ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၼႂ်းဝဵင်းတႃႈၶီႈလဵၵ်း မီးၽူႈလၵ်ႉၵူၼ်းၸူၼ်လိူင်ႇၼမ် မိူဝ်ႈဝႃးၼႆႉ ၵူၼ်းႁၢႆႉၽၼ်းၸဝ်ႈရူတ်ႉၶိူင်ႈသေ ႁိမ်ဢဝ်ရူတ်ႉၶိူင်ႈၵႂႃႇ ဝႃႈၼႆ။
ဝၼ်းတီႈ 17/1/2022 ယၢမ်းၵၢင်ၼႂ်မွၵ်ႈ 4 မူင်းၶိုင်ႈ ၵူၼ်းႁၢႆႉၸုမ်းၼိုင်ႈ ၽၼ်း ၵူၼ်းၶီႇရူတ်ႉၶိူင်ႈသေ ႁိမ်ဢဝ်ရူတ်ႉၶိူင်ႈၵႂႃႇ တီႈ တၢင်းၶဝ်ႈဝၢၼ်ႈမႂ်ႇ ႁိမ်းႁူင်းႁႅမ်းရီႇၵျီးၼႃး ပွၵ်ႉသၼ်သၢႆး(ၶ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး။
ၵူၼ်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မိူဝ်ႈဝႃးၵၢင်ၼႂ်ၸဝ်ႉၸဵမ်မိူဝ်ႈမိူင်းပႆႇလႅင်းပုၼ်ႉ။ လွင်ႈလူႉတၢႆတႄႉ ဢမ်ႇမီးၶႃႈ ၸဝ်ႈၶွင်ရူတ်ႉၶိူင်ႈၼၼ်ႉတႄႉ မၢတ်ႇၸဵပ်း ဢေႃႈ။ ၸုမ်းၵူၼ်းႁၢႆႉၼၼ်ႉ မီး လၢႆၵေႃႉတႄႉၵေႃႈ ဢမ်ႇလႆႈႁူႉၶႃႈ”- ဝႃႈၼႆ။
ဢိင်ၼိူဝ် လွင်ႈပိူင်ပဵၼ်ၼႆႉသေ ၵူၼ်းမိူင်းတႃႈၶီႈလဵၵ်းမႆႈၸႂ်ၵၼ် ယွၼ်ႉဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။
“ၵူဝ်ၶႃႈဢေႃႈ။ ယွၼ်ႉပဵၼ်ႁိမ်းပွၵ်ႉႁဝ်းၶႃႈ ယူႇၼႆႉၵူၺ်း။ တေၵႂႃႇတၢင်းၼွၵ်ႈၵူၺ်းၵေႃႈ လႆႈၵူဝ်ဢေႃႈၼႆႉ ၽူႈလၵ်ႉၵူၼ်းၸူၼ်ၼႆႉ မၼ်းလိူင်ႇၼမ်ႁႅင်းၼႃႇယဝ်ႉ တီႈတႃႈၶီႈလဵၵ်းၼႆႉ”- ၵူၼ်းပိုၼ်ႉတီႈ သိုပ်ႇ လၢတ်ႈၼႄထႅင်ႈၼင်ႇၼႆ။
ဝၢႆးသေ သိုၵ်းမၢၼ်ႈ ယိုတ်းမိူင်းမႃးၼႆႉ ရူတ်ႉၶိူင်ႈ ရူတ်ႉၵႃး ၵူၼ်းမိူင်း တႃႈၶီႈလဵၵ်း ႁၢႆယူႇၵူႈဝၼ်း။ လွင်ႈတႅင်းၽၼ်း ႁဵတ်းႁၢႆႉၵၼ်ၵေႃႈမီးယူႇၵူႈဝၼ်း။ ပလိၵ်ႈမၢၼ်ႈ သိုၵ်းမၢၼ်ႈ ဢဝ်ႁူမ်ႇလူမ်ႈပၼ်ၵူၼ်းမိူင်းၼႆသေ ၶီႇၵႃးပၼ်ႇလဵပ်ႉဝဵင်းတင်းၵၢင်ဝၼ်းလႄႈၵၢင်ၶိုၼ်း ယူႇသေတႃႉ ဢမ်ႇတွၼ်ႈတီႉၺွပ်းလႆႈ ၽူႈလၵ်ႉၵူၼ်းၸူၼ် သေပွၵ်ႈ။ ဢၼ် ၵူတ်ႇ ထတ်း ၸႅတ်ႈထၢမ် ၵူၼ်းၵႂႃႇမႃး ၸွမ်းသဵၼ်ႈတႃႈသၢႆတၢင်းၵေႃႈမီးႁၢဝ်ႈႁႅင်း ၵူႈဝၼ်း ၵူၼ်းတႃႈၶီႈလဵၵ်းလၢတ်ႈ။
