ယၢင်ႈတိၼ်သိုၵ်းမၢၼ်ႈၶၵ်ႉတွၼ်ႈထီႉသွင် ၶိုင်ပွင်လၢႆးလႂ် ပိူဝ်ႈၽႂ်

ၼႂ်းဝူင်ႈဝၢင်ႈၼႆႉ ယူႇတီႈၸၵၸၶွင်ႇသီႇသိုၵ်းမၢၼ်ႈ ႁဵတ်းဢွၵ်ႇမႃး လၢႆးၵၢၼ်ၶဝ်ဢၼ်ၼိုင်ႈ လွင်ႈဝႃႈ တေတိူဝ်းၶႂၢၵ်ႈၸႄႈတွၼ်ႈဢၼ်ႁွင်ႉဝႃႈ (ခရိုင်) ၼၼ်ႉထႅင်ႈ တႃႇ 42 ၼႃႈတီႈၼႆလႄႈ ဢဝ်ပေႃႈမႄႈၵူၼ်းမိူင်း တိုၼ်ႇသၢၼ်ႈၵူၺ်းဢမ်ႇၵႃး မၢင်ၸိူဝ်းၵေႃႈ လၢမ်းၶၢတ်ႈဝႃႈ တေပဵၼ် လွင်ႈႁၢင်ႈႁႅၼ်း ပိူဝ်ႈတႃႇ ပၢင်လိူၵ်ႈတင်ႈ ဢၼ်ၶဝ်တေၸႂ်ႉတိုဝ်းလၢႆး PR ၼၼ်ႉ ႁႂ်ႈပေႃးၼႄႉၼွၼ်းတႃႇၶဝ်ၼႆၵေႃႈ ဢွၼ်လၢမ်းဝႃႈၵၼ်။

ဢၼ်ၼႆႉ မၼ်းၵေႃႈတေၵဵဝ်ႇၵပ်းတင်းၵၢၼ်လိူၵ်ႈတင်ႈယူႇ ၼိုင်ႈပွတ်းၼိုင်ႈတွၼ်ႈ ၵူၺ်းၵႃႈ ပိၵ်ႉသမ်ႉ ပိၼ်ႇလႅၵ်ႈၸိူင်ႉၼၼ်သေတႃႉၵေႃႈ ၸွင်ႇ သမ်ႉ တေမီးၽွၼ်းလီတီႈၽႂ်တႄႉႁႃႉ? ဢၼ်ဝႃႈၼၼ်ႉ ႁဝ်းၶႃႈ ႁႂ်ႈလႆႈမႃးယွၼ်းတေႃႉတႆႇပၢႆးၼႄၵၼ် ပွတ်းဢွၼ်ႇတွၼ်ႈၼိုင်ႈ။

ၼႂ်းပီ 2022 ၼႆႉ တေလႆႈတႄႇယၢင်ႈတိၼ်မႂ်ႇၵႂႃႇ ပုၼ်ႈတႃႇလွင်ႈငမ်းယဵၼ်ၼႆ မိၼ်းဢွင်ႇလႅင်ႇ လၢတ်ႈပႃးၵႂႃႇ ၼႂ်းၶေႃႈၵႂၢမ်းတူင်ႉတၵ်ႉပီမႂ်ႇလုမ်ႈ ၾႃႉၼၼ်ႉ တေဢွၼ်ယၢမ်ႈငိၼ်းၵၼ်ယူႇ။ ယူႇတီႈသေႃႇမိၼ်းထုၼ်း ၽူႈၶၢၼ်ပၢၵ်ႇၶဝ်ၼႆၵေႃႈ သမ်ႉလၢတ်ႈဝႃႈ ဢၼ်ၶဝ်ႁပ်ႉပၢၵ်ႇလပ်ႉလွင်းလႆႈ မီး 5 ၶေႃႈသေ ၼႃႈၵၢၼ်တေႁဵတ်းၵႂႃႇၼႆႉ ပဵၼ် ဢၼ်တေတႄႇယၢင်ႈတိၼ်မႂ်ႇ လွင်ႈငမ်းယဵၼ်ၼႆ မိူၼ်ၵၼ်တင်း ဢၼ်မိၼ်းဢွင်ႇလႅင်ႇ လၢတ်ႈ မႃးၼၼ်ႉ။

ၵဵဝ်ႇလူၺ်ႈလွင်ႈယိုၼ်းမိုဝ်းႁွင်ႉဢုပ်ႇ ၵၢၼ်ငမ်းယဵၼ်ၼႆႉသေယဝ်ႉ ယူႇတီႈၸုမ်းလုၵ်ႉၽိုၼ်ႉမႅၵ်ႇၵွင်ႈၶဝ် ႁၼ်ထိုင်ၵၼ်တႄႉ ၵူၺ်းပဵၼ်လွၵ်ႉလိင်ႉ ၽၢမ်းတႃၵၢၼ်မိူင်းပိူင်ၼိုင်ႈၵူၺ်း။ ၸွမ်းၼင်ႇၶဝ် ယၢမ်ႈၸႂ်ႉတိုဝ်းလၢႆးတၢင်းၸႅၵ်ႇယႅၵ်ႈၽွင်းငမ်း Divide and Rule ၼၼ်ႉသေယဝ်ႉ။ ၶႂ်ႈ ႁႂ်ႈၸုမ်း ၸၢဝ်းၶိူဝ်းလုၵ်ႉၽိုၼ်ႉလႄႈ ၵူၼ်းမိူင်းမၢၼ်ႈထုင်ႉပဵင်းၶဝ် ၸတ်ႉငၢၵ်ႈၵၼ်ၼၼ်ႉၵူၺ်း ယၢမ်းမိူဝ်ႈၶဝ် လူဝ်ႇၵိုတ်းတိုၵ်းယဵပ်ႇယမ်ႈတေႃႇ ၸုမ်း PDF ဢိၵ်ႇလူၺ်ႈပႃးတင်းၾၢႆႇ NUG ၶဝ်ၼၼ်ႉ။ ၼင်ႇႁိုဝ် ၸိူဝ်းၸၢဝ်းၶိူဝ်း တေဢွၼ်ၵၼ်ယဵၼ်ယဵၼ်ဝႆႉၼၼ်ႉ ၸင်ႇတၵ်းဢဝ်လွင်ႈၵၢၼ် ငမ်းယဵၼ် ႁဵတ်းယိူဝ်ႇဝဵတ်းသႂ်ႇပႅတ်ႈ….. မႃးၵူၺ်းၼႆ ဢွၼ်လၢမ်းၶၢတ်ႈၸိူင်ႉၼၼ်။ ပွင်ႇဝႃႈ ၸုမ်းၸၢဝ်းၶိူဝ်းမႅၵ်ႇၵွင်ႈၸိူဝ်းၼႆႉ ၽႂ်ၵေႃႈဢမ်ႇပေႃး သူၼ်ၸႂ် ။

ၼင်ႇႁဝ်းၶႃႈ ယၢမ်ႈပၢႆးၼႄၵၼ်မႃးၼၼ်ႉယဝ်ႉၸၵၸၶွင်ႇသီႇသိုၵ်းမၢၼ်ႈၼႆႉ တိုၼ်းဢမ်ႇမီးၸႂ်ၽႂ်ႇၶႂ်ႈ တေႁဵတ်းႁႂ်ႈၸိုင်ႈမိူင်းၵတ်းယဵၼ် ၶိုၼ်ႈယႂ်ႇၽဵင်ႇပဵင်းၵၼ် မိူဝ်ႈၼၼ်ႉတေႃႇမိူဝ်ႈလဵဝ် ၶဝ်ၵူၺ်း ၶိုင်ဢၢင်ႈ ပိူဝ်ႈတႃႇသၢင်ႈဢႃႇၼႃႇသိုၵ်းၶဝ် သုမ်ႇငုမ်းတေႃႇၵူၼ်းမိူင်းသေယဝ်ႉ ႁဵတ်းႁႂ်ႈဝႃႇတႃႇၸိူဝ်ႉၶိူဝ်းမၢၼ်ႈ ပဵၼ်ယႂ်ႇၼၼ်ႉ တဵင်ၼၵ်းၸွတ်ႇ ၽႄႈၵႂႃႇၵူၺ်းၼႆ ႁဝ်းၶႃႈၵေႃႈယၢမ်ႈဝႃႈမႃးယူႇ။

ၽွင်းယၢမ်းမိူဝ်ႈလဵဝ် ပဵၼ်သိုၵ်းပဵၼ်သိူဝ် ပိုတ်းယိုဝ်းတိုၵ်းတေႃးၵၼ်ယူႇ ပေႃးၶႂ်ႈၸွတ်ႈတူဝ်ႈၸိုင်ႈမိူင်း ပဵၼ်ၽိုၼ်းပဵၼ်ၾႆးယူႇၵူႈမိုဝ်ႉၵူႈယၢမ်း ၵူၼ်းမိူင်းၽၵ်းၵႃႇ ၼပ်ႉဢၢၼ်ႇသႅၼ်လႆႈပၢႆႈ ၽၢတ်ႇႁိူၼ်းယေး မၢၼ်ႈသူၼ်ၽႂ်မၼ်း ပိုၼ်ႉတီႈယူႇၵဝ်ႇၽႂ်မၼ်း ဢမ်ႇၶၢတ်ႇဢမ်ႇဝၢႆး ၸိူင်ႉၼင်ႇၼႆႉ တေမီးၸုမ်းၸၢဝ်းၶိူဝ်းဢၼ်လႂ် ႁပ်ႉယုမ်ႇၶဝ် ဢၼ်ဝႃႈၼၼ်ႉ ႁဝ်းၶႃႈၵေႃႈလီဢၢမ်းၸွမ်းယူႇ။ ႁဝ်းၶႃႈ ႁၼ်ထိုင်ဝႃႈတႄႉ တိုၼ်းတေဢမ်ႇမီးလႆႈ။ ပိူဝ်ႈတႃႇ တေၵႂႃႇႁူမ်ႈမိုဝ်းၶဝ်သေ ႁဵတ်းၵၢၼ်ငမ်းယဵၼ် ၸွမ်းၼႂ်းၶၢဝ်းၶိဝ်းၼႆႉ။

ၵမ်းၼႆႉ တမ်ၼင်ႇၽူႈၶၢၼ်ပၢၵ်ႇၾၢႆႇၸၵၸၶဝ်ဝႃႈတႄႉ ဢၼ်ၶဝ်ႁပ်ႉပၢၵ်ႇ ဢၼ်ၶဝ်ႁပ်ႉႁွင်းလႆႈ တေမီးယူႇ 5 လွင်ႈ – မိူၼ်ၼင်ႇ 1) တေၸတ်း ႁဵတ်းပၢင်လိူၵ်ႈတင်ႈ ဢၼ်လွတ်ႈလႅဝ်းလႄႈပဵၼ်ထမ်း။ 2) တေသၢင်ႈလွၵ်းပိူင် မိူင်းႁူမ်ႈတုမ် ဢၼ်ႁပ်ႉႁွင်းပၼ်လႆႈ ၻီႊမူဝ်ႊၶရေႊသီႊလႄႈ ၾႅတ်ႊၻရႄႊ။ 3) တေၸႂ်ႉတိုဝ်း ပိူင်လိူၵ်ႈတင်ႈလၢႆး PR ။ 4) တေမႄးပၼ် မတ်ႉတႃ 261 ၸွမ်ၽွင်းၸႄႈမိူင်း ဢမ်ႇၼၼ်ၵေႃႈ တိူင်းၼႆႉ တေ ပွႆႇႁႂ်ႈသၽႃး ၸႄႈမိူင်းႁိုဝ် တိူင်းၽႂ်မၼ်းလိူၵ်ႈတၢင်ႇဢဝ်။ 5) တေၽိူမ်ႉထႅမ်ပၼ်ထႅင်ႈ သုၼ်ႇလႆႈၸႄႈမိူင်းၶဝ် ႁႂ်ႈတိူဝ်းလိူဝ်ၵဝ်ႇမႃး ဢၼ်ႁွင်ႉဝႃႈ (ဇယား ၂ – ဇယား ၅) ၼၼ်ႉ ၶဝ်တေတိူဝ်း ၽိူမ်ႉပၼ်ထႅင်ႈႁႂ်ႈမၼ်းၵႂၢင်ႈၶႂၢင်ၼမ်လိူဝ်တိူဝ်းမႃးၼႆႉ တေမီးယူႇ 5 ၶေႃႈၼၼ်ႉ။

ၵမ်းၼႆႉ ပေႃးမႃးသၢင်ႈထတ်းထွင်တူၺ်း ၵမ်းၶေႃႈၶေႃႈၼႆၸိုင် ၶေႃႈထီႉ (1) ဢၼ်ဝႃႈ တေၸတ်းႁဵတ်း ပၢင်လိူၵ်ႈတင်ႈၼၼ်ႉ ဢမ်ႇၸႂ်ႈတႃႇဢူၼ်း ဢၢပ်ႈဢႃႇၼႃႇတီႈလူင်ပွင်ၸိုင်ႈၵူၼ်းမိူင်း။ တာမ်တူဝ်ႁူဝ်ၼႃႈတပ်ႉသိုၵ်းၶဝ် တေထွၵ်ႇၶူဝ်းသိုၵ်း ပိၼ်ႇၶူဝ်းၵူၼ်းႁိူၼ်းသေ သိုပ်ႇဝၵ်ႉၵမ် ဢႃႇၼႃႇ ၸိုင်ႈမိူင်းၵႂႃႇၵူၺ်း။

ၸွမ်းၼင်ႇလၵ်းမိူင်း 2008 ပူင်ပၢႆးတမ်းမီးဝႆႉၸိုင် ယူႇတီႈၸုမ်းသိုၵ်းယိုတ်းဢႃႇၼႃႇၼႆႉ မီးသုၼ်ႇပွင်မိူင်းၼိုင်ႈၶူပ်ႇပီၵူၺ်း။ လၢင်းလၢင်းဝႃႈ ဝၢၼ်ႈမိူင်းၼႆႉ ပႆႇၼိမ်တဵင်ႈၼႆၵေႃႈ သိုပ်ႇပွင်ၵႂႃႇလႆႈထႅင်ႈ သိုပ်ႇတေႃႇၵႂႃႇလႆႈထႅင်ႈ ၼိုင်ႈၵမ်း ႁူၵ်းလိူၼ် တႃႇသွင်ၵမ်းၵူၺ်း ႁူမ်ႈၵၼ်ၵေႃႈ တေ မီးယူႇသွင်ပီ။

ၵွပ်ႈပိူဝ်ႈၸိူင်ႉၼႆလႄႈ ပေႃးမႃးႁုပ်ႈၵေႃႈ ၸုမ်းသိုၵ်းမၢၼ်ႈၼႆႉ မီးသုၼ်ႇယိပ်းမိူင်းတႃႇသွင်ပီၵူၺ်း လႄႈ ပေႃးဝႃႈလိူဝ်သေၼၼ်ႉၵႂႃႇ တေလႆႈ ဢူၼ်းဢၢပ်ႈဢႃႇၼႃႇၶိုၼ်းတီႈ ၵႃႇလူင်ႇ( ကာ/လုံ) ဢၼ်ႁွင်ႉဝႃႈ ၶွင်ႇသီႇၵႅတ်ႇၶႄ လွင်ႈႁူမ်ႇလူမ်ႈၸိုင်ႈမိူင်းၼၼ်ႉ။

ယူႇတီႈၶွင်ႇသီႇၵႃႇလူင်ႇၼၼ်ႉသမ်ႉ ၸင်ႇၶိုၼ်းတႅင်ႈတင်ႈပၵ်းပိူင်ၸိုင်ႈမိူင်းသေယဝ်ႉ ၶိုၼ်းႁဵတ်းပၼ် ပၢင်လိူၵ်ႈတင်ႈ ၸိူင်ႉၼင်ႇၼႆသေ ၸင်ႇတေ ငၢမ်ႈမႅၼ်ႈၸွမ်းလၵ်းမိူင်း 2008 ဢၼ်ၶဝ်ဢိင်ဢၢင်ႈလႄႈ ၵႃႈလႆႈႁဵတ်းယဝ်ႉ။

ၵူၺ်းၵႃႈ တီႈဝႃႈ ၵႃႇလူင်ႇၼၼ်ႉပဵၼ်ၽႂ် မိူဝ်ႈဢၼ်ယိုတ်းသိမ်းဢႃႇၼႃႇ ဢူၼ်းဢၢပ်ႈပၼ်ၶဝ် တေလႆႈပဵၼ်ၵႅမ်ၸွမ်ၸိုင်ႈ ဢမ်ႇၼၼ်ၵေႃႈ ၸွမ် ၸိုင်ႈၸူဝ်ႈၶၢဝ်းဢူးမိၼ်ႉသူၺ်ႇၼၼ်ႉၵူၺ်း ၼၼ်ႉၵေႃႈ တိုၵ်ႉမီးယူႇၼႂ်းမိုဝ်းၶဝ်။

ၸင်ႇၼၼ် ပၢင်လိူၵ်ႈတင်ႈ ဢၼ်ၸုမ်းသိုၵ်းတေႁဵတ်းပၼ်လူၺ်ႈလၢႆး PR ၼႆႉ ဢမ်ႇၸႂ်ႈတႃႇမႄးမိူင်း ပဵၼ်တႃႇ ဢဝ်ဢႃႇၼႃႇဢၼ်မီးၼႂ်းမိုဝ်းၶွၼ်ၶႂႃ ၶိုၼ်းပိၼ်ႇ သႂ်ႇပၼ်ၼႂ်းမိုဝ်းၶွၼ်သၢႆႉ ၶွင်ၵူၼ်းၵေႃႉလဵဝ်ၵူၺ်း ႁဝ်းၶႃႈတႄႉ ထတ်းႁၼ်ၸိူင်ႉၼၼ်။

တီႈၼႆႈ လီလႆႈၶႂ်ႈၸႂ်ၶိုၼ်းဝႃႈ မိူင်းယုင်ႈယၢင်ႈဢူၼ်ဢုင်းမိူၼ်ၼႆ ၸွင်ႇၶဝ်တေႁဵတ်းပဵၼ်လႆႈ ပၢင်လိူၵ်ႈတင်ႈယူႇႁႃႉ? ဝၢႆးလင်ယိုတ်းသိမ်း ဢႃႇ ၼႃႇယဝ်ႉၼႆႉ။ ပေႃးတဵမ်ယဝ်ႉ သွင်ပီၾၢႆႇပုၼ်ႉ တႃႇၶဝ်တေဝၵ်းငမ်ဢႃႇၼႃႇၵႂႃႇလႆႈၼၼ်ႉ ႁႂ်ႈပဵၼ်တၢင်းၵၢၼ်ဢၼ်ဝႃႈၼၼ်ႉတႄႉ။ ၼွၵ်ႈလိူဝ် ၸတ်း ႁဵတ်း ပၢင်လိူၵ်ႈတင်ႈ ဢမ်ႇမီးတင်းလိူၵ်ႈမၼ်းယဝ်ႉ။

ၵွပ်ႈၼႆ ၵႃႈဢမ်ႇပဵၼ်ဢမ်ႇၸူး ၶဝ်တၵ်းတေႁဵတ်းယူႇ ပေႃးမႃးတူၺ်းပီ 2008 ပူၼ်ႉမႃးၼႆ လူမ်းလႅင်ႉလူင် ၼႃႊၵိတ်ႉၺ် ပတ်ႉပဝ်ႇလူၵ်ႈထူမ်ႈႁဵတ်း ႁႂ်ႈၵူၼ်းလူႉတၢႆ ၼပ်ႇဢၢၼ်ႇသႅၼ်မၼ်း တေႃႈၼၼ်ႉၵေႃႈ ၶဝ်ယင်းလမ်တမ်ႁဵတ်းပၢင်ယၢၼ်ႇၵၢင်ၸႂ်ၵူၼ်းမိူင်းသေယဝ်ႉ တဵၵ်းမၵ်းမၼ်ႈ လၵ်းမိူင်း 2008 ႁႂ်ႈပဵၼ်တၢင်းၵၢၼ်မႃး။ ပွင်ႇဝႃႈ ၶဝ်ဢမ်ႇတူၺ်းတေႃႇၵူၼ်းမိူင်း ၶဝ်ဢမ်ႇတူၺ်းတေႃႇ ၼႃႈတႃသရေႇၸိုင်ႈမိူင်း ၶဝ်ၵူၺ်း တူၺ်းပိူဝ်ႈတႃႇဢႃႇၼႃႇၶဝ် တေမၼ်ႈၵိုမ်းၼၼ်ႉၵူၺ်း။

ၼင်ႇငဝ်းလၢႆးယၢမ်းလဵဝ် တႃႇၶဝ်တေဢမ်ႇႁတ်းႁဵတ်း ဢမ်ႇမီး ပေႃးပဵၼ်ပိူဝ်ႈတႃႇဢႃႇၼႃႇၶဝ် တေမၼ်ႈၵိုမ်းၼႆႉ ၶဝ်တိုၼ်းတေတိုဝ်ႁဵတ်းၼႆ ႁဝ်းၶႃႈတႄႉ ထတ်းႁၼ်ၸိူင်ႉၼၼ်။

ပေႃးၼႆ ၸွမ်းၼင်ႇၶေႃႈထီႉ (2) ဢၼ်ဝႃႈ တေသၢင်ႈလွၵ်းပိူင်ၻီႊမူဝ်ႊၶရေႊသီႊလႄႈ ၾႅတ်ႊၻရႄႊၼၼ်ႉ ၸွင်ႇတေပဵၼ်မႃးႁိုဝ်၊ ၸွင်ႇတေ ပဵၼ်လႆႈတႄႉၼႄႇၼႆ ၼၼ်ႉတႄႉ ဢမ်ႇတပ်ႈပၢႆးၼႄၵၼ် ဢမ်ႇတပ်ႈထၢမ်ၵၼ်ၵေႃႈ မီးၶေႃႈတွပ်ႇမၼ်း ႁၼ်ၸႅင်ႈယူႇၵူႈၵေႃႉ။

သုတ်ႉတီႈတပ်ႉသိုၵ်းမၢၼ်ႈတေယူႇၼႂ်း 2008 သေ ၽွင်းငမ်း ယင်းဢမ်ႇၸႂ်ႈပၢင်လိူၵ်ႈတင်ႈတႃႇၵိူတ်ႇမီးမႃး လူင်ပွင်ၸိုင်ႈၵူၼ်းမိူင်း ယူႇတႂ်ႈၽႃႇ တိၼ်သွၵ်းသေ တေႁဵတ်းႁိုဝ်မီးလႆႈၻီႊမူဝ်ႊၶရေႊသီႊ။ ယူႇတီႈတႂ်ႈ 2008 သေ တေႁဵတ်းႁိုဝ်တင်ႈလႆႈ မိူင်းၾႅတ်ႊၻရႄႊ။ ၼႆႉတႄႉ တႄႇဢဝ် မိူဝ်ႈပီ 2010 တေႃႇထိုင် 2020 ၶၢဝ်းတၢင်း 10 ပီ။ ၵွပ်ႈပိူဝ်ႈတပ်ႉသိုၵ်း ငမ်ဝၵ်ႉဝႆႉဢႃႇၼႃႇၸိုင်ႈမိူင်း 25% လႄႈ ယင်းဢမ်ႇႁဵတ်းပဵၼ်မႃးလႆႈ ၸမ်းႁႂ်ႈဝႃႈ တပ်ႉသိုၵ်းၼႆႉ ယိပ်းၵမ်လႆႈဢႃႇၼႃႇၸိုင်ႈမိူင်း 100 % ယဝ်ႉၼႆၸိုင် တေႁဵတ်းႁိုဝ်မီးၻီႊမူဝ်ႊၶရေႊသီႊ၊ တေႁဵတ်းႁိုဝ်ပဵၼ်မႃး ၾႅတ်ႊၻရႄႊ ၼႆႉတႄႉ ဢမ်ႇတပ်ႈထၢမ်ၵၼ် ၼင်ႇဝႃႈမႃးမိူဝ်ႈၵႆႈၼၼ်ႉယဝ်ႉ။

ၸင်ႇဝႃႈ သူပ်းၶဝ်ၶႂ်ႈလၢတ်ႈၸိူင်ႉႁိုဝ်ၵေႃႈလီ၊ ပၢၵ်ႇၶဝ်ၶႂ်ႈတူင်ႉၸိူင်ႉႁိုဝ်ၵေႃႈယဝ်ႉ ဢၼ်ဝႃႈတေပဵၼ်မႃးမိူင်းၾႅတ်ႊၻရႄႊ လႄႈ ၻီႊမူဝ်ႊၶရေႊ သီႊဢၼ်ဝႃႈၼၼ်ႉတႄႉ ၵႆသေၵႆယဝ်ႉ ႁဝ်းၶႃႈတႄႉ လၢမ်းႁၼ်ၸိူင်ႉၼၼ်။

ၵွပ်ႈပိူဝ်ႈၸိူင်ႉၼႆ တေၸႂ်ႉပိူင်လိူၵ်ႈတင်ႈလၢႆး PR ဝႃႇ၊ တေမူၼ်ႉမႄးပၼ် မတ်ႉတႃ 261 ဝႃႇ၊ တေၽိူမ်ႉပၼ် သုၼ်ႇၸတ်းပွင်ၸႄႈမိူင်းဝႃႇ၊ တေ တိူဝ်းၶႂၢၵ်ႈထႅင်ႈၸႄႈတွၼ်ႈ (ခရိုင်) ထႅင်ႈ 42 ဢၼ်ဝႃႇ ၸိူဝ်းၼၼ်ႉၵေႃႈ ၵူၺ်းပဵၼ်ၼွၵ်ႈလႅၵ်ႈၶွင်ထႅမ် လၵ်းမိူင်း 2008 ၵူၺ်းလႄႈ ၵႃႈၸူဝ်ႈ တပ်ႉသိုၵ်း တိုၵ်ႉငမ်းမိူင်းယူႇတႄႉ ၸိုင်ႈမိူင်းၾႅတ်ႊၻရေႊတီႊမူဝ်ႊၶရေႊသီႊဢၼ်ဝႃႈၼၼ်ႉ တိုၼ်းဢမ်ႇၸၢင်ႈမုင်ႈမွင်း။ ၼင်ႇႁိုဝ် မိူင်းႁူမ်ႈတုမ် ပေႃးတေဢမ်ႇတႅၵ်ႈငၢၵ်ႈၸတ်ႉယွႆႈၼၼ်ႉၵူၺ်းၵေႃႈ ယင်းတေလႆႈၵၼ်ႉၵူၵ်ႉၶတ်းၸႂ် ၵုမ်းထိင်းႁဵတ်းတႄႉယူႇဢၼ်ဝႃႈၼၼ်ႉ ယွၼ်းပၢႆးၼႄၵၼ် မွၵ်ႈၼႆႉသေ ႁႂ်ႈလႆႈၶွတ်ႇယွတ်ႈပၢႆၵႂၢမ်းဝႆႉ တီႈၼႆႈၶႃႈ။

မႂ်ႇသုင်ၶႃႈ

 ႁိုၼ်း ၵႃယၢင်း

24/1/2022