသေတႃႉ ၵူၼ်းပၢႆႈၽေးပႆႇႁတ်းပွၵ်ႈႁိူၼ်းၶိုၼ်း။ တီႈလႅၼ်ၶႅၼ်ႈ ၵျွၵ်ႉမႄး – သီႇ ပေႃႉၼၼ်ႉၵေႃႈ မၢင်ဝၼ်း မီးပၢင်တိုၵ်းပဵၼ်ပွၵ်ႈပဵၼ်ၵမ်း။ မၢင်တီႈမၢင်ဝၢၼ်ႈသမ်ႉ ၸုမ်းယိပ်းၵွင်ႈၵၢင်ႇ တိုၵ်ႉမီး ယူႇၼႂ်း ဝၢၼ်ႈလႄႈ ၵူၼ်းပၢႆႈၽေးသိုၵ်း ပႆႇႁတ်းပွၵ်ႈႁိူၼ်းယေး ။
ယၢမ်းလဵဝ် ၼႂ်းၸႄႈဝဵင်းၵျွၵ်ႉမႄး မီးၵူၼ်းပၢႆႈၽေးသိုၵ်း တင်းမူတ်း 1,000 ပၢႆ။ ၼႂ်းၼၼ်ႉ တီႈဝၢၼ်ႈၸွႆးၵုင်းမီး 400 ပၢႆ၊ ဝတ်ႉၼႃးၶေႃ မီး 200 ပၢႆ၊ ဝတ်ႉၼမ်ႉၸဵတ်းလိၼ်း 100 ပၢႆ၊ ၵေႃလိၵ်ႈလၢႆး 300 ပၢႆ၊ ပွၵ်ႉ 8 ထမ်ႇမရူင်ႇမီး 100 ပၢႆ၊ တီႈမိူင်းတင်ႈ 100 ပၢႆ၊ မိူင်းငေႃႉ 300 လႄႈ ၸိူဝ်းယူႇသွၼ်ႈဝႆႉ ၸွမ်းႁိူၼ်းယေး ပီႈၼွင်ႉၽႂ်မၼ်း ၸိူဝ်းၼႆႉ။
ပူၼ်ႉမႃးပႆႇႁိုင်ၼႆႉ ယူႇတီႈၵူၼ်းပၢႆႈၽေးသိုၵ်း တီႈၸႄႈဝဵင်းၵျွၵ်ႉမႄး ဢွၼ်ၵၼ် ပၢႆႈၵႂႃႇသွၼ်ႈတၢင်း ၸႄႈဝဵင်းလွၵ်ႉၸွၵ်ႇထႅင်ႈ 500 ပၢႆ ၼၼ်ႉၵေႃႈ တေႃႈလဵဝ် တိုၵ်ႉလူဝ်ႇတၢင်းၸွႆႈထႅမ် လွင်ႈၵိၼ်ယႅမ်ႉလႄႈ ၽႃႈယၢင်တႃႇမုင်း ၸိူဝ်းၼႆႉ။
