မႄႈမၢၼ်း ၵေႃႉၼိုင်ႈ ဢၼ်ပၢႆႈၽေးသိုၵ်းမႃးသွၼ်ႈဝႆႉတီႈ ဢိူင်ႇမိူင်းတၢင်ႈ ၸႄႈဝဵင်းၵျွၵ်ႉမႄးၼၼ်ႉ လႆႈၵိူတ်ႇလုၵ်ႈဢွၼ်ႇ လွတ်ႈၽေးတင်းသွင် မႄႈလုၵ်ႈ  ဝႃႈၼႆ။

ၵၢင်လိူၼ်ၵျႅၼ်ႊၼိဝ်ႊရီႊ 2022 ပူၼ်ႉမႃးၼႆႉ မႄႈမၢၼ်ႈ ၵေႃႉၼိုင်ႈ ၵူၼ်းဝၢၼ်ႈပၢင်ၵွၼ် ဢၼ်ပၢႆႈၽေးသိုၵ်း မႃးသွၼ်ႈဝႆႉတီႈႁူင်းႁဵၼ်းၸၼ်ႉသုင်ၵိင်ႇၽႄ ဢိူင်ႇမိူင်းတၢင်ႈ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ  ၵိူတ်ႇလုၵ်ႈဢွၼ်ႇ တီႈႁူင်းယႃလူင်ၵျွၵ်ႉမႄးယဝ်ႉ လွတ်ႈၽေး တင်း သွင်မႄႈလုၵ်ႈ ၼႆယဝ်ႉ။

ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဢိူင်ႇမိူင်းတၢင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵိူတ်ႇယဝ်ႉၶႃႈ ပဵၼ်ၼၢင်းယိင်းဢွၼ်ႇ တိုၵ်ႉၵိူတ်ႇမႃးလႆႈ 4-5 ဝၼ်းၼႆႉၶႃႈ။ တင်းမႄႈတင်းလုၵ်ႈ လွတ်ႈၽေးတင်းသွင်ယဝ်ႉၶႃႈ။ ယၢမ်းလဵဝ်တႄႉ ပွၵ်ႈမႃးယူႇဝႆႉတီႈႁူင်းႁဵၼ်းၸၼ်ႉသုင်ၵိင်ႇၽႄ မိူင်းတၢင်ႈၼႆႉ ၶိုၼ်ႈယဝ်ႉၶႃႈ”- ဝႃႈၼႆ။

ဢိင်ၼိူဝ် လွင်ႈၼႆႉ ယွၼ်ႉဝႃႈ လႆႈပၢႆႈၽေးသိုၵ်းမႃးႁိုင်ၵေႃႈပိူင်ၼိုင်ႈ ယွၼ်ႉပဵၼ်ၶၢဝ်းၵတ်းၵေႃႈပိူင်ၼိုင်ႈလႄႈ တႃႇမႄႈယူႇလိူၼ်လႄႈ လုၵ်ႈ ဢွၼ်ႇလႅင်တႄႉ လူဝ်ႇတၢင်းၸွႆႈထႅမ်ထႅင်ႈ တင်းၼမ် ၼႆယဝ်ႉ။

“မိူဝ်ႈလဵဝ်သမ်ႉ ပဵၼ်ၶၢဝ်းၵတ်းလႄႈ လွင်ႈၽႃႈႁူမ်ႇၶူဝ်းၼွၼ်း ၽႃႈပူၵ်ႉႁေႃ ၶူဝ်းၼုင်ႈဝႆ တႃႇလုၵ်ႈဢွၼ်ႇ မႄႈယူႇလိူၼ် ၸိူဝ်းၼႆႉတႄႉ လူဝ်ႇတင်း ၸွႆႈထႅမ် ၶႃႈဢေႃႈ။ ယဝ်ႉၵေႃႈ ၶွင်ၵိၼ်ယႅမ်ႉဢႃႇႁႃႇရ တႃႇဢဵၼ်ႁႅင်းမႄႈလုၵ်ႈဢွၼ်ႇ ၼူမ်းတႃႇလုၵ်ႈဢွၼ်ႇ ၶွင်ၸႂ်ႉလုၵ်ႈဢွၼ်ႇ ၸိူဝ်းၼႆႉၵေႃႈ လူဝ်ႇၶႃႈဢေႃႈ”- ၽူႈၸွႆႈထႅမ်ၵူၼ်းပၢႆႈၽေးသိုၵ်း သိုပ်ႇလၢတ်ႈၼႄၼင်ႇၼႆ။

မႄႈလုၵ်ႈဢွၼ်ႇၼႆႉ ပဵၼ်ၵူၼ်းဝၢၼ်ႈပၢင်ၵွၼ် ပၢႆႈၽေးသိုၵ်းမႃးယူႇဝႆႉ တီႈႁူင်းႁဵၼ်းၸၼ်ႉသုင် ၵိင်ႇၽႄ ဢိူင်ႇမိူင်းတၢင်ႈၼႆႉ မီးၶၢဝ်းတၢင်း 6 လိူၼ်ယဝ်ႉ ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈဢိူင်ႇမိူင်းတၢင်ႈ ႁူဝ်ၵူၼ်း 200 ပၢႆၼႆႉ ပၢႆႈမႃးမီးၶၢဝ်းတၢင်း 6 လိူၼ်ယဝ်ႉ မႄႈမၢၼ်း ဢၼ်ပၢႆႈၽေး သိုၵ်းမႃးသေ လႆႈမႃးၵိူတ်ႇလုၵ်ႈတီႈၼႂ်းမိူင်းတၢင်ႈၼႆႉ မီးၵႂႃႇ 3 ၵေႃႉယဝ်ႉ။ ဢၼ်ပၢႆႈမႃးသွၼ်ႈဝႆႉတီႈ ဝၢၼ်ႈပဵင်းၶႃး ၵေႃႉၼိုင်ႈ၊ တီႈႁူင်းႁဵၼ်းၸၼ်ႉ သုင်ၵိင်ႇၽႄ ဢိူင်ႇမိူင်းတၢင်ႈ 2 ၵေႃႉ။ ယၢမ်းလဵဝ်သမ်ႉ တိုၵ်ႉပႃးဝႆႉထႅင်ႈၵေႃႉၼိုင်ႈ ၽူႈၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈဢိူင်ႇမိူင်းတၢင်ႈ ႁူဝ်ၵူၼ်း 200 ပၢႆၼႆႉ တီႈႁူင်းႁဵၼ်းၸၼ်ႉသုင်ၵိင်ႇၽႄ ဢိူင်ႇမိူင်းတၢင်ႈ၊ တီႈဝၢၼ်ႈ ၼမ်ႉၸေႃႉ၊ ဝၢၼ်ႈပဵင်းၶႃးလႄႈ ဝၢၼ်ႈၼႃးမူၼ်း ၸိူဝ်းၼႆႉ။ ၵူၼ်းပၢႆႈၽေးသိုၵ်း ဢၼ်လႆႈပၢႆႈမႃးသမ်ႉ ပဵၼ်ၵူၼ်းဝၢၼ်ႈပၢင်ၵွၼ်၊ မွၵ်ႇငႃးၸၢင်ႉ၊ ပၢင်ႇလႅင်း၊ ႁူးၵွတ်ႈလႄႈ ပၢင်ၸလွပ်ႈ ၸိူဝ်းၼႆႉ။