ၵႃးတၢင်ႇၵုၼ်ႇ 22 လေႃႉ လမ်းၼိုင်ႈ ၺႃးၽဝ် တီႈႁိမ်းဝၢၼ်ႈမေႃႈတွင်း ၸႄႈဝဵင်းမူႇၸေႊ ပဵၼ်ၸုမ်းလႂ် ၼမ်ႉမိုဝ်းၽႂ်ႁဵတ်း ဢမ်ႇႁူႉ။

မိူဝ်ႈဝႃး ဝၼ်းတီႈ 30/1/2022 ယၢမ်းၵၢင်ၶိုၼ်း ၵႃးတၢင်ႇၵုၼ်ႇ 22 လေႃႉ လမ်းၼိုင်ႈ ၺႃးၽဝ်ဝႆႉ တီႈႁိမ်းဝၢၼ်ႈမေႃႈတွင်း   ၼိူဝ်သဵၼ်ႈတၢင်း မူႇၸေႊ – ဝဵင်းလိူဝ်ႇ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ  ။

ၵူၼ်းဝၢၼ်ႈ ႁိမ်းႁွမ်း တီႈၼၼ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၵႃးလူင်တၢင်ႇၵုၼ်ႇ ၵႃးတၢင်ႇပုၼ် (ၽိလၢပ်ႉမေႇ)   ထုၵ်ႇၽဝ်ပႅတ်ႈဝႆႉ ႁိမ်းတၢင်း ၸဵမ်မိူဝ်ႈဝႃး။ မိူဝ်ႈၼႆႉ ၵၢင်ၼႂ် ၵွၼ်းတိုၵ်ႉဢွၵ်ႇမႆႈဝႆႉၸိူင်ႉၼၼ်ယူႇၶႃႈ။ ၸဝ်ႈၵႃး/ ၵူၼ်းၸွမ်းၵႃးၵေႃႈ ဢမ်ႇႁၼ် တၢႆႁိုဝ် လိပ်းႁိုဝ် ဢမ်ႇႁူႉ၊ လွင်ႈပိူင်ပဵၼ်မၼ်းၵေႃႈ ဢမ်ႇႁူႉၶႃႈ လႆႈႁၼ်ၵႃး ထုၵ်ႇၾႆးမႆႈဝႆႉၸိူင်ႉၼၼ်ၵူၺ်း”- ဝႃႈၼႆ။

ဢွင်ႈတီႈ ပွတ်းတွၼ်ႈၼၼ်ႉ ၵမ်ႈၼမ် မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃးယူႇဝႆႉသမ်ႉ ပဵၼ်ၸုမ်းသိုၵ်းၶၢင် KIA လႄႈ သိုၵ်းတဢၢင်း TNLA ၸိူဝ်းၼႆႉ ၵူၼ်းပိုၼ်ႉတီႈလၢတ်ႈ။

ၼွၵ်ႈလိူဝ်ၼၼ်ႉ ဢွင်ႈတီႈႁိမ်းႁွမ်းၼၼ်ႉၵူၺ်း မီးလွင်ႈၸုတ်ႇၽဝ်ၵႃးတၢင်ႇၵုၼ်ႇမႃးယဝ်ႉ ဢမ်ႇယွမ်း 3 ပွၵ်ႈ ပႃးပွၵ်ႈၼႆႉ ၵူၼ်းပိုၼ်ႉတီႈ ႁိမ်းႁွမ်း ၼၼ်ႉ လၢတ်ႈ ။ ဢၼ်ၺႃးၽဝ်မိူဝ်ႈပူၼ်ႉမႃးၼၼ်ႉၵေႃႈ ၸဝ်ႈၵႃးလႄႈ ၵူၼ်းၸွမ်းၵႃးဢမ်ႇႁၼ်ၶိုၼ်းသေပွၵ်ႈ ။ ၵူၼ်း/ၸုမ်းၽဝ်ၵေႃႈဢမ်ႇတီႉၺွပ်းလႆႈသေၵမ်း။ ပဵၼ်ဢၼ်လွၵ်ႇငိုတ်ႈၸႂ်ၵူၼ်းမိူင်း ၵူၼ်းၵႃႉ ၸိူဝ်းတႆႇတၢင်းသဵၼ်ႈၼႆႉ။