ၶွင်ႇသီႇသိုၵ်းမၢၼ်ႈ ၸၵၸ ဢဝ်လိၵ်ႈပႃႉတိတ်းၸွမ်း ၼႂ်းပွၵ်ႉ/ယွမ်ႇ ၼႂ်းဝဵင်းမူႇၸေႊ ႁႂ်ႈၸဝ်ႈႁၢၼ်ႉ ၵႂႃႇလူင်းလၢႆးမိုဝ်းလိၵ်ႈၵိၼ်ၵႅၼ်ႇဝႃႈ တေ ပိုတ်ႇႁၢၼ်ႉၶၢႆၶူဝ်း ၼႂ်းဝၼ်းတီႈ 1 တေမႃးၼႆႉ ဝႃႈၼႆ။
ၼႂ်းလိၵ်ႈ ၼၼ်ႉတႄႉ တႅမ်ႈဝႆႉဝႃႈ CRPH, NUG ၸုမ်းၵေႃႇၵၢၼ်ႁၢႆႉ တိုၵ်းသူၼ်းၵူၼ်းမိူင်းႁႂ်ႈႁဵတ်းလွင်ႈသုၵ်ႉယုင်ႈ ၊ ႁဵတ်းႁႂ်ႈတုမ်ႉတိူဝ်ႉ လွင်ႈၵတ်းယဵၼ်ဝၢၼ်ႈမိူင်း။ သင်ဝႃႈ ၵူၼ်းမိူင်းႁဵတ်းၸွမ်းၼႆ တေပၼ်တူတ်ႈတၢမ်ႇ ၸွမ်းၼင်ႇမၢႆမီႈၸိုင်ႈမိူင်းမီး ။ သင်ဝႃႈ ၸဝ်ႈႁၢၼ်ႉၶဝ် ႁဵတ်းၸွမ်းၼႄၵၢင်ၸႂ်လူၺ်ႈလၢႆးတဵတ်ႇယဵၼ် ၼႆၸိုင် ၶူဝ်းၶွင်ၸိူဝ်းၼၼ်ႉ တေထုၵ်ႇယိုတ်းပဵၼ် ၶူဝ်းၶွင်ၸိုင်ႈ မိူင်းပႅတ်ႈ တင်းမူတ်း ဝႃႈၼႆ။
ၸဝ်ႈႁၢၼ်ႉမူႇၸေႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢိူဝ်ႈ ၸဝ်ႈႁၢၼ်ႉ လႆႈၵႂႃႇလူင်းလၢႆးမိုဝ်းတီႈႁူဝ်ၵၢတ်ႇ (ၸေးၶွင်းယူင်ႇ) ၵူႈၵေႃႉ ၶႃႈ” – ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၵူၼ်းမိူင်းထုင်ႉမၢဝ်းလၢတ်ႈဝႃႈ လွင်ႈႁဵတ်းသၢင်ႈၵူၼ်းမိူင်း လွင်ႈတူင်ႉၼိုင်တႃႇၸိူဝ်ႉၸၢတ်ႈၼႆႉ ပဵၼ်လွင်ႈလွတ်ႈလႅဝ်းထၢင်ႇႁၢင်ႈလႄႈ လွင်ႈတႅတ်း တတ်းႁင်းတူဝ်ၵဝ်ႇၵူၺ်း ။ ၵွပ်ႈၼၼ် ဢၼ်ႁဵတ်း Silent Strike ၼႆႉၵေႃႈ ယူႇတီႈၵၢင်ၸႂ်ၵူၼ်းမိူင်းသေႁဵတ်းၵူၺ်း ဝႃႈၼႆ။
ၵူၼ်းထုင်ႉမၢဝ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၶႃႈႁဝ်းၶဝ်တႄႉ ႁၼ်လီၸွမ်းဢိူဝ်ႈ ဢၼ်တေႁဵတ်းလွင်ႈတဵတ်ႇယဵၼ်ၼႆႉ။ ႁဝ်းသၢၼ်ၶတ်းၸဝ်ႈဢႃႇၼႃႇၼၼ်ႉၼႃႇ။ ပီႈၼွင်ႉထုင်ႉမၢဝ်းႁဝ်းၶႃႈတင်းသဵင်ႈ တေဢွၼ် ၵၼ်ႁဵတ်းၸွမ်း ယိူင်းဢၢၼ်းႁဝ်း ၶႂ်ႈလႆႈၶႂ်ႈပဵၼ် ဢၼ်ႁဝ်းၶႂ်ႈသၢၼ်ၶတ်းၸဝ်ႈဢႃႇၼႃႇ။ၵွပ်ႈၼႆ ယွၼ်းႁႂ်ႈ လႆႈပဵၼ်ႁွႆးလဵဝ်ၵၼ်သေၵမ်း” – ဝႃႈၼႆ။
