မိူဝ်ႈၼႆႉ ဝၼ်းတီႈ 19/1/2022 ယၢမ်းဝၢႆးဝၼ်းမွၵ်ႈ 1 မူင်းၶိုင်ႈ သိုၵ်းမၢၼ်ႈ ထူင်ႇထဵဝ်ႈၵၢင်ဝဵင်းတူၼ်ႈတီး ပႂ်ႉၵူတ်ႇထတ်း ၵူၼ်းၵႂႃႇမႃး ၊ ယွၼ်ႉမီးၵူၼ်းဢဝ်ဢူတ်ႇဢူဝ် မႃးႁွႆႈၸွမ်းသဝ်ၾႆးၵၢင်ဝဵင်းသေ ပိုတ်ႇၽဵင်းၵႂၢမ်း ၵၢၼ်မိူင်း သၢၼ်ၶတ်းသိုၵ်းမၢၼ်ႈ ၸိူဝ်းၼႆႉ။
ၵူၼ်း တူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ဢုတ်ႇသေႃႇၼၼ်ႉ ၽႂ်တၼ်းဢဝ်မႃးမတ်ႉၵိုၵ်းသဝ်ဝႆႉ မိူဝ်ႈလႂ်တႄႉ ဢမ်ႇႁူႉၶႃႈ။ လႆႈငိၼ်းသဵင်ၽဵင်း ၵႂၢမ်း ဢွၵ်ႇမႃးႁႅင်းၵေႃႈ ဢွၼ်ၵၼ်တူၵ်းၸႂ်ၶႃႈဢေႃႈ။ ႁဝ်းၶႃႈ ထၢင်ႇဝႃႈ မီးၵူၼ်းသေတီႈတီႈပိုတ်ႇၽိတ်းၵူၺ်းယူဝ်ႉၼႆၵွၼ်ႇၶႃႈဢေႃႈ။ ၽိူဝ်ႇၵူတ်ႇ ထတ်းတူၺ်းလီလီၼႆ လႆႈႁၼ်ဢုတ်ႇသေႃႇၼၼ်ႉ မတ်ႉၵိုၵ်းသဝ်ၾႆးသေ ပိုတ်ႇၽဵင်းၵႂၢမ်းလွင်ႈသၢၼ်ၶတ်းသိုၵ်းမၢၼ်ႈၼၼ်ႉၶႃႈယဝ်ႉ”- ဝႃႈၼႆ။
ၵူၼ်းၼုမ်ႇတူၼ်ႈတီးၵေႃႉၼိုင်ႈလၢတ်ႈဝႃႈ သိုၵ်းမၢၼ်ႈၼႆႉ သႂ်ႇသႂ်ႇမႃးၽဵင်းၵႂၢမ်းၵူၺ်းၵေႃႈ ၶဝ်ၵူဝ်မႃးတိၵ်းတိၵ်းယဝ်ႉ ဝႃႈၼႆ။
“ပဵၼ်ၽဵင်းၵႂၢမ်းၼႄၵၢင်ၸႂ် ၽဵင်းၵႂၢမ်းၵၢၼ်မိူင်း သၢၼ်ၶတ်းသိုၵ်းမၢၼ်ႈ ။ ၽဵင်းၵႂၢမ်းၸိူဝ်းၼႆႉ ဢမ်ႇလႆႈငိၼ်းမႃးႁိုင်ယဝ်ႉ ၼႂ်းၵၢင်ဝဵင်းတူၼ်ႈတီး ၼႆႉ။ ၵူၺ်းၵႃႈ ဢမ်ႇမီးၽႂ်ႁတ်းၵႂႃႇယႃႉဢဝ်ဢလူင်းမႃး ဢုတ်ႇသေႃႇၼၼ်ႉ။ ယူႇမွၵ်ႈၶိုင်ႈၸူဝ်ႈမူင်းၼႆႉ သိုၵ်းမၢၼ်ႈတင်း ပလိၵ်ႈမၢၼ်ႈ ၸင်ႇၵႂႃႇယႃႉ ဢဝ်လူင်းၶႃႈဢေႃႈ။ ယၢမ်းလဵဝ်လႆႈႁူႉဝႃႈ ၶဝ်ၵူတ်ႇထတ်းၵွင်ႈထၢႆႇ ႁိမ်းႁွမ်း ၸွမ်းႁၢၼ်ႉၶၢႆ ၸိူဝ်းၼၼ်ႉယူႇၼႆဢေႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
ၽွင်းသိုၵ်းမၢၼ်ႈယိုတ်းမိူင်း ၽွင်းႁူဝ်ပီ 2021 ၼၼ်ႉ ၵူၼ်းမိူင်းတူၼ်ႈတီးၼႆႉၶဝ်ႈပႃးၼႂ်းၸၼ်ႉဢၼ်ဝႃႈ တူင်ႉတိုၼ်ႇသၢၼ်ၶတ်းသိုၵ်းမၢၼ်ႈႁၢဝ်ႈႁႅင်း။ သိုၵ်းမၢၼ်ႈၵေႃႈ မီးလွင်ႈလိုပ်ႈလမ်းတီႉၺွပ်းၵူၼ်းၼုမ်ႇ ၵူၼ်းမိူင်းမႃးတေႃႇသေႇ တေႃႇထိုင်ယၢမ်းလဵဝ်။ ၵူၼ်းၼုမ်ႇၵေႃႈ ပႅင်ႈၼင်ႇၵႃႈလႆႈတိုဝ်ႉတၢင်းၼၼ်ႉ သၢၼ်ၶတ်းသိုၵ်းမၢၼ်ႈယူႇၵူႈလၢႆးလၢႆး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ