သဵင်ၵွင်ႈတႅၵ်ႇ တီႈႁိမ်းတိၼ်လွႆသၢမ်သိပ်း ဝဵင်းၵူတ်ႇၶၢႆ

မိူဝ်ႈၼႆႉ ဝၼ်းတီႈ 20/1/2022 ယၢမ်းၵၢင်ၼႂ်ၸဝ်ႉ မွၵ်ႈ 2 မူင်း သဵင်ၵွင်ႈတႅၵ်ႇ တီႈႁိမ်းတိၼ်လွႆသၢမ်သိပ်း ၼႂ်းၵႄႈၵူတ်ႉၶၢႆ – သႅၼ်ဝီ ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ မိူင်းတႆးပွတ်းႁွင်ႇ။

ၵူၼ်းပိုၼ်ႉတီႈ ႁိမ်းႁွမ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “လႆႈငိၼ်းသဵင်ၵွင်ႈတႅၵ်ႇ တင်းသွင်ၾၢႆႇ ၶႃႈဢေႃႈ။ ယဝ်ႉၵေႃႈ သဵင်မၢၵ်ႇလူင် ၵွင်ႈၸၢၵ်ႈ ၸိူဝ်းၼႆႉၵေႃႈ လႆႈငိၼ်းဢေႃႈ။ ၵူၺ်းၵႃႈ ၸုမ်းလႂ်တင်း ၸုမ်းလႂ်ယိုဝ်းၵၼ်တႄႉ ပႆႇႁူႉ။ ပၢင်တိုၵ်းတႄႉ ပဵၼ်ႁိမ်းၶၢင်ႈတၢင်းလူင် တိၼ်လွႆသၢမ် သိပ်းၼႆႉၵူၺ်း”-  ဝႃႈၼႆ။

မိူဝ်ႈဝႃး ဝၼ်းတီႈ 19/1/2022 ၼႆႉ ၸုမ်းသိုၵ်းမၢၼ်ႈ ဢဵၼ်ႁႅင်းမွၵ်ႈ 50 မႃးပၵ်းတပ်ႉဝႆႉတီႈ တိၼ်လွႆသၢမ်သိပ်း ႁိမ်းပဵၼ်ပၢင်တိုၵ်း ၵၼ်မိူဝ်ႈၼႆႉ ဝႃႈၼႆ။

“ဢွင်ႈတီႈပဵၼ်ပၢင်တိုၵ်းမိူဝ်ႈၼႆႉတႄႉ မီးဝႆႉၸုမ်း TNLA, KIA ။ ၵွပ်ႈၼႆ သိုၵ်းမၢၼ်ႈ တင်း သိုၵ်း TNLA, KIA ပဵၼ်ပၢင်တိုၵ်းၵၼ်ႁိုဝ် ဢမ်ႇႁူႉ။ ၵူၺ်းၵႃႈ ၶေႃႈမုလ်းလၢႆးႁူဝ်ယွႆႈမၼ်းတႄႉ ပႆႇလႆႈႁူႉတႅတ်ႈတေႃး”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

ၼႂ်းၸႄႈဝဵင်းၵူတ်ႇၶၢႆၼႆႉ မီးဝႆႉ ၸုမ်းသိုၵ်းမၢၼ်ႈ၊ သိုၵ်းတဢၢင်း TNLA ၊ သိုၵ်းၶၢင် KIA လႄႈ သိုၵ်းၶႄႇၵဝ်ႈၵၢင်ႉ MNDAA ၸိူဝ်းၼႆႉ တူင်ႉၼိုင်ဝႆႉ၊ ပၢင်တိုၵ်းၵေႃႈ ၵႆႉၵႆႉပဵၼ်ယူႇသေႇသေႇ။