ၼႂ်းဝၼ်းတီႈ 1/2/2022 ဝၼ်းဢၢင်းၵၢၼ်းတေမႃးၼႆႉ ၵူၼ်းမိူင်းႁူမ်ႈတုမ်ပတ်းပိုၼ်ႉ တိုၵ်းသူၼ်းၵၼ်ဝႆႉတင်း သိုဝ်ႇၼႅင်ႈသၢၼ်ဝႃႈ တေၽွမ်ႉၵၼ်ၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ  လူၺ်ႈၸႂ်ႉလၢႆးတဵတ်ႇယဵၼ် (Silent Strike)  ၊ ၼႂ်းဝဵင်းယႂ်ႇဝဵင်းလူင်ၼႂ်းၸိုင်ႈတႆးၵေႃႈ မီးၽႅၼ်တေႁူမ်ႈႁဵတ်းၸွမ်းယူႇၼႆသေတႃႉ ဝၼ်းၼၼ်ႉ ပဵၼ်ဝၼ်းယႂ်ႇဝၼ်းလူင် ဝၼ်းလၢၵ်ႇလၢႆးလၢႆဢၼ်လႄႈ ပီႈၼွင်ႉလႃႈသဵဝ်ႈတႄႉ လွမ်လွမ်မႆႈၸႂ်ၵူဝ် ဢမ်ႇဢွင်ႇမၢၼ်ၵူၺ်းယဝ်ႉဝႃႈၼႆ။  

ၽူႈယၢမ်ႈဢွၼ်ႁူဝ်တူင်ႉၼိုင် သၢၼ်ၶတ်းသိုၵ်းမၢၼ်ႈ ယိုတ်းမိူင်း ၵူၼ်းဝဵင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပၢင်ၼႄၵၢင်ၸႂ် တဵတ်ႇ ယဵၼ် (Silent Strike) ပွၵ်ႈၵမ်းၼႆႉ တေဢွင်ႇမၢၼ် ဢမ်ႇဢွင်ႇမၢၼ် ဢၼ်ဝႃႈၼၼ်ႉ ပႆႇၸၢင်ႈ ဝႃႈလႆႈ။  ယွၼ်ႉဝႃႈ ၼႂ်းဝၼ်းတီႈ 1 ၼႆႉ မၼ်းႁိုၵ်ႉၵၼ်ဝႆႉ လၢႆလွင်ႈ၊ မိူၼ်ၼင်ႇ ဝၼ်းလိူၼ်လပ်းၵေႃႈမႅၼ်ႈ ၊ယဝ်ႉၵေႃႈ ဝၼ်းပီမႂ်ႇၶႄႇ(ပီႈၼွင်ႉၶႄႇၵိၼ်သီႇ ) ၵေႃႈ သမ်ႉမႅၼ်ႈထႅင်ႈ။ ပေႃးဝၼ်းပီ မႂ်ႇၶႄႇ ၵူႈပီပူၼ်ႉမႃးတႄႉ ၸွမ်းၶၢင်ႈတၢင်း ၸွမ်းၵၢင်ဝဵင်းၸိူဝ်းၼႆႉ ပီႈၼွင်ႉၶႄႇ ပေႃးတဵမ်တၢင်းၵိုၼ်းၵႂႃႇမူတ်းၶႃႈဢေႃႈ”- ဝႃႈၼႆ။

 တင်ႈတႄႇ သိုၵ်းမၢၼ်ႈ ယိုတ်းမိူင်းမႃး ႁၢၼ်ႉတေႃႇထိုင်ယၢမ်းလဵဝ်ၼႆႉ ၵူၼ်းမိူင်းတႆး ဝဵင်းယႂ်ႇဝဵင်းလူင်လၢႆလၢႆဝဵင်း ၶဝ်ႈႁူမ်ႈၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ ၽွမ်ႉၵၼ်တင်းၵူၼ်းပတ်းပိုၼ်ႉမိူင်းႁူမ်ႈတုမ် လူၺ်ႈၵူႈလၢႆးလၢႆး။

ပၢင်ၼႄၵၢင်ၸႂ် ၸႂ်ႉလၢႆးတဵတ်ႇယဵၼ် (Silent Strike)  ၵေႃႈ ဢွင်ႇမၢၼ်မႃးၵူႈၵမ်း၊ ပွၵ်ႈၼႆႉၵေႃႈ မုင်ႈမွင်းဝႃႈတေဢွင်ႇမၢၼ်ထႅင်ႈယူႇ ၽူႈဢွၼ်တူင်ႉၼိုင်သၢၼ်ၶတ်းသိုၵ်းမၢၼ်ႈ ၵူၼ်းလႃႈသဵဝ်ႈလၢတ်ႈ။

“ဝၼ်းတီႈ 1 ၼႆႉ လူဝ်ႇပႂ်ႉတူၺ်းၵၼ်ၵူၺ်းယဝ်ႉ ပေႃးဝၼ်းၼၼ်ႉလႄႈ တဵတ်ႇယဵၼ်တႄႉၼႆၸိုင် မၢႆထိုင်ဝႃႈ ၵၢၼ်ႁဝ်းၶႃႈဢွင်ႇမၢၼ်ယဝ်ႉ။   မိူဝ်ႈၵူႈပွၵ်ႈပူၼ်ႉမႃးၵေႃႈ လွင်ႈၶတ်းၸႂ်ႁဝ်းၶႃႈ ဢွင်ႇမၢၼ်မႃးၵူႈၵမ်းၶႃႈ။ သင်ဝႃႈ ပွၵ်ႈၼႆႉ ဢွင်ႇထႅင်ႈတႄႉ ႁႃတီႈဝႃႈဢမ်ႇမီးယဝ်ႉ”- ၽူႈယၢမ်ႈဢွၼ်တူင်ႉၼိုင် သၢၼ်ၶတ်းသိုၵ်းမၢၼ်ႈ ယိုတ်းမိူင်း တီႈဝဵင်း လႃႈသဵဝ်ႈ သိုပ်ႇလၢတ်ႈၼႄၼင်ႇၼႆ။

ပူၼ်ႉမႃး မိူဝ်ႈဝၼ်းတီႈ 10/12/2021 တူၵ်းမႅၼ်ႈဝၼ်းသုၼ်ႇလႆႈသုၼ်ႇပဵၼ်ၵူၼ်းမိူင်းလုမ်ႈၾႃႉ  မိူၼ်ၼင်ႇ ၵူၼ်းမိူင်း ၸႄႈဝဵင်းမူႇၸေႊ၊ ၵျွၵ်ႉမႄး၊ သီႇပေႃႉ၊ ၼမ်ႉၶမ်း၊ လႃႈသဵဝ်ႈလႄႈ တူၼ်ႈတီး ၸိူဝ်းၼႆႉ ယူႇတီႈၵူၼ်းမိူင်း ပိုၼ်ႉတီႈ ၽႂ်မၼ်းသေ ၼႄၵၢင်ၸႂ် လူၺ်ႈလၢႆးဢမ်ႇဢွၵ်ႇ ႁိူၼ်းယေး ဢမ်ႇပိုတ်ႇႁၢၼ်ႉၶၢႆၶူဝ်းၼႂ်းၵၢတ်ႇ ။  

ဢၼ်တေႁဵတ်း Silent Strike ပွၵ်ႈၵမ်းၼႆႉ ဝၢႆးလင်ၵူၼ်းမိူင်းလိုဝ်းၵၼ်ၼႂ်းသိုဝ်ႇဢွၼ်ႊလၢႆႊ မၢင်ဝဵင်း သိုၵ်းမၢၼ်ႈလႄႈပလိၵ်ႈ ၶဝ်ႈဝဵင်း လွၵ်ႇငိုတ်ႈ တီႉၺွပ်း ဢဝ်လိူင်ႈ ၸဝ်ႈႁၢၼ်ႉ ၸဝ်ႈႁိူၼ်း ၸိူဝ်းဢၼ်တႅမ်ႈတၢင်ႇဝႃႈ  တေၶဝ်ႈႁူမ်ႈႁဵတ်း Silent Strike – ၼႆၸိူဝ်းၼၼ်ႉၵေႃႈမီး။