မိူဝ်ႈၼႆႉ ဝၼ်းတီႈ 26/1/2022 ယၢမ်းၵၢင်ၼႂ် ၶွင်ႇသီႇသိုၵ်းမၢၼ်ႈ ယိုတ်းမိူင်း ဢဝ် ႁႅင်းၵူၼ်း/ ႁႅင်းၵႃးတင်းၼမ်သေ ပၼ်ႇဢႅဝ်ႇၸွမ်း ၼႂ်း ဝဵင်းတႃႈၶီႈလဵၵ်း ၼႄဢဵၼ်ႁႅင်းလွၵ်ႇငိုတ်ႈ ၵူၼ်းမိူင်း ဝႃႈၼႆ။
ၵူၼ်း တႃႈၶီႈလဵၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ လႆႈႁၼ်ၵႃးသိုၵ်းမၢၼ်ႈ ပလိၵ်ႈမၢၼ်ႈ ၸိူဝ်းၼႆႉ ၶီႇၵႃးပလိၵ်ႈ ၵႃးသိုၵ်း ၵႃးထွင်ႇသေၵႂႃႇမႃးၼႂ်းဝဵင်းယူႇတၢင်းဝၼ်းၶႃႈ။ ”- ဝႃႈၼႆ။
ဝၢႆးလင်ၶၢဝ်ႇလိုဝ်းၽႄႈၼိူဝ်ဢွၼ်ႊလၢႆႊဝႃႈ ဝၼ်းတီႈ 1/2/2022 ၵူၼ်းမိူင်းပတ်းပိုၼ်ႉတေၼႄၵၢင်ၸႂ်လူၺ်ႈလၢႆး Silent Strike ၼႆၼၼ်ႉ သိုၵ်းမၢၼ်ႈၼႅတ်ႈၼႄႁႅင်း လွၵ်ႇငိုတ်ႈၵူၼ်းမိူင်းဝႆႉ ၼင်ႇႁိုဝ်ပၢင်ၼႄၵၢင်ၸႂ်ၵမ်းၼႆႉတေဢမ်ႇပဵၼ်မႃး – ၵူၼ်းတႃႈၶီႈလဵၵ်းလၢတ်ႈ။
“ပေႃးထိုင်မႃးဝၼ်းတီႈ 1 ၼႆႉ ၼင်ႇႁိုဝ် ၵူၼ်းမိူင်းပေႃးတေဢမ်ႇႁတ်းၼႄၵၢင်ၸႂ် Silent Strike ၸွမ်းပိူၼ်ႈၵူၺ်း။ ယဝ်ႉၵေႃႈ လႆႈႁၼ်ၾၢႆႇၶဝ်ပိုၼ်ၽႄႈၶိုၼ်း ၼိူဝ်လႅင်း Internet ဝႃႈ သင်ၽူႈလႂ်ၽႂ်ၶဝ်ႈႁူမ်ႈ Silent Strike ဝၼ်းၼၼ်ႉၸိုင် တေတီႉၺွပ်းပၼ်တူတ်ႈတၢမ်ႇ ၼႆဝႃႇ။ ၼင်ႇႁိုဝ်ၵူၼ်းမိူင်း ပေႃးတေဢမ်ႇႁတ်းႁဵတ်းၼၼ်ႉၵူၺ်းၶႃႈ”- ဝႃႈၼႆ။
ၼႂ်းၸႄႈဝဵင်းတႃႈၶီႈလဵၵ်းၼႆႉ ဝၢႆးလင်မၢၵ်ႇတႅၵ်ႇ ထပ်းၵၼ်မႃးၶိူဝ်းယႂ်းၼၼ်ႉ သိုၵ်းမၢၼ်ႈ ၶီႇၵႃးပၼ်ႇလဵပ်ႈဝဵင်းၵူႈဝၼ်း။ၵူတ်ႇထတ်းၵူၼ်းမိူင်းၵႂႃႇမႃးသေ ထဵတ်ႈထၢမ်ႁိုတ်းႁၢတ်ႇလွၵ်ႇငိုတ်ႈၵူႈဝၼ်း။ ၵူၺ်းၵႃႈၼႂ်းဝၼ်းသွင်ဝၼ်းၼႆႉ ယိင်ႈၶႅၼ်းထႅမ်ႁႅင်းသိုၵ်းၶဝ်ၼမ်လိူဝ်ၵဝ်ႇ၊ ႁဵတ်းႁႂ်ႈၵူၼ်းမိူင်းၵႂႃႇမႃးႁႃၵိၼ်လဵင်ႉတွင်ႉယၢပ်ႇ ၵူၼ်းမိူင်းလၢတ်ႈၼင်ႇၼႆ။