မိူဝ်ႈၼႆႉ ဝၼ်းတီႈ 31/1/2022 ယၢမ်းၵၢင်ဝၼ်း 12:42 မူင်း ပျီႇတူႉၸိတ်ႉၵေႃႉၼိုင်ႈ ၺႃးယိုဝ်းတၢႆၶမ်ႈၵႃးၸဝ်ႈၵဝ်ႇ ၾၢႆႇႁွင်ႇၵၢတ်ႇ မၢႆ 1 ဝဵင်းမူႇၸေႊ ။
ၵူၼ်းပိုၼ်ႉတီႈမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵူၼ်းယိုဝ်းပဵၼ်ၽႂ်ၸုမ်းလႂ်တႄႉဢမ်ႇႁူႉၶႃႈ။ ယိုဝ်းပျီႇတူႉၸိတ်ႉၵေႃႉၼိုင်ႈၶႃႈဢေႃႈ။ တီႈႁိမ်းၶၢင်ႈၵၢတ်ႇၼႆႉ ။ ပဵၼ်ပျီႇတူႉၸိတ်ႉၸုမ်းလႂ်တႄႉဢမ်ႇႁူႉၶႃႈ။ လႆငိၼ်းဝႃႈ ယိုဝ်း 5 ၵမ်းၼႆဢေႃႈ ။ ”- ဝႃႈၼႆ။
တူဝ်တၢႆပျီႇတူႉၸိတ်ႉ ဢမ်ၶမ်ရူတ်ႉၵႃးမၼ်းဝႆႉယူႇၼၼ်ႉတႄႉ ယူႇတီႈၸုမ်းၸွႆႈထႅမ်ပရႁိတ မူႇၸေႊ ဢဝ်သူင်ႇႁူင်းယႃ ယဝ်ႉလႆႈႁူႉၼင်ႇၼႆ။
“တီႈဢၼ်ၶဝ်ယိုဝ်းၵၼ်ၼၼ်ႉပဵၼ်တီႈ သဵၼ်ႈတၢင်း ၵၢတ်ႇၵၢင်ၶမ်ႈ (ညစျေးတန်း)။ တီႈၼၼ်ႈ ရူတ်ႉၵႃးၼမ် ၵူၼ်းၵိုၼ်း သဵၼ်ႈတၢင်းတိတ်းၼႃႇ ။ ၵႃးၵေႃႉၺႃးယိုဝ်းၼၼ်ႉ ၵိုတ်းၸွတ်ႇဝႆႉၶၢင်ႈတၢင်း။ ၶဝ်လူင်းသိုဝ်ႉၶူဝ်းႁိုဝ်ဢမ်ႇၼၼ် တိုၵ်ႉႁေႃႈမႃးလွႆးလွႆးႁိုဝ်ၵေႃႈဢမ်ႇႁူႉၶႃႈ။ ၽိူဝ်ႈပိူၼ်ႈႁူႉဝႃႈမၼ်းၺႃးယိုဝ်းၼႆၼၼ်ႉတႄႉ ၸၢၵ်ႈၵႃးမၼ်းၵေႃႈ ဢမ်ႇပၼ်ႇယဝ်ႉၶႃႈ ပိၵ်ႉဝႆႉယဝ်ႉ။ ”- ၵူၼ်းပိုၼ်ႉတီႈမူႇၸေႊ သိုပ်ႇလၢတ်ႈၼင်ႇၼႆ။
ဢိင်ၼိူဝ် လွင်ႈၼႆႉသေ ၵူၼ်းၶၢႆၵၢတ်ႇ မၢႆ 1 ဝဵင်းမူႇၸေႊတႄႉ ဢွၼ်ၵၼ်တူၵ်းၸႂ် တိုၼ်ႇသၢၼ်ႈၵၼ်သေ ၼႅတ်ႈသိမ်းၶူဝ်းႁၢၼ်ႉ/ လၢၼ်ႉၽႂ်မၼ်း ပွၵ်ႈႁိူၼ်းယေးၵၼ် ၼႆယဝ်ႉ။
