လိူၼ်ၾႅပ်ႊပိဝ်ႊရီႊ 1 ၼႆႉ ၶွင်ႇသီႇသိုၵ်းမၢၼ်ႈ ယိုတ်းသိမ်းဢႃႇၼႃႇ ၸိုင်ႈမိူင်း  တဵမ်ၼိုင်ႈပီ  ။ ၼႂ်းဝၼ်းၼၼ်ႉ ႁႂ်ႈလႆႈႁူမ်ႈၵၼ် ၶွမ်ႈ ၶတ်းလူၺ်ႈလၢႆးယဵၼ်သဵင် Silent Strike ၼႆလႆႈႁၼ် ၵူၼ်းၸိူဝ်းယူႇၾၢႆႇၶတ်းၶၢၼ်ႉ တိုၵ်းသူၼ်းယူင်းသေႃႇၵၼ်ယူႇ ၵႂၢင်ႈၵႂၢင်ႈၶႂၢင်ၶႂၢင်။

ဝၼ်းၼၼ်ႉတင်းဝၼ်း ယႃႇပေဢွၵ်ႇၼွၵ်ႈႁိူၼ်း၊ ယႃႇပေပိုတ်ႇႁၢၼ်ႉပၢႆးၶၢႆ ထိုင်တၢမ်းၶမ်ႈၸင်ႇႁူမ်ႈ တူပ်းမိုဝ်းပိၼ်ႇပၢႆႇပၼ်သဵင်/ ပိၼ်ႇပၢႆႇပၼ်ႁႅင်း ၵၼ်ၼႆ ၸႂ်ႉလၢႆးၵတ်းယဵၼ်သေ ႁႂ်ႈဢွၼ်ၵၼ်ၶွမ်ႈၶတ်းတေႃႇလွင်ႈတပ်ႉသိုၵ်းမၢၼ်ႈယိုတ်းသိမ်းဢႃႇၼႃႇ ဝႃႈၼႆၵၼ်။

လၢႆးၸိူင်ႉၼင်ႇၼႆ ပဵၼ်ဢၼ်ႁဵတ်းၸွမ်းသုၼ်ႇလႆႈသုၼ်ႇပဵၼ်ၵူၼ်း တမ်ၼင်ႇလုမ်းၸၢတ်ႈၸိုင်ႈလုမ်ႈၾႃႉ UN ပိုၼ်ၽၢဝ်ႇဝႆႉၼၼ်ႉၵူၺ်း ဝႃႈၼႆ သေတႃႉ ယူႇၾၢႆႇသိုၵ်းမၢၼ်ႈတႄႉ ႁႄႉႁၢမ်ႈ လွၵ်ႇငိုတ်ႈၵူၺ်းဢမ်ႇၵႃး ႁဵတ်းလွင်ႈတီႉၺွပ်းဝႆႉထႃႈ  လိူင်းလိူင်းၸိူင်းၸိူင်း ။

ၸဝ်ႈၼႃႈတီႈၾၢႆႇၸၵၸၶဝ်ဝႃႈ  ၼႂ်းဝၼ်းတီႈ 1/2/2022 တၵ်းတေလႆႈပိုတ်ႇႁၢၼ်ႉပၢႆးၶၢႆ၊ တၵ်းတေဢမ်ႇလႆႈတူပ်းမိုဝ်း၊ တၵ်းတေဢမ်ႇလႆႈႁႆႇမေႃႇ ႁႆႇၵၢၵ်ႇ၊ တၵ်းတေဢမ်ႇလႆႈတဵၵ်းၼဵၼ်ႁွၼ်းၵႃး။ လွင်ႈဝႃႈ တေဢမ်ႇႁဵတ်းၼၼ်ႉၵေႃႈ ၸႂ်ႉလူင်းလၢႆးမိုဝ်း ၸႂ်ႉပၼ်ၶေႃႈႁပ်ႉပၢၵ်ႇသေၵွၼ်ႇ။

တမ်ၼင်ႇၶေႃႈၸီႉသင်ႇၶဝ်ၸိုင် ႁူႉသေၵေႃႈလီ ဢမ်ႇႁူႉသေၵေႃႈယဝ်ႉ ပေႃးဝႃႈႁဵတ်းၺႃးလွင်ႈဢွၵ်ႇသဵင်၊ လွင်ႈတူင်ႉတူဝ် ဢမ်ႇၼၼ် သိုပ်ႇပိုၼ် ၽႄၶေႃႈယူင်းသေႃႇဝႃႇ ပၼ်ႁႅင်းၸွႆႈထႅမ်သေလၢႆးလၢႆးဝႃႇ ၸိူင်ႉၼႆၼႆႉ တေၺႃးဢဝ်လိူင်ႈပူင်တူတ်ႈယဵပ်ႈၶွၵ်ႈၵူၺ်းဢမ်ႇၵႃး ၶူဝ်းၶွင် ၸဵမ်ဢၼ် ၶၢႆႉလႆႈ ဢမ်ႇၶၢႆႉလႆႈ တေၺႃးယိုတ်းသိမ်းဢဝ်လၢႆပႅတ်ႈ ၸိူင်ႉၼႆၼႆႉ ၵွၼ်ႇပႆႇထိုင်ဝၼ်းမၼ်း ၸဝ်ႈတၢင်းၶၢႆ ၸိူဝ်းၺႃးတီႉၺွပ်း၊ ၺႃးယိုတ်းၵႂႃႇၵေႃႈ မီးတင်းၼမ်ယဝ်ႉ။ ၵၢတ်ႇလူင်၊ ၵၢတ်ႇဢွၼ်ႇ၊ ႁၢၼ်ႉတၢင်းၵိၼ်၊ ႁၢၼ်ႉသတူဝ်ႊလႄႈ ႁၢၼ်ႉၵုၼ်ႇၶၢႆယွႆႈ ၸိူဝ်းၸွမ်းႁိူၼ်းယေး ၸိူဝ်းၼႆႉ ပေႃးဢိုတ်း ႁပ်ႉဝႆႉႁိုဝ် ဢမ်ႇၼၼ် ႁဵတ်းလွင်ႈသၢၼ်ၶတ်းတေႃႇၸုမ်းသိုၵ်းသေလွင်ႈလွင်ႈႁိုဝ်ၼႆ တေၺႃးၾၢႆႇၸုမ်းသိုၵ်း ဢဝ်လိူင်ႈ။

ၵမ်းၼႆႉ မၢင်တီႈမၢင်ဝဵင်းသမ်ႉ ၺႃးလွၵ်ႇငိုတ်ႈပၼ်ၾၢင်ႉဝႃႈ ပေႃးဢမ်ႇပိုတ်ႇႁၢၼ်ႉပၢႆးၶၢႆ၊ ယူႇၾၢႆႇ PDF တေၼပ်ႉသွၼ်ႇပဵၼ်တလၢၼ်ႇ ၵူၼ်းၵဝ်း ဢမ်ႇၸုၵ်းၾၢႆႇသိုၵ်းမၢၼ်ႈ ဝႃႈၼႆထႅင်ႈၵွၼ်ႇ။ လိူဝ်ၼၼ်ႉသမ်ႉ ၼႄလၢႆးဝႃႈၸႂ်ႉတိုဝ်းဢိၼ်ႊတိူဝ်ႊၼႅတ်ႊသေ ပၼ်ႁႅင်း PDF, NUG, CRPH ၶဝ်ဝႃႈၼႆသေ တဵၵ်းၸႂ်ႉႁႂ်ႈၵူၼ်းမိူင်းပူတ်းပႅတ်ႈ VPN ၵၢၵ်ႇသေႃးဢၼ်ပိုတ်ႇၶဝ်ႈတူၺ်း လႆႈၶၢဝ်ႇၵူႈမိူင်းမိူင်း၊ ၵူႈလွင်ႈလွင်ႈ ၼၼ်ႉၵေႃႈ ႁဵတ်းပႃး ထႅင်ႈ။

ၵမ်းၼႆႉ ပေႃးၵူတ်ႇၺႃးထတ်းႁၼ်ဝႃႈ ၸႂ်ႉတိုဝ်း VPN ဢိူဝ်ႈ ၼႆသမ်ႉတေတီႉၺွပ်းယဵတ်ႈၶွၵ်ႈ 3 ပီ ဢမ်ႇၼၼ် တေမၢပ်ႇမႂ်ငိုၼ်း 5 လၢၼ်ႉ။ ၼႆႉၵေႃႈ လႆႈႁၼ်ၶဝ်ၵူတ်ႇထတ်းယူႇ တီႉၺွပ်းယူႇ ။ ၵမ်ႈၽွင်ႈလႆႈပၼ်ငိုၼ်း 5 သႅၼ် 10 သႅၼ်သေ ယဝ်ႉယႃႇၵႂႃႇၵေႃႈမီး ။

ပေႃးမႃးတူၺ်းၼႆ ၵူၼ်းမိူင်းၼႆႉ သၼ်ၵေႃႈလႆႈၵူဝ်၊ ၶူမ်းၵေႃႈလႆႈၵူဝ် တေလႆႈၽိုၼ်ႉၾၢႆႇၼိုင်ႈ ၽွမ်ႉၾၢႆႇၼိုင်ႈ ၸုမ်းယူႇလႅၼ်ၵၢင်ဢမ်ႇလႆႈ မိူၼ် မိူဝ်ႈပူၼ်ႉမႃး 10 ပီပၢႆပၢႆၼၼ်ႉ ပေႃးဢမ်ႇၸႂ်ႈ ဢၼ်လႅင်ၵေႃႈ ၺႃးမၢပ်ႇမႂ်ပဵၼ်ဢၼ်ၶဵဝ် ပဵၼ်ဝႆႉၸိူင်ႉၼၼ်ၶိုၼ်းယဝ်ႉ။ ပၢႆးဝူၼ်ႉ (မၢႆးသႅတ်ႉ) ၵူၼ်းမိူင်း မၢၼ်ႈလႄႈ ၸၢဝ်းၶိူဝ်းမၢၼ်ႈၵမ်ႈၼမ်ၼမ် တိုၵ်ႉမိူၼ်ၼၼ် တေလႆႈဝႃႈၼၼ်ၵူၺ်းယဝ်ႉ။

တီႈၼႆႈ ပေႃးမႃးထတ်းတူၺ်းၼႂ်းၶၢဝ်းယၢမ်းၼိုင်ႈပီ ၸူဝ်ႈၸႃႈၸုမ်းသိုၵ်းမၢၼ်ႈၶဝ် ယိုတ်းသိမ်းဢႃႇၼႃႇၸိုင်ႈမိူင်းမႃးၼႆႉ ႁူႉယူႇလွင်ႈလီ ဢမ်ႇမီး ပဵၼ်လွင်ႈႁၢႆႉၸႃႉလိူင်းၸိူင်းလၢႆလၢႆၼႆ ၵူႈၵေႃႉၵေႃႈ ပွင်ႇၸႂ်ၵၼ်ယူႇ။

ၼႂ်းၼင်ႇၼၼ် ဢၼ်တေၸၢင်ႈဢဝ်ယႃၸႂ်လႆႈ ယေႈၽိတ်ႇယေႈၶီးတႄႉ – လွင်ႈဝႃႈတပ်ႉသိုၵ်းမၢၼ်ႈ တိုၼ်းဢမ်ႇလီတေႃႇၵူၼ်းမိူင်းၸၢဝ်းၶိူဝ်း ဢၼ်ဝႃႈၼၼ်ႉ တမ်တူဝ်ၵူၼ်းမိူင်း ၸၢဝ်းၶိူဝ်းမၢၼ်ႈၶဝ် ၸိူဝ်းယူႇထုင်ႉလိၼ်ပဵင်း လႆႈႁူႉလႆႈႁၼ် လႆႈၺႃးထူပ်းတူဝ်သေယဝ်ႉ။ မေႃသွၼ်ႇတူဝ် တေႃႇ တၢင်ႇၸၢဝ်းၶိူဝ်းမႃး ပေႃးဢမ်ႇၸႂ်ႉလၢႆးၾႅတ်ႊၻရႄႊသေ ပွင်မိူင်း မိူင်းႁူမ်ႈတုမ်လူင် ဢၼ်မီးယူႇမိူဝ်ႈလဵဝ်ၼႆႉ ၸၢင်ႈတႅၵ်ႇငၢၵ်ႈ ၵူၼ်ႇပင်း ၵႂႃႇ။ တမ်တူဝ်ၸၢဝ်းၶိူဝ်းၶဝ် ၵိူတ်ႇမီးမႃး တပ်ႉသိုၵ်းလုၵ်ႉၽိုၼ်ႉ ၸၢဝ်းမၢၼ်ႈ ဢၼ်ႁွင်ႉဝႃႈ (ဗမာသူပုန်တပ်) ၼၼ်ႉသေယဝ်ႉ ၸိူဝ်းသၢမ်ၶေႃႈၼႆႉ တေလႆႈဝႃႈ လွင်ႈလႅၵ်ႈလၢႆႈပိၼ်ႇပၢႆႇ ၶိုပ်ႈၼႃႈၶိုၼ်ႈမႃးယူႇၽွင်ႈ။

ၵူၺ်းၾၢႆႇၼိုင်ႈတၢင်းၼိုင်ႈ လွင်ႈလူႉလွင်ႈသုမ်းတႄႉၵေႃႈ မၼ်းၼမ်လိူဝ် ပူၼ်ႉတီႈၼႃႇဢႃးလႃး ၸူဝ်ႈၶၢဝ်း ၸုမ်းသိုၵ်းမၢၼ်ႈ သိမ်းမိူင်းၼႆႉ ၵူၼ်း မိူင်းဢၼ်လႆႈပၢႆႈၽေးသိုၵ်း မီးယူႇ 710,000 ၵေႃႉ၊ ႁိူၼ်းယေး ဢၼ်လႆႈၺႃး ၸုတ်ႇၽဝ်ပႅတ်ႈ ယႃႉလူႉၵွႆပႅတ်ႈမီးယူႇ 2,265 လင်၊ ၵူၼ်းမိူင်း ဢၼ်ထုၵ်ႇႁဵတ်းလွင်ႈမၢပ်ႇမႂ် မီးယူႇ 11,500 ပၢႆ ၼႂ်းၼၼ်ႉ ဢၼ်တိုၵ်ႉၺွပ်းၶင်ဝႆႉ မီးယူႇ 9,289 ၵေႃႉ။

ၵမ်းၼႆႉ ပေႃးတူၺ်းၵူၼ်း ဢၼ်လႆႈတၢႆႁၢႆၵႂႃႇ ၼႂ်းၵႄႈလိူင်ႈယိုတ်းသိမ်းဢႃႇၼႃႇလူင် ၼိုင်ႈပီၶွပ်ႈမႃးၼႆႉ ႁူမ်ႈသဵၼ်ႈတေမီးယူႇ 10,804 ၵေႃႉ။ ၼႂ်းၼၼ်ႉ ၵူၼ်းမိူင်းၽၵ်းၵႃႇ ပႃးယူႇ 2,313 ၵေႃႉ၊ ၾၢႆႇ PDF တေမီးယူႇ 167 ၵေႃႉ၊ ၵူၼ်းၵမ်ႉယၼ်ၾၢႆႇသိုၵ်းတေမီးယူႇ 726 ၵေႃႉ။ လုၵ်ႈ သိုၵ်းမၢၼ်ႈ ဢၼ်လႆႈတၢႆၵႂႃႇတႄႉ တေမီးယူႇ 7,591 ၵေႃႉ ဝႃႈၼႆ။ ၼႆႉတႄႉ ၸွမ်းၼင်ႇၽူႈလဵပ်ႈႁဵၼ်းၶူၼ်ႉၶႂႃႉၶဝ် တင်ႇမၢႆတမ်းၽိုၼ်ဝႆႉလႄႈ ႁဝ်း ၶႃႈလႆႈႁူႉၸွမ်း။

ၼႂ်းငဝ်းလၢႆးၼင်ႇၼႆ တေႁဵတ်းႁိုဝ်ၵႄႈၶႆ ႁႂ်ႈပေႃးၸၢင်ႈၵိုတ်းတိုၵ်းၵၼ်သေ ဢုပ်ႇၵုမ်တႃႇႁူမ်ႈသၢင်ႈ ၵၢၼ်ဝၢၼ်ႈၵၢၼ်မိူင်းဢၼ်ဝႃႈၼၼ်ႉတႄႉ ႁၢၼ်ႉတေႃႇထိုင်ဝၼ်းမိူဝ်ႈလဵဝ် ႁၢၼ်ႉတေႃႇထိုင်ယၢမ်းမိူဝ်ႈလဵဝ် ပႆႇမီးၽႂ်ႁႃႁၼ်လႆႈလၢႆးၵႄႈမၼ်း။ ယူႇၾၢႆႇၶတ်းၶၢၼ်ႉ လုၵ်ႉၽိုၼ်ႉၵေႃႈ တိုၵ်ႉၵၼ်ႉ ၵူပ်ႉ ၶိုင်ႁႃၶွၼ်ႈႁႅင်းၵၼ်ယူႇ ပၢင်မၼ်းပႆႇပႃႈမူၼ်း။

ၵမ်းၼႆႉ ၾၢႆႇၸၵၸၶွင်ႇသီႇသိုၵ်းမၢၼ်ႈၼႆၵေႃႈသမ်ႉ တၢႆတေႃႇတဵင်ႉ တိုၼ်းတေဢမ်ႇယွမ်း တႃႇတေၽႃႈပႅတ်ႈဢႃႇၼႃႇပၼ်ႇပွင်ဢၼ်ဝႃႈၼၼ်ႉ ၶဝ်တိုၼ်းဢမ်ႇမီးဝၼ်းပၼ် ၼင်ႇႁိုဝ် တေပဵၼ်လႆႈ လူင်ပွင်ၸိုင်ႈ ၶဝ်ႈတၢင်းၵၢၼ်ၼၼ်ႉ ၸႂ်ႉတိုဝ်းမတ်ႉတႃ 261 ႁဵတ်းၶေႃဝဵတ်းတေႃႇ ၸုမ်း ၸၢဝ်းၶိူဝ်းတႃမွတ်ႇလိပ်းၶဝ်သေ တေတဵၵ်းႁဵတ်းလိပ်း ႁဵတ်းလႅင်ယူႇ ႁဝ်းၶႃႈတႄႉ ႁၼ်ထိုင်ၸိူင်ႉၼၼ်။

တိူၵ်ႈတီႈလႆႈယိူၼ်ႉဝႆႉ မိူင်းယၢင်းလႅင်၊ မိူင်းၶျၢင်းလႄႈ တိူင်းၸႄႈၵႅင်း၊ တိူင်းမၵူၺ်းၶဝ် ၸိူဝ်းၼၼ်ႉသေ ဢထမ်ႇမၸတ်းႁဵတ်းပၢင်လိူၵ်ႈတင်ႈၼႆ ၵေႃႈ တၵ်းတေႁဵတ်းယူႇ။ လၢင်းလၢင်း ဢမ်ႇပဵၼ်ပၢင်မႃး လၢႆးပၢင်လိူၵ်ႈတင်ႈၼၼ်ႉၵေႃႈ ဢမ်ႇၸၢင်ႈသိုပ်ႇႁဵတ်းပေႃးၼၼ်ၸိုင် လၵ်းမိူင်း 2008 ၵေႃႈ ဢမ်ႇၸၢင်ႈသိုပ်ႇသၢႆၸႂ်ပၼ်လႆႈ တႃႇတပ်ႉသိုၵ်းၶဝ်ယဝ်ႉၼႆတႄႉ လႆႈပိၼ်ႇႁဵတ်းလူင်ပွင်ၸိုင်ႈသိုၵ်း ၸိူင်ႉၼင်ႇ ပၢၼ်ၼဝတ၊ ၼဢၽ ၸိူင်ႉ ၼၼ်ၵေႃႈ ယိုင်ႈၶႅၼ်းထုၵ်ႇၸႂ်ၶဝ်ၵွၼ်ႇ ႁဝ်းၶႃႈတႄႉ လၢမ်းႁၼ်ဝႆႉ ၸိူင်ႉၼၼ်။

ၵမ်းၼႆႉ ၼင်ႇႁိုဝ် တေဢမ်ႇပဵၼ်ၸိူင်ႉၼၼ် မုင်ႈမွင်းဝႃႈ ယွၼ်းသူးဝႃႈ ႁႂ်ႈၸုမ်းၸၢဝ်းလုၵ်ႉၽိုၼ်ႉတင်းသဵင်ႈ ၸိူဝ်းပဵၼ် EAO ၸုမ်းၸၢဝ်းၶိူဝ်းမႅၵ်ႇ ၵွင်ႈလုၵ်ႉၽိုၼ်ႉၶဝ်လႄႈ ၸိူဝ်းဢၼ်ၸႃႉၵိူတ်ႇဢွၵ်ႇမႃး ၸိူဝ်းပဵၼ် PDF တင်းသဵင်ႈ ႁႂ်ႈလႆႈႁူမ်ႈၶွၼ်ႈႁႅင်းၵၼ် ၽိုၼ်ႉပၢၵ်ႈလႆႈ ဝႆးဝႆးၼၼ်ႉၸင်ႇ ႁဝ်းၶႃႈ ၸင်ႇတေမုင်ႈမွင်းလႆႈ တီႈဢၼ်ၵတ်းယဵၼ်လႄႈ တီႈဢၼ်ၸၢင်ႈဢုပ်ႇဢူဝ်းသၢင်ႈၵၢၼ်ၸိုင်ႈမိူင်းၵႂႃႇလႆႈငၢႆႈယဝ်ႉ ဢၼ်ဝႃႈၼၼ်ႉ ယွၼ်း ပၢႆးၼႄၵၼ် မွၵ်ႈၼႆသေ ၶွတ်ႇယွတ်ႈပၢႆၵႂၢမ်းဝႆႉတီႈၼႆႈၵွၼ်ႇၶႃႈ။

မႂ်ႇသုင်ၶႃႈ