ၸဝ်ႈသူၼ်ထူဝ်ႇ (ထူဝ်ႇမႅင်းၸီး) ဝဵင်းၵုၼ်လူင် ဢွၼ်ၵၼ်ထူပ်းတၢင်းယၢပ်ႇၽိုတ်ႇ လူႉသုမ်းၼမ် ယွၼ်ႉဢမ်ႇၸၢင်ႈသူင်ႇၶၢႆ တၢင်းၾင်ႇမိူင်းၶႄႇ။

ၽွင်းဝၢၼ်ႈမိူင်းသုၵ်ႉယုင်ႈ ဢမ်ႇမီးလွင်ႈၼိမ်သဝ်း တၢင်းပဵၼ်ၶူဝ်ႊဝိတ်ႉ 19 ၵေႃႈ တိုၵ်ႉၽႄႈလၢမ်းႁႅင်းဝႆႉလႄႈ တၢင်းၾင်ႇမိူင်းၶႄႇ ပိၵ်ႉဢိုတ်း ပႅတ်ႈၽၵ်းတူမိူင်း ၸွမ်းလႅၼ်လိၼ်တႆး – ၶႄႇ ၵူႈႁူးၵူႈတၢင်း တုမ်ႉတိူဝ်ႉၵၢၼ်ပၢႆးမၢၵ်ႈမီးၵူၼ်းမိူင်း။ ႁၢၼ်ႉတေႃႇထိုင်ယၢမ်းလဵဝ် မီးၶၢဝ်းတၢင်းပီပၢႆယဝ်ႉ ၽၵ်းတူမိူင်းပႆႇပိုတ်ႇၶိုၼ်း ၸဝ်ႈသူၼ် ထူဝ်ႇ (မႅင်းၸီး) ၸႄႈဝဵင်းၵုၼ်လူင် ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ဢွၼ်ၵၼ်ထူပ်းတၢင်းယၢပ်ႇၽိုတ်ႇ ယွၼ်ႉဢမ်ႇၸၢင်ႈတေႃႉသူင်ႇၶၢႆ တၢင်းၾင်ႇမိူင်းၶႄႇ။

ပႃႈပဝ်း ၸဝ်ႈသူၼ်ထူဝ်ႇ (မႅင်းၸီး) ၵူၼ်းၵုၼ်လူင် လၢတ်ႈတီႈၽူႈတွႆႇႁွၵ်ႈဝႃႈ -“မိူင်းၶႄႇ ပႆႇပိုတ်ႇၽၵ်းတူလႄႈ ဢမ်ႇၸၢင်ႈတေႃႉၵႂႃႇၶၢႆတၢင်း မိူင်းၶႄႇ။ ထူဝ်ႇတႄႉ မီးၼမ်ၶႃႈဢေႃႈ ဢမ်ႇၸၢင်ႈတေႃႉၵႂႃႇၶၢႆ မၢင်ၸိူဝ်း ထိုင်တီႈပေႃးယႃႉလွၼ်ႉၶိူဝ်းမၼ်းပႅတ်ႈ။ မၢင်သူၼ်ထူဝ်ႇပေႃးၽႅပ်ႉ ပေႃး ၵေႇသေ ဢမ်ႇၸၢင်ႈပိတ်းၸိူဝ်းၼႆႉၵေႃႈမီး ၸဝ်ႈသူၼ်ထူဝ်ႇတႄႉ ဢွၼ်ၵၼ်လူႉသုမ်း တင်းၼမ်ၶႃႈဢေႃႈ”- ဝႃႈၼႆ။

ဢိင်ၼိူဝ် လွင်ႈၼႆႉ ၸဝ်ႈသူၼ်မၢင်ၵေႃႉတႄႉ ဢဝ်ဢိမ်ႇမိူဝ်ႇသေ ဢမ်ႇမီးၸႂ်ၶႂ်ႈသိုပ်ႇၽုၵ်ႇသွမ်ႈႁဵတ်းသူၼ်ထႅင်ႈယဝ်ႉ။  တႃႇပီတေမႃးပီၼႃႈတေႁဵတ်းၵိၼ်ၵၢၼ်သင်ထႅင်ႈဢမ်ႇႁူႉ ဝႃႈၼႆ။

ၸၢႆးယွတ်ႈ ၸဝ်ႈသူၼ်ထူဝ်ႇ ၵုၼ်လူင် လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်းလဵဝ် ထူဝ်ႇဢၼ် လူဝ်ႇပိတ်းသေ တႃႇတေသူင်ႇၶၢႆၵေႃႈ မီးဝႆႉ တႃႇၶိုင်ႈ ဢေႊၶိူဝ်ႊၼႆႉယဝ်ႉ။ ယွၼ်ႉဢမ်ႇၸၢင်ႈတေႃႉၶၢႆတၢင်းမိူင်းၶႄႇလႄႈ ဢမ်ႇႁူႉဝႃႈ တေၵႂႃႇၶၢႆတီႈလႂ်။ တေဝႃႈၵိၼ်ၼႆၵေႃႈ ၼမ်ပဵၼ်တၼ်ႇၼႆႉ၊ ပေႃး ယၵ်ႉတူၺ်းသူၼ်မိူဝ်ႈလႂ်ၵေႃႈ သမ်ႉပေႃးဢမ်ႇၶႂ်ႈႁၼ်ယဝ်ႉ။ ထႅင်ႈလွင်ႈၼိုင်ႈၵေႃႈ ၶႃႈတိုၵ်ႉပဵၼ်ၵူၼ်းႁဵတ်းသူၼ်မႂ်ႇၵူၺ်းလႄႈ ပီၼႆႉၶႃႈသုမ်း 24 သႅၼ်ၼႆႉၶႃႈဢေႃႈ”- ဝႃႈၼႆ။

ၵွၼ်ႇၼႃႈ တၢင်းပဵၼ်ၶူဝ်ႊဝိတ်ႉ 19 ပႆႇၽႄႈလၢမ်း တၢင်းၾင်ႇမိူင်းၶႄႇၵေႃႈ တိုၵ်ႉပိုတ်ႇၽၵ်းတူမိူင်းလႅၼ်လိၼ်ယူႇၼၼ်ႉ ၶူဝ်းသူၼ်ဢၼ်ဢွၵ်ႇ ၼႂ်းမိူင်းတႆး ၸိူဝ်းၼႆႉ လႆႈၸႂ်ယႂ်ႇသေ တေႃႉသူင်ႇၶၢႆတၢင်းမိူင်းၶႄႇ လႆႈၶၼ်သုင်။ ၸဝ်ႈသူၼ်တၢင်းဝဵင်းၵုၼ်လူင်ၵေႃႈ လႆႈသူင်ႇထူဝ်ႇၶၢႆၸူးမိူင်းၶႄႇငၢႆႈလူမ်ၸႂ်လီလႄႈ လႆႈၼမ်ႉမႅတ်ႈၼမ်ႉတွၼ်းလီ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉ ယူႇတီႈၸဝ်ႈသူၼ်ထူဝ်ႇၶဝ်တႄႉ မုင်ႈမွင်းႁႂ်ႈငဝ်းလၢႆးဝၢၼ်ႈမိူင်းၸဵဝ်းလီ ႁႂ်ႈၸဵဝ်းလႆႈသူင်ႇၶၢႆဢွၵ်ႇ ၶူဝ်းၼႂ်းသူၼ် ငၢႆႈလူမ်ၸႂ် ၶိုၼ်းမိူၼ်ၵဝ်ႇ ၼႆယဝ်ႉ။

ၸႄႈဝဵင်းၵုၼ်လူင်ၼႆႉ မီးၼႂ်းၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၵူၼ်းမိူင်းပိုၼ်ႉတီႈၵမ်ႈၼမ် ပိုင်ႈဢိင်ၵၢၼ်ၽုၵ်ႇသွမ်ႈႁႃၵိၼ်လဵင်ႉတွင်ႉမႃး မိူၼ်ၼင်ႇ ၽုၵ်ႇၶဝ်ႈၶႄႇ(ၶဝ်ႈၵၢပ်ႇ)၊ ဢွႆႈ၊ မၢၵ်ႇပၵ်ႉလႄႈ ထူဝ်ႇ ၸိူဝ်းၼႆႉသေ သူင်ႇၶၢႆၼႂ်းမိူင်းၶႄႇမႃး ပီယၢဝ်းၶၢဝ်းႁိုင်  ။