သိုၵ်းမၢၼ်ႈ မႃးပၵ်းယူႇသဝ်းၼႂ်းသူၼ်ႁႆႈၼႃးၵူၼ်းဝၢၼ်ႈ တီႈဝၢၼ်ႈၼႃးတီး ဢၼ်မီးၼႂ်းၵႄႈ ၵုၼ်လူင် – သႅၼ်ဝီ ၵူၼ်းမိူင်းဢမ်ႇၸၢင်ႈၵႂႃႇႁဵတ်းၵၢၼ်ႁႆႈၵၢၼ်သူၼ်။
သိုၵ်းမၢၼ်ႈၸိူဝ်းၼႆႉ ဢဵၼ်ႁႅင်းမီးမွၵ်ႈ 100 လုၵ်ႉလႂ်မႃးတႄႉဢမ်ႇႁူႉ မႃးပၵ်းယူႇသဝ်းဝႆႉလႆႈမွၵ်ႈဝူင်ႈပၢႆယဝ်ႉ၊ ပႂ်ႉၵူတ်ႇထတ်းထဵတ်ႈထၢမ်ၵူၼ်းဝၢၼ်ႈၵႂႃႇမႃးလႄႈ ၵူၼ်းဝၢၼ်ႈဢမ်ႇၸၢင်ႈၵႂႃႇႁဵတ်းၵၢၼ်သူၼ်။
ၵူၼ်းဝၢၼ်ႈၼႃးတီး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“လႆႈမွၵ်ႈၼိုင်ႈဝူင်ႈယဝ်ႉၶႃႈ ၶဝ်လုၵ်ႉလႂ်မႃးၵေႃႈဢမ်ႇႁူႉ။ ပဵၼ်သိုၵ်းမၢၼ်ႈဢေႃႈ ၊ ၶဝ်သမ်ႉလၢတ်ႈၵႂၢမ်းၶႄႇဢေႃႈ။ ၶဝ်ဢမ်ႇမႃးၵဝ်းၼႂ်းဝၢၼ်ႈႁဝ်းသေတႃႉ ၶဝ်သမ်ႉယူႇၸွမ်းႁိမ်းႁွမ်းဝၢၼ်ႈၼႆႉလႄႈ မၼ်းသုၵ်ႉသၢၵ်ႉၸႂ်ၵူၼ်းဝၢၼ်ႈဢေႃႈ။ မၼ်းမိူၼ်ဢမ်ႇမီးလွင်ႈႁူမ်ႇလူမ်ႈ ၊ ၵွပ်ႈၼႆ ၵမ်ႈၽွင်ႈယင်းဢမ်ႇႁတ်းၵႂႃႇတူၺ်းသူၼ်ၶဝ်ၶႃႈလႃႈ”- ဝႃႈၼႆ။
တီႈဝၢၼ်ႈၼႃးတီးၼႆႉ ၵူၼ်းဝၢၼ်ႈမီးမွၵ်ႈ 300 ၵေႃႉ။ ႁဵတ်းၵၢၼ်ႁႆႈၵၢၼ်သူၼ် ႁႃၵိၼ်လဵင်ႉတွင်ႉ။ သင်ဝႃႈသိုၵ်းမၢၼ်ႈၸုမ်းၼႆႉ တေပၵ်းသဝ်းၵႂႃႇႁိုင်တႄႉ ၵူၼ်းဝၢၼ်ႈယင်းမႆႈၸႂ် ၵူဝ်မၢၵ်ႇၶဝ်ႈတဝ်ႈၼမ်ႉလူႉ၊ ၵူဝ်ဢမ်ႇၸၢင်ႈၵႂႃႇၵဵပ်းၵႂႃႇဢဝ်ၵူၺ်းယဝ်ႉ ဝႃႈၼႆ။
“သိုၵ်းမၢၼ်ႈၸိူဝ်းၼႆႉၶဝ်မႃးသင်ႇတီႈၵူၼ်းလူင်ဝၢၼ်ႈဢေႃႈ။ပေႃးဢမ်ႇလူဝ်ႇလွင်ႈယႂ်ႇႁႅင်းၼႃႇၼႆယႃႇၵႂႃႇသူၼ်။ တီႈတၢင်းသူၼ်ႁႆႈ ၵူၼ်းဝၢၼ်ႈၵေႃႈၶဝ်တေၵႂႃႇယူႇသဝ်းဝႆႉ။ သင်ဝႃႈၵူၼ်းဝၢၼ်ႈတေမႃးသူၼ်ၼႆ ႁႂ်ႈပွင်ႇၶၢဝ်ႇၸူးၶဝ်ဢွၼ်တၢင်းၼႆၶႃႈဝႃႇ ။ ၵွပ်ႈၼႆ တႃႇတေၵႂႃႇသူၼ်ၵေႃႈ ၼၵ်းၸႂ်ဝႆႉဢေႃႈ ”- ၵူၼ်းဝၢၼ်ႈၼႃးတီး သိုပ်ႇလၢတ်ႈထႅင်ႈၼင်ႇၼႆ။
ပူၼ်ႉမႃး 2-3 လိူၼ်သမ်ႉ တီႈဝၢၼ်ႈၼႃးတီးၼႆႉ မီးသိုၵ်းၵူဝ်းၵၢင်ႉ (ဢၼ်ပဵၼ်လုၵ်ႈၸုမ်းဢူၺ်းလီ) မႃးတူင်ႉၼိုင်ယူႇသဝ်းဝႆႉ လႄႈ ၵူၼ်းဝၢၼ်ႈတႄႉၵူဝ်ပဵၼ်ပၢင်တိုၵ်း ၵူၺ်းယဝ်ႉဝႃႈၼႆ။
