ၶွင်ႇသီႇသိုၵ်းမၢၼ်ႈ ယိုတ်းမိူင်းမႃးၶၢဝ်းတၢင်းၼိုင်ႈပီၼႆႉ ၼႂ်းၸႄႈဝဵင်းၵူတ်ႉၶၢႆ ဝၢၼ်ႈမိူင်းဢမ်ႇ ၼိမ်သဝ်း တင်ႈၸႂ်ပွႆႇႁႂ်ႈ ပၢင်တေႃႇလွင်းလိူင်ႇၼမ် ။ ၵူၼ်းၵႃႉၶၢႆသူႇသမ်းၵိၼ်ယႃႈမဝ်းၵမ်ၵေႃႈ ငၢႆႈလိူဝ်ၵဝ်ႇ ၊ ၽူႈလၵ်ႉၵူၼ်းၸူၼ်ၵေႃႈထၢင်ႇႁၢင်ႈ ။
ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “တီႈၵူတ်ႉၶၢႆၼႆႉ ပၢင်တေႃႇလွင်းတႄႉ မီးၸေးၵူႈမဵဝ်း ၼမ်ပေႇၸႂ် ။ ၵွၼ်ႇၼႃႈၶဝ်ပႆႇယိုတ်းမိူင်း တႄႇပီ 2018 မႃး ပၢင်တေႃႇလွင်း မီးယူႇ ။ ၵူၺ်းၵႃႈ ဢမ်ႇပေႃးၼမ်ထၢၼ်ႇၼႆႉ ဝၢႆးၶဝ် ယိုတ်း မိူင်းမႃးၼႆႉ ၼမ်တႄႉၼမ်ဝႃႈၼၼ်ႉယဝ်ႉ ပၢင်တေႃႇလွင်းၼႆႉ”- ဝႃႈၼႆ။
လိူဝ်ၼၼ်ႉ ၽူႈလၵ်ႉၵူၼ်းၸူၼ် ၸိူဝ်းၼႆႉၵေႃႈ ၼမ်မႃး လိူဝ်ၵဝ်ႇ ၼႂ်းဝူင်ႈဝၢင်ႈၼႆႉၵူၺ်း ရူတ်ႉၵႃး ၵူၼ်းမိူင်းပိုၼ်ႉတီႈ ႁၢႆၵႂႃႇယဝ်ႉ မွၵ်ႈ 5-6 လမ်း ၵူၼ်းပိုၼ်ႉတီႈလၢတ်ႈ။
“ၵႃးၼႆႉၵေႃႈ ၵႆႉႁၢႆၼႃႇ မိူဝ်ႈဝႃးၼႆႉ ႁၢႆလမ်းၼိုင်ႈ တီႈပွၵ်ႉ 8 ၊ မိူဝ်ႈသိုၼ်းၼၼ်ႉသမ်ႉ ႁၢႆလမ်းၼိုင်ႈ တီႈပွၵ်ႉ 5 ၼႂ်းဝူင်ႈဝၢင်ႈၼႆႉၵူၺ်း ႁၢႆၵႂႃႇတေမီးမွၵ်ႈ 5-6 လမ်းၼႆႉယဝ်ႉ။ ဢၼ်ႁဝ်းၶႃႈ ပႆႇႁူႉၸွမ်း တေမီးထႅင်ႈတင်းၼမ်။ ယဝ်ႉၵေႃႈ ႁိူၼ်းၸိူဝ်းၼႆႉ ႁဵတ်းႁိုဝ်ၶဝ်ႈလၵ်ႉ ၶဝ်ႈပိုတ်ႇၽၵ်းတူၵေႃႈ ဢမ်ႇ ႁူႉ ႁူဝ်ႉၵေႃႈသုင် ၽၵ်းတူပိူၼ်ႈၶတ်းသေႃး လီပေႃးတၢၼ်ႇၼႆႉ လႆႈငိၼ်းဝႃႈ ၽူႈလၵ်းၸိူဝ်းၼၼ်ႉ ပၢႆပႃး ၵွင်ႈၸွမ်းထႅင်ႈလူးၵွၼ်း။ လၵ်ႉဢမ်ႇလႆႈ ၵေႃႈ ၸူၼ်ႁဵတ်းၼႆၼၼ်ႉၼႃႇ လၢႆးႁဵတ်းၶဝ်”- ၵူၼ်းပိုၼ်ႉတီႈ ၵူတ်ႉၶၢႆ သိုပ်ႇလၢတ်ႈၼႄၼင်ႇၼႆ။
ၸွမ်းၼႂ်းၵိဝ်ႇ ၼႂ်းပွၵ်ႉ ၸွမ်းသဵၼ်ႈတႃႈသၢႆတၢင်း သင်ဝႃႈၵႂႃႇၵေႃႉလဵဝ် ယင်းၶႂ်ႈလီၵူဝ်၊ ၵွပ်ႈဝႃႈ ၵူၼ်းသူႇသမ်းၵိၼ်/ၶၢႆယႃႈမဝ်းၵမ် လိူင်ႇၼမ် ၼႆယဝ်ႉ။
ၼၢင်းယိင်း တီႈၵူတ်ႇၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ်ၼႆႉ ပေႃးၵႂႃႇတၢင်းၼွၵ်ႈၼႆ သင်ဢမ်ႇမီးၵေႃႉၵႂႃႇၸွမ်း ၵၼ်တႄႉ ဢမ်ႇၶႂ်ႈႁတ်းၵႂႃႇမႃးၵေႃႉလဵဝ် ။ ၸွမ်းၵိဝ်ႇ ၸွမ်းပွၵ်ႉ ၸိူဝ်းၼႆႉ ၵူၼ်းသူႇသမ်းၵိၼ်ယႃႈၶၢႆယႃႈၼႆႉ ၼမ်ဝႃႈၼမ်ၶႃႈယဝ်ႉ။ ဢမ်ႇဝႃႈ ၼၢင်းယိင်း ၵူၼ်းၸၢႆး ၵမ်ႈၼမ် ပဵၼ်လုၵ်ႈဢွၼ်ႇ ဢႃယု 12 ပီ 13-14-15 ၸိူဝ်းၼႆႉၵူၺ်း။ ၼၢင်းယိင်းဢွၼ်ႇၵမ်ႈၼမ် ထိုင်တီႈၶၵ်ႉတွၼ်ႈၸႂ်ႉ ၶဵမ်သမ်းဢဝ်ၸိူဝ်းၼႆႉၵေႃႈမီးဢေႃႈ။ ”- ဝႃႈၼႆ။
လွင်ႈၼႆႉ ပလိၵ်ႈမၢၼ်ႈ၊ သိုၵ်းမၢၼ်ႈ ၽူႈၵွၼ်းပွၵ်ႉဢိူင်ႇ ၽူႈယႂ်ႇၵူၼ်းဝၢၼ်ႈ ၸိူဝ်းၼႆႉၵေႃႈ ဢမ်ႇဢဝ်လိူင်ႈ ဢမ်ႇၵုမ်းၵမ် ဢမ်ႇၸွႆႈၵႅတ်ႇၶႄပၼ်သင်။ ၸဝ်ႈၶွင်ပၢင်တေႃႇလွင်း ၵူၼ်းၵႃႉၶၢႆ ယႃႈမဝ်းၵမ် ၸိူဝ်းၼႆႉၵေႃႈပဵၼ် ၶႃႈႁၢပ်ႇၵၢၼ်လူင်ပွင်ၸိုင်ႈ ၸိူဝ်းလိုဝ်ႈၵၢၼ်ၵႂႃႇၸိူဝ်းၼၼ်ႉၵေႃႈ ပႃးထႅင်ႈလူးၵွၼ်ႇၼႆယဝ်ႉ။
ၼႂ်းၸႄႈဝဵင်းၵူတ်ႉၶၢႆၼႆႉ ၵမ်ႈၼမ် ပဵၼ်ပီႈၼွင်ႉၸၢဝ်းၶၢင်၊ ၸၢဝ်းလွႆ၊ ၸၢဝ်းၶႄႇလႄႈ ၸၢဝ်းတႆး ၸိူဝ်းၼႆႉ ယူႇသဝ်းၼမ်။ လိူဝ်ၼၼ်ႉ ၸွမ်းသၢပ်ႇ ဝဵင်းၸိူဝ်းၼႆႉ မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸုမ်းဢူၺ်းလီ ၸိူဝ်းၼႆႉ တူင်ႉၼိုင်ယူႇဝႆႉၼမ် ၼႆယဝ်ႉ။
