တႄႇဢဝ် ဝၼ်းတီႈ 26/1/2022 ၼႆႉမႃး ၸဵမ်ပလိၵ်ႈမၢၼ်ႈ၊ ၾၢႆႇလိူမ်ႈလႆႇလႄႈ ဢိၵ်ႇလူၺ်ႈ လၢႆႁွင်ႈၵၢၼ် ၼႂ်းလူင်ပွင်ၸိုင်ႈ တႂ်ႈသိုၵ်းမၢၼ်ႈ ၵုမ်းၵမ် သေႃႇ ၸွမ်းပွၵ်ႉ/ ၵိဝ်ႇ၊ ၸွမ်းၵၢတ်ႇ ၵူႈဝဵင်းၼႂ်းၸိုင်ႈတႆး ၸႂ်ႉၵူၼ်းၶၢႆၵၢတ်ႇလႄႈ ၸိူဝ်းပိုတ်ႇႁၢၼ်ႉၸွမ်းႁိူၼ်းယေး ၼႂ်းပွၵ်ႉ / ၵိဝ်ႇ ၶၢင်ႈတၢင်း ၸိူဝ်းၼႆႉ ပိုတ်ႇႁၢၼ်ႉၶၢႆၶူဝ်း ၼႂ်းဝၼ်းတီႈ 1 ၊ ဢၢၼ်းယႃႉၽႅၼ်ၵၢၼ် Silent Strike ၵူၼ်းၼုမ်ႇ ၵူၼ်းမိူင်း ႁႂ်ႈလႆႈ။
ၵူၼ်းၼုမ်ႇလၢင်းၶိူဝ်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ တႄႇမိူဝ်ႈဝႃးမႃး ၶဝ်ၸႂ်ႉၸဝ်ႈၶွင်လၢၼ်ႉ လူင်းလၢႆးမိုဝ်း ယဝ်ႉၵေႃႈ ထႆႇႁၢင်ႈပႃးထႅင်ႈၶႃႈ။ ၶဝ်ဝႃႈ ပေႃးဝၼ်းတီႈ 1 ၼႆႉ ယႃႇပေပိၵ်ႉလၢၼ်ႉၵၼ် ၶဝ်ယွၼ်းတၢင်းႁူမ်ႈမိုဝ်း ၼႆၶႃႈဝႃႇ။ လွင်ႈလွၵ်ႇငိုတ်ႈတႄႉ သင်ဢမ်ႇ ပိုတ်ႇ တေႁဵတ်းၼႆ ႁဵတ်းၼၼ်တႄႉ ၶဝ်ဢမ်ႇဝႃႈၶႃႈ”- ဝႃႈၼႆ။
ၸူဝ်ႈသိုၵ်းမၢၼ်ႈယိုတ်းမိူင်းမႃးၼႂ်းၶၢဝ်းတၢင်း 1 ပီတဵမ်ၼႆႉ ၵူၼ်းမိူင်းပတ်းပိုၼ်ႉ ဢဝ်ၵူႈလွၵ်ႈလၢႆးသေ သၢၼ်ၶတ်းသိုၵ်းမၢၼ်ႈယိုတ်းမိူင်း ။ ဢၼ်ဢဝ်လၢႆးတေတဵတ်ႇယဵၼ်သေ သၢၼ်ၶတ်းသိုၵ်းမၢၼ်ႈၼႆႉ မီး 2 ပွၵ်ႈယဝ်ႉ။ မိူဝ်ႈ 24/3/2021 ပွၵ်ႈၼိုင်ႈ လႄႈ ဝၼ်းတီႈ 10/12/2021 ဝၼ်းသုၼ်ႇလႆႈၵူၼ်းလုမ်ႈၾႃႉၼၼ်ႉပွၵ်ႈၼိုင်ႈ။ လႆႈဝႃႈ မီးလွင်ႈဢွင်ႇမၢၼ် တင်း 2 ပွၵ်ႈ။
ဝၼ်းတီႈ 1/2/2022 ၼႆႉသမ်ႉ ၵူၼ်းၼုမ်ႇသႂ်ႇႁူဝ်ၶေႃႈ ဝႆႉဝႃႈ သႂ်ႇႁႅင်းၽိုတ်ႉပုင်ႈတႃႇၶဝ်ႈတႃႈ (ပြည်တော်၀င်ဖို့ ရုန်းကြစို့) ၼႆသေ တေဢၢၼ်းႁဵတ်း Silent Strike ဢမ်ႇပိုတ်ႇၽၵ်းတူႁိူၼ်းယေးလႄႈ ႁၢၼ်ႉၶၢႆၶူဝ်း ပဵၼ်ပွၵ်ႈၵမ်း 3 ။ တေဢၢၼ်းတႄႇၶၢဝ်းယၢမ်းၵၢင်ၼႂ် 10 မူင်းထိုင် ယၢမ်းဝၢႆးဝၼ်း 4 မူင်း။ ပေႃးထိုင်ဝၢႆးဝၼ်း 4 မူင်း ႁႂ်ႈဢွၼ်ၵၼ်ယူႇၼႂ်းႁိူၼ်းၽႂ်မၼ်းသေ တူပ်းမိုဝ်းၽွမ်ႉၽွမ်ႉၵၼ်တင်းမိူင်း ၊ ၼႄလွင်ႈဢွင်ႇမၢၼ်ႈလႄႈၵူၼ်းမိူင်းတေႃႇၵူၼ်းမိူင်း ပၼ်ႁႅင်းၸႂ်ၵၼ်ဝႃႈၼႆ။
လွင်ႈၼႆႉႁဵတ်းႁႂ်ႈသိုၵ်းမၢၼ်ႈ ယုပ်းၽၢၼ်ႈၵူဝ်ႁႄ တူၵ်းၸႂ် လွင်ႈၽွမ်ႉႁူမ်ႈၵူၼ်းမိူင်းလႄႈ Silent Strike ပွၵ်ႈၵမ်း 3 ၼႆႉ ၸင်ႇဝႃႈ လႆႈတဵၵ်းတဵင်တီႈၵူၼ်းမိူင်းႁၢဝ်ႈႁႅင်း။ တီႈၸႄႈဝဵင်းၵဵင်းတုင်ၸိုင်ႈတႆးပွတ်းဢွၵ်ႇၵေႃႈ ၵူၼ်းၶၢႆၶူဝ်း၊ ၸဝ်ႈၶွင်ႁၢၼ်ႉၼႂ်းၵၢတ်ႇၸိူဝ်းၼႆႉ ထုၵ်ႇလွၵ်ႇငိုတ်ႈ။ သင်ဝႃႈ ဝၼ်းတီႈ 1/2/2022 ၼႆႉ ဢမ်ႇပိုတ်ႇႁၢၼ်ႉသေ တၢင်ႇဝၼ်းသမ်ႉမႃးပိုတ်ႇႁၢၼ်ႉၼႆ တေဢဝ်လိူင်ႈ ၸဝ်ႈၶွင်ႁၢၼ်ႉ ဝႃႈၼႆ။
ၵူၼ်းပိုၼ်ႉတီႈ ၵဵင်းတုင် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တီႈၵဵင်းတုင်ၼႆႉ ၶဝ်ႁႂ်ႈပိုတ်ႇႁၢၼ်ႉၶၢႆ ၵူႈႁၢၼ်ႉၶႃႈ ၸဵမ်ၼႂ်းၵၢတ်ႇ ၸွမ်းတၢင်း ၼွၵ်ႈ ၸွမ်းႁိူၼ်းၸိူဝ်းၼႆႉ။ ဝၼ်းတီႈ 1 ၼၼ်ႉ ဢမ်ႇပိုတ်ႇသေ တၢင်ႇဝၼ်းသမ်ႉမႃးပိုတ်ႇတႄႉ ၶဝ်တေဢဝ်လိူင်ႈၸဝ်ႉႁၢၼ်ႉၼႆဢေႃႈ။ ၸွမ်းၼႂ်းဝဵင်းၼႂ်းၵၢတ်ႇတႄႉ ၶဝ်ႁွင်ႉၵႂႃႇလူင်းလၢႆးမိုဝ်းၵမ်ႈၽွင်ႈယဝ်ႉ။ ဢၼ်သႂ်ႇဢူတ်ႇသေပၢဝ်ႇၼႂ်းဝဵင်းၵေႃႈမီးယူႇတင်းဝၼ်းတင်းဝၼ်းၼႆႉ”- ဝႃႈၼႆ။
ၼႂ်းၸႄႈဝဵင်းတႃႈၶီႈလဵၵ်းၵေႃႈ မိူၼ်ၵၼ် ၸႂ်ႉၸဝ်ႈၶွင်ႁၢၼ်ႉ/ လၢၼ်ႉၶၢႆၶူဝ်း လူင်းလၢႆးမိုဝ်း လိၵ်ႈၵိၼ်ၵႅၼ်ႇပၼ် ၼႂ်းဝၼ်းတီႈ 1 ၼႆႉ ႁႂ်ႈပိုတ်ႇႁၢၼ်ႉၶၢႆၶူဝ်း၊ ႁႂ်ႈလူင်းလၢႆးမိုဝ်းပၼ်ၶေႃႈမၼ်ႈ။ သင်ဝႃႈဢမ်ႇႁဵတ်းၸွမ်းၶေႃႈၸီႉသင်ႇ တေၺႃးတူတ်ႈတၢမ်ႇဝႃႈၼႆသေတႃႉ တေပဵၼ်တူတ်ႈတၢမ်ႇသင် ႁၢႆႉႁႅင်းမွၵ်ႈႁိုဝ်ၼႆတႄႉ ဢမ်ႇဝႃႈပႃး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ