သိုၵ်းမၢၼ်ႈတႄႇၵူတ်ႇထတ်း မိုဝ်းထိုဝ်ၵူၼ်းမိူင်း တီႈတၢင်းၶဝ်ႈဝဵင်းတူၼ်ႈတီး သွၵ်ႈႁႃ VPN ၊ ပေႃးႁၼ်ၸႂ်ႉဝႆႉယိုတ်း မိုဝ်းထိုဝ် ၵူၼ်းတႄႉပွႆႇပၼ်ၵႂႃႇယူႇ ဝႃႈၼႆ ။
ဝၼ်းတီႈ 26/1/2022 တင်ႈဢဝ်ယၢမ်းဝၢႆးဝၼ်းၵႂႃႇ သိုၵ်းမၢၼ်ႈ လႄႈပျီႇတူႉၸိတ်ႉပဢူဝ်းပႂ်ႉတီႈၵဵတ်ႉ/လၢၼ်ႇ 4 လၵ်း တၢင်းၶဝ်ႈဝဵင်းတူၼ်ႈတီးသေ ၵူတ်ႇထတ်းၵူၼ်းမိူင်းၸိူဝ်းၵႂႃႇမႃး။ သင်ဝႃႈ ထူပ်းႁၼ်ၵူၼ်းၸိူဝ်းၸႂ်ႉၾဵတ်ႉသ်ပုၵ်ႉ (Social Media) ဢၼ် ၵွင်ႉ VPN (Virtual Private Network) ဝႆႉၼၼ်ႉ ယိုတ်းဝႆႉၾူၼ်း သေ ၵူၼ်းတႄႉပွႆႇၵႂႃႇယူႇ – ၵူၼ်းတူၼ်ႈတီးလၢတ်ႈ။
“ၼႂ်းဝူင်ႈဝၢင်ႈၼႆႉ ၶဝ်ၵႂႃႇပႂ်ႉထတ်းပဵၼ်တီႈပဵၼ်တီႈဢေႃႈ။ ၼႂ်းဝဵင်းၸိူဝ်းၼႆႉၵေႃႈ ၵႆႉလႄႇႁၼ်ၶဝ်ဢေႃႈ။ၶႃႈၵေႃႈယင်းၺႃးၵူတ်ႇထတ်းယူႇဢေႃႈ။ ၽူတ်ႉသ်ႉဢၼ်တၢင်ႇဝႆႉၼၼ်ႉ ၶႃႈပေႃးလႆႈမွတ်ႇပႅတ်ႈမူတ်းမူတ်းဢေႃႈ ” ၵူၼ်းၼုမ်ႇဢၼ်ၺႃးသိုၵ်းမၢၼ်ႈၵူတ်ႇထတ်းမိုဝ်းထိုဝ်ၼၼ်ႉလၢတ်ႈၽူႈတွႆႇႁွၵ်ႈၼင်ႇၼႆ။
ဝၼ်းတီႈ 13/1/2022 ပူၼ်ႉမႃးၼႆႉၵေႃႈ ၽွင်းလူင်ၾၢႆႇၵပ်းသိုပ်ႇသိုဝ်ႇသၢၼ် ၶွင်ၶွင်ႇသီႇသိုၵ်းမၢၼ်ႈ ဢူးၸူဝ်းတဵင်း ပိုၼ်ၽၢဝ်ႇဝႃႈ ၽႂ်ၸႂ်ႉ VPN တေၺႃးတၢမ်ႇၶွၵ်ႇ 3 ပီလႄႈ တၢမ်ႇငိုၼ်း 50 သႅၼ်ပျႃး ဝႃႈၼႆ။
ၵူၼ်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ မႆႈၸႂ်ၶႃႈဢေႃႈ ပေႃးဢမ်ႇလႆႈၸႂ်ႉVPN တႄႉ ၶေႃႈမုလ်းႁဝ်းၶႃႈၼႆႉ တေၵႂႃႇၽႅဝ် တီႈၶဝ်မူတ်းယဝ်ႉ ။ ၽိူဝ်ႇတေၸႂ်ႉ သိမ်းၾူၼ်း Mytel တႄႉ ႁဝ်းၶႃႈတႄႉ ဢမ်ႇၸႂ်ႉၾဵတ်ႉသ်ပုၵ်ႉသေယဝ်ႉၶႃႈဝႃႈ ။ တေၸႂ်ႉ WeChat လႄႈ Email ၵႂႃႇၵူၺ်းယဝ်ႉၶႃႈဢေႃႈ ”- ဝႃႈၼႆ။
ဝၢႆးသေ သိုၵ်းမၢၼ်ႈ ယိုတ်းမိူင်းမႃးၼႆႉ ၶဝ်တတ်းၼႅင်ႈသၢၼ် ဢိၼ်ႊတိူဝ်ႊၼႅတ်ႉ၊ တတ်းသၢႆၾူၼ်း တတ်းသၢႆၵပ်းသိုပ်ႇတိတ်းတေႃႇၵၼ်၊ ပိၵ်ႉႁူပိၵ်ႉတႃၵူၼ်းမိူင်းမႃး ဢမ်ႇထၢတ်ႇ။ ၵူၺ်းၵႃႈ ၵူၼ်းၼုမ်ႇ ၵူၼ်းမိူင်း ၵၢပ်ႈပၢၼ်မႂ်ႇဝၼ်းမိူဝ်ႈၼႆႉ ႁူႉလွၵ်းလၢႆးၵၢၼ်ၸႂ်ႉတိုဝ်းပၢႆး Technology ။ Sim ၾူၼ်း MPT, Telenor, Oreedoo ၸိူဝ်းၼႆႉ လႆႈဢဝ် VPN ၵွင်ႉသေၸႂ်ႉ Facebook ၼင်ႇႁိုဝ်သိုၵ်းမၢၼ်ႈတေဢမ်ႇၸၢင်ႈပႂ်ႉတီႉ/ၵဵပ်းၶေႃႈမုလ်း ၶၢဝ်ႇငၢဝ်းလႆႈ။ ၵူၺ်းၵႃႈ ပေႃးပဵၼ် Sim Mytel ၶွင်သိုၵ်းမၢၼ်ႈတႄႉ ဢမ်ႇတၢပ်ႈလူဝ်ႇၵွင်ႉၵၼ်တင်း VPN ၵေႃႈ ၸႂ်ႉ Facebook ဢိၵ်ႇပႃး App တၢင်ႇဢၼ်လႆႈ ၼႆယဝ်ႉ။
“သင်ဝႃႈ ၸႂ်ႉ Sim Mytel ၼႆႉ လႅင်းၵေႃႈလီ၊ ၵႃႈၼႅတ်ႊ Data ၵေႃႈ ဢမ်ႇၵႃႈ။ ၵူၺ်းၶဝ်ႁူႉလႆႈၶေႃႈမုလ်း ဢၼ်ႁဝ်းဢုပ်ႇၵၼ်၊ ဢၼ်ႁဝ်းတၢင်ႇသင်ၸိူဝ်းၼႆႉ။ ပေႃးၸႂ်ႉ Sim တၢင်ႇဢၼ်သမ်ႉ လႆႈၸၢႆႇၵႃႈၵူႈမဵဝ်း ၸဵမ်ၵႃႈထူဝ်း ၸဵမ်ၵႃႈ ၼႅတ်ႊၸိူဝ်းၼႆႉ။ ဢိူဝ်ႈ – ပေႃး ၶဝ်ဢမ်ႇႁဵတ်းၸိူင်ႉၼႆၵေႃႈ ၶဝ်ဢမ်ႇမီးငိုၼ်းၶဝ်ႈယဝ်ႉလူးၼေႃႈ ။ ၵႃႈလႆႈတဵၵ်းတဵင်ငိတ်ႈၵိၼ်ၵူၼ်းမိူင်းတိၵ်းတိၵ်းယဝ်ႉဢိူဝ်ႈ ”- ၵူၼ်းပိုၼ်ႉတီႈ တူၼ်ႈတီး ၵေႃႉၼိုင်ႈလၢတ်ႈ။
မၢႆၾူၼ်း Mytel ၼႆႉ ပဵၼ်ၶွင် လုၵ်ႈၸၢႆး ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇလႄႈ ၵူၼ်းမိူင်း သၢၼ်ၶတ်းလူၺ်ႈလၢႆးဢမ်ႇသိုဝ်ႉၸႂ်ႉတိုဝ်း။ ၵူၼ်းၼုမ်ႇၸုမ်းယိပ်းၵွင်ႈၵၢင်ႇၶဝ်ၵေႃႈ ၸွမ်းပွႆႇမၢၵ်ႇ ယႃႉၵူၼ်ႇပႅတ်ႈ သဝ်လၵ်းၾူၼ်း Mytel ၵူႈတီႈ ၵူႈဝဵင်း ၊ ၼႄလွင်ႈသၢၼ်ၶတ်း ၸုမ်းသိုၵ်းမၢၼ်ႈ ဢၼ်ဢဝ်လၢႆးႁုၵ်ႉႁၢႆႉၶႃႈႁႅမ်ၵူၼ်းမိူင်း။