မိူဝ်ႈၼႆႉဝၼ်းတီႈ 21/1/2022 ယၢမ်းၵၢင်ၼႂ် ၶွင်ႇသီႇသိုၵ်းမၢၼ်ႈ ယိုတ်းမိူင်း လူင်းၸႅၵ်ႇၽိုၼ်လိၵ်ႈ/ ဝႂ်ပိဝ် ၸွမ်းတႃႈရူတ်ႉၵႃး ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ႁႄႉႁၢမ်ႈတၢင်ႇၶူဝ်းၶွင်/ ၶူဝ်းၵုၼ်ႇ တႃႇ 19 မဵဝ်း ၼႆယဝ်ႉ။
ၸဝ်ႈၵႃး ဢၼ်လဵၼ်ႈတၢင်းလႃႈသဵဝ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈၼႆႉ ၵၢင်ၼႂ် သိုၵ်းမၢၼ်ႈၸၵၸၶဝ် မႃးၸႅၵ်ႇ ပၼ်ၽိုၼ်လိၵ်ႈ လွင်ႈႁႄႉႁၢမ်ႈတၢင်ႇၶူဝ်းၵုၼ်ႇ တင်းမူတ်း မီး 19 ဢၼ်/ မဵဝ်းၶႃႈ။ ၽိုၼ်လိၵ်ႈၶဝ် ဢၼ်မႃးပၼ်ၼၼ်ႉတႄႉ ႁၢမ်ႈတၢင်ႇ ၶူဝ်း ၵုၼ်ႇ ၽွင်းယၢမ်းမိူဝ်ႈလဵဝ်ၼႆႉၼႆၶႃႈ။ ၵူၺ်းၵႃႈ တေဢမ်ႇလႆႈတၢင်ႇတေႃႇၵႂႃႇတၢင်းလႂ် ၸိူဝ်းၼႆႉတႄႉ ဢမ်ႇလၢတ်ႈပႃးၶႃႈ။ လၢတ်ႈဝႃႈ တေဢမ်ႇ လႆႈ တၢင်ႇၶူဝ်းၵုၼ်ႇၸိူဝ်းၼႆႉၵူၺ်း”- ဝႃႈၼႆ။
ၼႂ်းၶူဝ်းၵုၼ်ႇ 19 မဵဝ်း ဢၼ်ႁႄႉႁၢမ်ႈဝႆႉ တေဢမ်ႇလႆႈတၢင်ႇၼၼ်ႉတႄႉ မိူၼ်ၼင်ႇ ၾူၼ်း/ မိုဝ်းထိုဝ် တေဢမ်ႇလႆႈလိူဝ် သွင်ၶိူင်ႈ၊ ၶွမ်ႊပိဝ်ႊ တိူဝ်ႊ တေဢမ်ႇလိူဝ်သွင်လုၵ်ႈ၊ CCTV ၊ ႁိူဝ်းမိၼ်/ ၻရူၼ်း(Drone)၊ ၵွင်ႈထၢႆႇ (Camera)၊ ပႅတ်ႇထရီႇ မၢၵ်ႇထၢၼ်ႇ၊ မၢၼ်ႇၽီလူး/ မၢၼ်ႇပျွင်း၊ ၾႆးထၢတ်ႈ၊ ၸၢၵ်ႈလၢတ်ႈ၊ သၢႆၾႆး၊ ၶိူင်ႈၶမ်း(ရွှေထည်ပစွည်း)၊ ၶိူင်ႈၶူဝ်း ၵေႃႇ၊ သတီး ၸိူဝ်းၼႆႉ။ လွတ်ႇၼမ်ႉ (ၵေႃႇ၊ သတီး၊ လဵၵ်း)၊ ဢႅတ်ႉသိၵ်ႉ၊ ၽွင်ယၢမ်း(ယမ်းမှုန့်)၊ မႆႉပႅၼ်ႈ ထၢၼ်ႇ၊ ၶူဝ်းၼုင်ႈဝႆ တင်းၼမ်လၢႆ၊ ၶူဝ်းလၢႆးၸုမ်ႇ (ပျောက်ကြားတူညီ၀တ်စုံ)လႄႈ ၶွင်ၵိၼ်ႁႅင်ႈ တင်းၼမ် တင်းလၢႆ ၸိူဝ်းၼႆႉ။
ၵႃးၵဵတ်ႉ ၼႂ်းၸိုင်ႈတႆးပွတ်းၸၢၼ်း လၢႆၸႄႈဝဵင်းၵေႃႈ တိုၼ်းဢမ်ႇႁပ်ႉတၢင်ႇၶူဝ်းၵုၼ်ႇယဝ်ႉ ႁပ်ႉတၢင်ႇၵူၼ်း ၶေႃၶေႃၵူၺ်းၼႆၵေႃႈမီးမႃး။ ယွၼ်ႉဝႃႈ ၶၢၼ်ႉသုၵ်ႉသၵ်ႉၸွမ်း သိုၵ်းမၢၼ်ႈ ၵူတ်ႇထတ်းၸွမ်းသဵၼ်ႈတႃႈသၢႆတၢင်း ၸႅတ်ႈထၢမ်ၸဝ်ႈၵႃး ႁၢဝ်ႈႁႅင်း ဝႃႈၼႆ။
ၸဝ်ႈၵႃး ဢၼ်လဵၼ်ႈတၢင်းတူၼ်ႈတီးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သင်ဝႃႈ ပဵၼ်ၶူဝ်းၵုၼ်ႇၼႆ သိုၵ်းမၢၼ်ႈ ပိုတ်ႇတူၺ်း ၸႅတ်ႈတူၺ်း ၵူႈဢၼ်။ ပေႃးယဝ်ႉ သမ်ႉဢမ်ႇၵဵပ်းပၼ်ၶိုၼ်း ။ ၸဝ်ႈၵႃး ၵူၼ်းၸွမ်းၵႃး တႄႉ လႆႈၵဵပ်း လႆႈမၢတ်ႈ ၶိုၼ်းမူတ်း။ ယဝ်ႉၵေႃႈ ၸႅတ်ႈ ထၢမ်ၼမ်ၼႃႇ ထၢမ်ႁူဝ်ယွႆႈမၼ်းႁႅင်းၼႃႇ မိူၼ်ၼင်ႇ ဢဝ်တီႈလႂ်မႃး တေတေႃႉၵႂႃႇတီႈလႂ် တေၵႂႃႇပၼ်ၽႂ် ၸိူဝ်းၼႆႉ။ ၵွပ်ႈၼႆလႄႈ မၢင်ၵဵတ်ႉ ဢမ်ႇ ႁပ်ႉၶူဝ်းၵုၼ်ႇၵေႃႈမီး။ ႁပ်ႉတၢင်ႇၵူၼ်းၵူၺ်းဢေႃႈ”- ဝႃႈၼႆ။
လွင်ႈသိုၵ်းမၢၼ်ႈ ႁဵတ်းၸိူင်ႉၼႆၼႆႉ ပၼ်တၢင်းတုၵ်ႉၶ ၸဝ်ႈၵႃးၵူၺ်းဢမ်ႇၵႃး ပၼ်ပႃး တၢင်းယၢပ်ႇၽိုတ်ႇ ၵူၼ်းပၢႆႈၽေးသိုၵ်း ႁႂ်ႈတုၵ်ႉၶၸွမ်းထႅင်ႈ။ မိူၼ်ၼင်ႇ ၶူဝ်းၼုင်ႈတၢင်းဝႆ ၽႃႈႁူမ်ႈၶူဝ်းၼွၼ်း ၶွင်ၵိၼ်ယႅမ်ႉ ၸိူဝ်းၼႆႉ တႃႇတေတေႃႉသူင်ႇၸွႆႈထႅမ် ၵူၼ်းပၢႆႈၽေးသိုၵ်းၵေႃႈ ပဵၼ်ဢၼ်ယၢပ်ႇ ၽိုတ်ႇ ။
“ဢၼ်သိုၵ်းမၢၼ်ႈ ႁၢမ်ႈတၢင်ႇၶူဝ်းၵုၼ်ႇၸိူဝ်းၼၼ်ႉ ၶဝ်ၵူဝ်ပိူၼ်ႈၵႂႃႇၸွႆႈ ၸုမ်း PDF ၶႃႈယူဝ်ႉ။ တွၼ်ႈတႃႇၵူၼ်းပၢႆႈၽေး လူဝ်ႇတၢင်းၸွႆႈထႅမ် ၸိူဝ်းၼၼ်ႉလူး တေႁဵတ်းႁိုဝ်ပေႃးၼႆ တေပွႆႇပၼ်ႁႂ်ႈၶဝ်တုၵ်ႉၶ ၸိူင်ႉၼၼ်ၵူၺ်းယဝ်ႉႁိုဝ်။ ၵူၺ်းၵႃႈ လွင်ႈၵူတ်ႇထတ်း ၸွမ်းၵႃး ၸိူဝ်းၼႆႉ ပွတ်း ၸၢၼ်းတႄႉ ၸဝ်ႈၵႃးၶဝ် ၵႆႉၺႃးၸႅတ်ႈထၢမ်ၵၼ်ၼမ်ၶႃႈဢေႃႈ”- ၽူႈၸွႆႈထႅမ် ၵူၼ်းပၢႆႈၽေးသိုၵ်း ပွတ်းၸၢၼ်း ၵေႃႉၼိုင်ႈ လၢတ်ႈတီႈ ၽူႈတွႆႇႁွၵ်ႈၼင်ႇၼႆ။
ယၢမ်းလဵဝ် ၼႂ်းမိူင်းတႆး ပွတ်းၸၢၼ်းၼႆႉ ၵူၼ်းပၢႆႈၽေးသိုၵ်းဢၼ်လုၵ်ႉမိူင်းယၢင်းလႅင်ပၢႆႈမႃး မီးၼပ်ႉႁူဝ်မိုၼ်ႇ။ တၢင်းလၢႆးၶႃႈ၊ မိူင်းၵိုင် လွႆလႅမ် လၢင်းၶိူဝ်း ၸိူဝ်းၼႆႉၵေႃႈ မီးၵူၼ်းပၢႆႈၽေးသိုၵ်း ၼႂ်းမိူင်းတႆးလႄႈ တင်းယၢင်းလႅင်။ တၢင်းသီႇပေႃႉ ၵျွၵ်ႉမႄး လႄႈ မိူင်းၵူဝ်း မိူင်းပေႃႈ ၸႄႈတွၼ်ႈမူႇၸေႊ ၸိူဝ်းၼႆႉၵေႃႈ မီးၵူၼ်းပၢႆႈၽေးသိုၵ်း ၼပ်ႉႁူဝ်ႁဵင် မိူၼ်ၵၼ် ၼႆယဝ်ႉ။
ၵူၼ်းပၢႆႈၽေးသိုၵ်း ၸိူဝ်းၼႆႉ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ် ၽႃႈႁူမ်ႇၶူဝ်းၼွၼ်း လွင်ႈၼုင်ႈဝႆလႄႈ ယႃႈယႃ ၸိူဝ်းၼႆႉ တင်း ၼမ်။ ဢိင်ၼိူဝ် လွင်ႈသိုၵ်းမၢၼ်ႈ ႁႄႉႁၢမ်ႈ တၢင်ႇၶူဝ်းၵုၼ်ႇ ၸိူဝ်းၼႆႉ တႃႇၵူၼ်းပၢႆႈၽေးသိုၵ်း တေလႆႈႁပ်ႉတၢင်းၸွႆႈထႅမ်တီႈၸဝ်ႈတႃႇၼ တီႈၵႆ သူင်ႇမႃးၼၼ်ႉၵေႃႈယၢပ်ႇၽိုတ်ႇ။
