ယၢမ်းလဵဝ် ၼႂ်းမိူင်းတႆးၼႆႉ မီးဝႆႉ 13 ၸႄႈတွၼ်ႈ သိုၵ်းမၢၼ်ႈဢၢၼ်းၶိုင်ၸႅၵ်ႇသေထႅမ်ထႅင်ႈ ၸႄႈတွၼ်ႈမႂ်ႇ 7 ၸႄႈတွၼ်ႈ ႁူမ်ႈၵၼ်တေပဵၼ် 20 ၸႄႈတွၼ်ႈ။
မိူင်းတႆး ပွတ်းႁွင်ႇ မီး 7 ၸႄႈတွၼ်ႈ ။ ပဵၼ် ၸႄႈတွၼ်ႈလႃႈသဵဝ်ႈ ၊ ၸႄႈတွၼ်ႈမူႇၸေႊ ၊ ၸႄႈတွၼ်ႈၵျွၵ်ႉမႄး၊ ၸႄႈတွၼ်ႈ မိူင်းမိတ်ႈ၊ ၸႄႈတွၼ်ႈ လၢဝ်ႇၵၢႆး၊ ၸႄႈတွၼ်ႈ ႁူဝ်ပၢင်ႇလႄႈ ၸႄႈတွၼ်ႈမၢၵ်ႇမၢင်။ ယၢမ်းလဵဝ် သမ်ႉ သိုၵ်းမၢၼ်ႈဢၢၼ်း ၸႅၵ်ႇဢွၵ်ႇထႅင်ႈ ၼိုင်ႈၸႄႈတွၼ်ႈ ။ ပဵၼ်ၸႄႈတွၼ်ႈ တၢင်ႉယၢၼ်း။
ၼႂ်းမိူင်းတႆး ပွတ်းဢွၵ်ႇသမ်ႉ မီးဝႆႉ ၸႄႈတွၼ်ႈၵဵင်းတုင် ၊ ၸႄႈတွၼ်ႈမိူင်းသၢတ်ႇ လႄႈ ၸႄႈတွၼ်ႈ တႃႈၶီႈလဵၵ်း။ ယၢမ်းလဵဝ်သမ်ႉတေ ၸႅၵ်ႇထႅင်ႈ 3 ၸႄႈတွၼ်ႈ။ ပဵၼ်ၸႄႈတွၼ်ႈ မိူင်းလႃး ၊ မိူင်းတူၼ်လႄႈ မိူင်းယွင်း။
ၼႂ်းၸိုင်ႈတႆးပွတ်းၸၢၼ်းသမ်ႉ မီးဝႆႉၸႄႈတွၼ်ႈ တူၼ်ႈတီး ၊ လွႆလႅမ်လႄႈ လၢင်းၶိူဝ်း။ သိုၵ်းမၢၼ်ႈ ဢၢၼ်းထႅမ်ထႅင်ႈ ၸႄႈတွၼ်ႈ ၵၢတ်ႇလေႃႉ ၊ ၸႄႈတွၼ်ႈၼမ်ႉၸၢင်လႄႈ ၸႄႈတွၼ်ႈမိူင်းသူႈ။
ၵူၺ်းၵႃႈတေဢဝ်ၸႄႈဝဵင်းလႂ် သႂ်ႇတႂ်ႈ ၸႄႈတွၼ်ႈလႂ် ၼႆတႄႉ ပႆႇလႆႈႁူႉ။ တေတႄႇမိူဝ်ႈလႂ်ၵေႃႈ ပႆႇႁူႉတႅတ်ႈတေႃး။
ယၢမ်းလဵဝ် မိူင်းႁူမ်ႈတုမ်ပတ်းပိုၼ်ႉ မီး 74 ၸႄႈတွၼ်ႈ၊ ၸွမ်းၼင်ႇ ၶၢဝ်ႇငၢဝ်းဢၼ်ၽႄႈယူႇတီႈၼိူဝ် Social Media တႄႉ သိုၵ်းမၢၼ်ႈတေၶႂၢၵ်ႈၸႄႈတွၼ်ႈမႂ်ႇထႅင်ႈ 42 ၸႄႈတွၼ်ႈ ဝႃႈၼႆ။
ၾၢႆႇၶွင်ႇသီႇသိုၵ်းမၢၼ်ႈၵေႃႈ ပိုၼ်ၽၢဝ်ႇဝႆႉဝႃႈ ၼႂ်းပီ 2023 ၼႆႉ တေၸတ်းပၢင်လိူၵ်ႈတင်ႈလူၺ်ႈလၢႆး ပိူင်လိူၵ်ႈတင်ႈၸွမ်းပုၼ်ႈ PR ဝႃႈၼႆဝႆႉလႄႈ သိုၵ်းမၢၼ်ႈႁၢင်ႈႁႅၼ်းဝႆႉထႃႈတႃႇပေႉပုၼ်ႈၵိၼ်ၶၢတ်ႇၵူၺ်း ၽူႈလူင်ႉလႅၼ်ႇၼႂ်းၵၢၼ်တူင်ႇဝူင်းၵၢၼ်မိူင်းၶဝ်ထတ်းသၢင်ၼင်ႇၼႆ။