ႁူဝ်ပီ 2022 ၼႆႉမႃး သိုၵ်းမၢၼ်ႈ ဢၼ်တူင်ႉၼိုင် ၵႂႃႇမႃး ၼႂ်းၸႄႈဝဵင်းၵူတ်ႉၶၢႆ ႁႅင်းသိုၵ်းလူတ်းယွမ်းလူင်း၊ ငႃးသိုၵ်းႁွၼ်ႈထဝ်ႇၵႂႃႇမႃး ပီႇတူႉၸိတ်ႉ ၼႂ်းၸႄႈဝဵင်းၵူတ်ႉၶၢႆ လႆႈသူင်ႇႁႅင်းသိုၵ်းထႅမ်ၸွႆႈ။
ၵူၼ်းၸမ်ၸႂ် ၸုမ်းပျီႇတူႉၸိတ်ႉၵူတ်ႉၶၢႆ လၢတ်ႈဝႃႈ သိုၵ်းမၢၼ်ႈ လႆႈထွၼ်ႁႅင်း ပွၵ်ႈမိူင်းတၢင်း ၸႄႈၵႅင်း၊ မၢင်ၸိူဝ်း ထုၵ်ႇႁွင်ႉဢဝ်ၵႂႃႇတၢင်းၶျၢင်း၊ ယၢင်းလႅင် ၸိူဝ်းၼႆႉလႄႈ လႆႈဝႃႈႁႅင်းသိုၵ်းဢၼ်တူင်ႉၼိုင် ၼႂ်းၵူတ်ႉၶၢႆ လူတ်းလူင်း။ ယွၼ်ႉႁႅင်းသိုၵ်းဢမ်ႇၵုမ်လႄႈ လႆႈဢဝ် ႁႅင်းပျီႇတူႉၸိတ်ႉ ထႅမ်ႈၸွႆႈ တူင်ႉၼိုင် ၸွမ်းငႃးသိုၵ်းမၢၼ်ႈ ဢၼ်ႁွၼ်ႈထဝ်ႇ ၵႂႃႇမႃးၼႂ်းၸႄႈဝဵင်းၵူတ်ႉၶၢႆ။
ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ၸိတ်ႉၵျွင်း(ငႃးသိုၵ်း) သိုၵ်းမၢၼ်ႈ ၵူႈသၢႆၼႆႉ ပႃးပျီႇတူႉၸိတ်ႉ ၵမ်ႉထႅမ်ဝႆႉဢေႃႈ။ ပိူင်လူင်တႄႉ ပျီႇတူႉၸိတ်ႉၵွင်းၶႃး ဢေႃႈ ဢၼ်ၸွမ်း။ တၢင်ႇၸုမ်းၵေႃႈတေလႆႈမီးယူႇ။ ၶဝ်ဝႃႈ ၼိုင်ႈတပ်ႉၵွင် ပျီႇတူႉၸတ်ႉ လႆႈၸွႆႈၶဝ် ႁႅင်းသိုၵ်း 50 ဝႃႇ”- ဝႃႈၼႆ။
ၼႂ်းၵႄႈၵူတ်ႉၶၢႆ – သႅၼ်ဝီ မီးတပ်ႉမ 99, 88, 77 ဢၼ်လုၵ်ႉတၢင်းမိူင်းမၢၼ်ႈ ၶိုၼ်ႈမႃးတူင်ႉၼိုင်။ ယၢမ်းလဵဝ် ၵေႃႈတိုၵ်ႉမီးယူႇသေတႃႉ မွၵ်ႈၼိုင်ႈၶိုင်ႈၼႆႉ လႆႈၸႂ်ႉမိူဝ်းၶဝ်ႈပၢင်တိုၵ်း ၵႂၢတ်ႇလၢင်ႉ သိုၵ်းၵႅတ်ႇၶႄ ၵူၼ်းမိူင်း PDF တၢင်းမိူင်းမၢၼ်ႈၶိုၼ်း။
“မိူဝ်ႈၵူႈပွၵ်ႈတႄႉ ၼႂ်းၵႄႈသႅၼ်ဝီ – ၵူတ်ႉၶၢႆၼႆႉ ၸွမ်းတၢင်းလူင်၊ တၢင်းၵူတ်ႉ ၸွမ်းမူႇဝၢၼ်ႈ ၵူႈတီႈၸိူဝ်းၼၼ်ႉ ပဵၼ်သိုၵ်းမၢၼ်ႈ ဢဝ်တီႈယူႇမူတ်း ဢဵၼ်ႁႅင်းၼပ်ႉပၢၵ်ႇ။ ယၢမ်းလဵဝ်တႄႉ ဢမ်ႇမီးယဝ်ႉ။ ဢၼ်ႁွၼ်ႈထဝ်ႈ ၵႂႃႇမႃးၸိူဝ်းၼႆႉ မီးမွၵ်ႈ 2-3 ၸုမ်းၼႆႉၵူၺ်း။”- ၵူၼ်းၵူတ်ႉၶၢႆ ဢမ်ႇၶႂ်ႈဢွၵ်ႇၸိုဝ်ႈၼၼ်ႉ လၢတ်ႈၼႄထႅင်ႈ ၼင်ႇ ၼႆ။
ၼႂ်းၸႄႈဝဵင်းၵူတ်ႉၶၢႆ မီးၸုမ်းပျီႇတူႉၸိတ်ႉၵွင်းၶႃး ဢၼ်ဢူးမထူႉၼေႃႇဢွၼ်ႁူဝ် မီးတပ်ႉၵွင် မၢႆ 1 , မၢႆ 2 , မၢႆ 3 , မၢႆ 4 တင်း မၢႆ 5 တင်းမူတ်း 5 တပ်ႉၵွင်။ ပေႃးသွၼ်ႇၼႂ်းၸႄႈတွၼ်ႈမူႇၸႄႈတႄႉ မီးပျီႇတူႉၸိတ်ႉလူင်ထင်၊ ပျီႇတူႉၸိတ်ႉမိူင်းပေႃႈ၊ ပီႈတူႉၸိတ်ႉမိူင်းၵူဝ်း၊ တႃႈမိူင်းငႅၼ်း၊ မဵဝ်ႉမႃႉ ၊ ပၢၼ်းသေး ၸိူဝ်းၼၼ်ႉ ပေႃးၼပ်ႉသွၼ်ႇႁူမ်ႈၵၼ် တင်းမူတ်း ၸုမ်းပျီႇတူႉၸိတ်ႉမီး ဢမ်ႇယွမ်း 20 ၸုမ်း။
ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်ၵႆႉႁႅၼ်းသိုၵ်းလေႃႇတိုၵ်းသိုၵ်းမၢၼ်ႈသမ်ႉ မီးသိုၵ်းၶၢင် KIA သိုၵ်းလွႆ TNLA သိုၵ်းၶႄႇၵဝ်ႈၵၢင်ႉ MNDAA ၸိူဝ်းၼႆႉ။ လိူဝ်ၼၼ်ႉ သိုၵ်း SSPP/SSA ၵေႃႈၵႂႃႇမႃးတူင်ႉၼိုင်။
