ၵူၼ်းၼုမ်ႇ ၼႂ်းဝဵင်းၵဵင်းတုင် ၵမ်ႈၽွင်ႈ မႆႈၸႂ် ၵူဝ်တၢင်းပဵၼ်ၶူဝ်ႊဝိတ်ႉၽႄႈလၢမ်းၶိုၼ်း ယွၼ်ႉၵူၼ်းၼႂ်းမူႇ ၼႂ်းဝၢၼ်ႈ ဢွၼ်ၵၼ် ၸတ်း ႁဵတ်းပွႆးၵိၼ် ပွႆးတၢၼ်းၵၼ်ၼမ် ဝႃႈၼႆ။
ယၢမ်းလဵဝ် ၼႂ်းၸႄႈဝဵင်းၵဵင်းတုင် ၵမ်ႈၽွင်ႈ ၸတ်းပၢင်းပွႆးၵိၼ်၊ ပွႆးလူႇ၊ ပွႆးပၢင်ၶႅၵ်ႇ ၊ ပွႆးၵျေႃႇပွႆးမူၼ်ႈ၊ ပွႆးၶၢမ်ႇသၢင်ႇ ၶၢမ်ႇၸၢင်း ၸတ်းႁဵတ်းလၢႆတီႈ၊ မၢင်တီႈၵေႃႈ ၸတ်းယဝ်ႉ – တၢင်းပဵၼ် ၶူဝ်းဝိတ်ႉ ၽႄႈလၢမ်းၸပ်းၵၼ် လူတ်းလူင်းသေတႃႉ ၵူၼ်းၸပ်းတၢင်းပဵၼ် မႂ်ႇ ဢူဝ်ႊမီႊၶရွၼ်ႊ သမ်ႉ ၼမ်မႃးၵူႈဝၼ်း ၵူၼ်းၼုမ်ႇ၊ ၵူၼ်းမိူင်း ၵမ်ႈၽွင်ႈမႆႈၸႂ်။
ၵူၼ်းၼုမ်ႇ ၽူႈတူင်ႉၼိုင် ၼႂ်းတူင်ႇဝူင်းတႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် ၵူၼ်းပိုၼ်ႉတီႈႁဝ်းၶႃႈ တီႈၵဵင်းတုင်ၼႆႉ ဢွၼ်ၵၼ် ႁၢင်ႈႁႅၼ်း တႃႇၸတ်းႁဵတ်းပွႆးလၢမ်း ပွႆးၶၢမ်ႇသၢင်ႇ/ၶၢမ်ႇၸၢင်း၊ ပွႆးပၢင်ၶႅၵ်ႇ ၸိူဝ်းၼႆႉ ၵၼ်မႃး တင်းၼမ်ယဝ်ႉ။ ၶႂ်ႈႁႂ်ႈယိူၼ်ႉဝႆႉၵမ်ႉၼိုင်ႈဢေႃႈ ၵူဝ်တၢင်းပဵၼ်ၽႄႈၶိုၼ်း၊ တလဵဝ် ပၢင်ၵိၼ်ၵျေႃႇ လေႃႇၵွၵ်းၵေႃႈ ပတ်ႉယူႇတိၵ်းတိၵ်းယဝ်ႉ”– ဝႃႈၼႆ။
ၼႂ်းၸိုင်ႈတႆးပွတ်းဢွၵ်ႇၶူင်းၼႆႉ ဝဵင်းၵဵင်းတုင် ပဵၼ်ဝဵင်းဢၼ် ၶူဝ်ႊဝိတ်ႉ 19 ပွၵ်ႈၵမ်းသၢမ် ၽႄႈလၢမ်းၼမ်၊ ၵူၼ်းၵေႃႈ လူႉယႂ်ႇတၢႆၼမ်။
ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တၢင်းပဵၼ်ၼႆႉ လူတ်းယွမ်းလူင်း မႃးတင်းၼမ်ယဝ်ႉ။ ၵူၼ်းမိူင်းတႄႉ ၵႂႃႇမႃးၶိုၼ်း မိူၼ်ၵဝ်ႇယဝ်ႉသေတႃႉ ၵူၺ်းၵႃႈ လီမႆႈၸႂ်ယူႇ ၵူဝ်တၢင်းပဵၼ်ၼႆႉ ၽႄႈၶိုၼ်းမႃးထႅင်ႈၵမ်းၼိုင်ႈ။ သင်ပဵၼ်လႆႈတႄႉ ယႃႇယူႇမဝ်မၢင်ၵၼ် ၼႃႇဢႃးလႃး”- ဝႃႈၼႆ။
ဢိင်ၼိူဝ်ၶေႃႈမုၼ်း ၾၢႆႇယူႇလီသေ တႄႇဢဝ် ႁၢင်လိူၼ်ၵျုၼ်ႊ 2021 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 26/1/2022 ၼႆႉ ၼႂ်းၸႄႈဝဵင်းၵဵင်းတုင် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် တင်းမူတ်း 5,690 ၵေႃႉ၊ လူႉတၢႆ 92 ၵေႃႉ၊ ယႃၶႅၼ်း 5,589 ၵေႃႉလႄႈ တိုၵ်ႉယူတ်းယႃ 9 ၵေႃႉ။
