မိူဝ်ႈၼႆႉ ဝၼ်းတီႈ 28/1/2022 ယၢမ်းၵၢင်ၼႂ် ယူႇတီႈပလိၵ်ႈမၢၼ်ႈလႄႈ ၾၢႆႇလိူမ်ႈလႆႇ လူင်းပိုၼ်ႉတီႈ ၸႂ်ႉၵူၼ်းၶၢႆၵၢတ်ႇ ၼႂ်းၵၢတ်ႇလူင်ဝဵင်းၼမ်ႉၶမ်း လူင်းလၢႆးမိုဝ်း ဝႃႈတိုၼ်းတေဢမ်ႇပိၵ်ႉႁပ်းႁၢၼ်ႉ ၼႂ်းဝၼ်းသိုၵ်းမၢၼ်ႈယိုတ်းဢႃႇၼႃႇ။
ပလိၵ်ႈမၢၼ်ႈ လႄႈ ၾၢႆႇလိူမ်ႈလႆႇ(သီႇပိၼ်ႇ) လူင်းပိုၼ်ႉတီႈ ၸွမ်းတၢင်း၊ ထိုင်ၼႂ်းၵၢတ်ႇလူင်ဝဵင်းၼမ်ႉၶမ်း ပႃးၽိုၼ် လိၵ်ႈသေ ၶဝ်ႈႁၢၼ်ႉဢွၵ်ႇႁၢၼ်ႉ ထၢမ်ၵၢင်ၸႂ် ၵူၼ်းၶၢႆၵၢတ်ႇဝႃႈ – “ၼႂ်းဝၼ်းတီႈ 1/2/2022 ၼႆႉ ၸွင်ႇတေမႃးပိုတ်ႇ ႁၢၼ်ႉၶၢႆၶူဝ်း၊ ပေႃးတေမႃးပိုတ်ႇၼႆ ႁႂ်ႈလူင်းလၢႆးမိုဝ်း၊ ပေႃးတေဢမ်ႇပိုတ်ႇၼႆ ဢမ်ႇပၼ်လူင်းလၢႆးမိုဝ်း” – ဝႃႈၼႆလႄႈ ၵူၼ်းၸိူဝ်းဢမ်ႇႁူႉငဝ်းလၢႆးၵၢၼ်မိူင်း တူၵ်းၸႂ် ဝႃႈတေပဵၼ်သင်။
ၵူၼ်းၼႂ်းၵၢတ်ႇၼမ်ႉၶမ်းၵေႃႉၼိုင်ႈ လၢတ်ႈၼႄ ၵၢင်ၸႂ်မၼ်းၸၢႆး ဝႃႈ-“ဝူၼ်ႉၵႂင်တႄႉဢေႃႈ သင်ဝႃႈ မႃးပိုတ်ႇ လႆႈမႆႈၸႂ်ၵူဝ်သုၵ်ႉသၵ်ႉ။ သင်ဝႃႈ ဢမ်ႇမႃးၶၢႆၵေႃႈ ဝၢႆးမႃး ၵူဝ်သိုၵ်းမၢၼ်ႈ ပလိၵ်ႈမၢၼ်ႈ မႃးႁဵတ်းတီႈႁဝ်းၶႃႈသေမဵဝ်းမဵဝ်း ၵွပ်ႈၼႆလႄႈ မႆႈၸႂ်ဝႆႉတင်းသွင်လွင်ႈၶႃႈဢေႃႈ”- ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၵူၼ်းၶၢႆၵၢတ်ႇ ၼႂ်းဝဵင်းၼမ်ႉၶမ်း ၵမ်ႈၼမ်တႄႉ ဢွၼ်ၵၼ်လူင်းလၢႆးမိုဝ်းၵၼ်ဝႆႉယဝ်ႉ ဝႃႈတေ မႃးပိုတ်ႇ။ ယွၼ်ႉဢမ်ႇၽွင်းလိူဝ် လႆႈလႄႈ သင်ဢမ်ႇလူင်းလၢႆးမိုဝ်းၼႆၸိုင် ဝၢႆးမႃး ၵူဝ်ပဵၼ်ၵႂႃႇသေၸိူဝ်ႉ သေလွင်ႈ။ ၵူဝ်ထုၵ်ႇသင်ႇပိၵ်ႉႁၢၼ်ႉၶၢႆ ယဝ်ႉၵေႃႈ ၵူဝ်ထုၵ်ႇယိုတ်းၶူဝ်းၵုၼ်ႇ တင်းမူတ်း ဢမ်ႇၼၼ် ၵူဝ်ထုၵ်ႇတီႉၺွပ်း ၸွႆးတြႃးဢဝ် လိူင်ႈ ၸိူဝ်းၼႆႉ။
“ၵမ်ႈၼမ်တႄႉ ဢွၼ်ၵၼ်လူင်းလၢႆးမိုဝ်းပၼ်ၵႂႃႇ ဝႃႈတေပိုတ်ႇႁၢၼ်ႉ ၶၢႆၵၢတ်ႇၵၼ်ယူႇ။ ပေႃးထိုင်ဝၼ်းၼၼ်ႉမႃး ပေႃးသုၵ်ႉသၵ်ႉၼႆၵေႃႈ ဢမ်ႇၵႂႃႇပိုတ်ႇ ၼၼ်ႉၼႃႇၼေႃႈ ”- ဝႃႈၼႆ။
မိူဝ်ႈဝၼ်းတီႈ 10/12/2021 ဝၼ်းသုၼ်ႇလႆႈသုၼ်ႇပဵၼ်ၵူၼ်း လုမ်ႈၾႃႉၼၼ်ႉ ၵူၼ်းမိူင်း ပွတ်းမူႇၸေႊ ၼမ်ႉၶမ်း ၶဝ်ႈႁူမ်ႈပၢင်ၼႄၵၢင်ၸႂ် လူၺ်ႈလၢႆး ဢမ်ႇပိုတ်ႇႁၢၼ်ႉ ဢမ်ႇၶဝ်ႈဢွၵ်ႇ သိုဝ်ႉၶၢႆ တေႃႇၵၼ် တင်ႈတႄႇ ၵၢင်ၼႂ် 10 မူင်းတေႃႇထိုင် ဝၢႆးဝၼ်း 4 မူင်း၊ မႆႉၼိုင်ႈဝႃး ၶႃးၼိုင်ႈတႅပ်း ႁႂ်ႈပဵၼ်ၵၢၼ် ၸွႆႈထႅမ် ၵၢၼ်ပူတ်းထွၼ် ၸုမ်းသိုၵ်းမၢၼ်ႈ ယိုတ်းဢႃႇၼႃႇ။
ၼႂ်းဝၼ်းတီႈ 1/2/2022 ၼႆႉ ၸုမ်းသိုၵ်းမၢၼ်ႈ ယိုတ်းဢႃႇၼႃႇ ၶွပ်ႈတဵမ်ပီ ၵူၼ်းမိူင်း ပတ်းပိုၼ်ႉတူဝ်ႈမိူင်း မိူင်းႁူမ်ႈတုမ် တၢင်းလၢႆ တူင်ႉတိုၼ်ႇၵၼ်ဝႃႈ တေဢမ်ႇဢွၵ်ႇႁိူၼ်း တေဢမ်ႇၵႂႃႇမႃးသိုဝ်ႉၶၢႆ တေၼႄၵၢင်ၸႂ် လူၺ်ႈလၢႆးၵတ်းယဵၼ် Silent Strike ။