ၶူဝ်းၶွင်ဢၼ်ၸဝ်ႈတႃႇၼ ၸဝ်ႈၽူႈမီးၸေႇတၼႃႇ လၢႆလၢႆတၢင်းၸွႆႈထႅမ်တႃႇၵူၼ်းပၢႆႈၽေးသိုၵ်း ဢၼ်လုၵ်ႉမိူင်းယၢင်းလႅင်မႃးၼၼ်ႉ တႃႇတေႃႇသူင်ႇထိုင်မိုဝ်းၵူၼ်းပၢႆႈၽေးသိုၵ်း ယၢပ်ႇၽိုတ်ႇလိူဝ်ႁႅင်း ယွၼ်ႉသိုၵ်းမၢၼ်ႈၵူတ်ႇထတ်းထဵတ်ႈထၢမ်၊ ၸဝ်ႈၵႃးဢမ်ႇႁတ်းတၢင်ႇၵႂႃႇပၼ် ။
ၵူၼ်းပၢႆႈၽေးသိုၵ်း ၸႄႈမိူင်းယၢင်းလႅင် ဢၼ်ပၢႆႈမႃးသွၼ်ႈဝႆႉ ၼႂ်းၸႄႈဝဵင်းတူၼ်ႈတီး၊ ပၢင်လွင်း၊ သီႇသႅင်ႇ၊ ႁူဝ်ပူင်း၊ ဢွင်ႇပၢၼ်းလႄႈ တၢင်ႇ ၸႄႈဝဵင်း ၼႂ်းၸိုင်ႈတႆးပွတ်းၸၢၼ်း ထူပ်းတၢင်းယၢပ်ႇၽိုတ်ႇ တႃႇၶဝ်ႈၼမ်ႉတၢင်းၵိၼ် လွင်ႈၼုင်ႈဝႆ။ ၽႃႈႁူမ်ႇၶူဝ်းၼွၼ်း ဢၼ်ၸဝ်ႈတႃႇၼ လႄႈ ၸဝ်ႈၽူႈမီးၸေႇတၼႃႇ လူႇတၢၼ်းၸွႆႈထႅမ်ဝႆႉၸိူဝ်းၼၼ်ႉ ယူႇတီႈၸုမ်းၽူႈၸွႆႈထႅမ် ထူပ်းတၢင်း ယၢပ်ႇၽိုတ်ႇတႃႇဢဝ်သူင်ႇပၼ်။
ၽူႈ ၸွႆႈထႅမ် ၵူၼ်းပၢႆႈၽေးသိုၵ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸွမ်းသဵၼ်ႈတႃႈသၢႆတၢင်းၼႆႉ သိုၵ်းမၢၼ်ႈ ၵူတ်ႇထတ်း ၸႅတ်ႈထၢမ်ႁၢဝ်ႈႁႅင်းတႄႉၶႃႈ။ ၶူဝ်းၶွင် ဢၼ်တႃႇတေၵႂႃႇၸွႆႈၵူၼ်းပၢႆႈၽေးၵူၺ်း တိုၵ်ႉထုၵ်ႇၵူတ်ႇထတ်း ႁၢဝ်ႈႁၢဝ်ႈႁႅင်းႁႅင်းၶႃႈ။ ယဝ်ႉၵေႃႈ ပေႃးပဵၼ်ၶူဝ်းၵူၼ်းၸၢႆး ယိုင်ႈၶႅၼ်းၸႅတ်ႈႁႅင်းၶႃႈယဝ်ႉ။ မၢင်ၵဵတ်ႉၼႆႉ သိုၵ်းမၢၼ်ႈ ဢမ်ႇၶႂ်ႈ ပၼ် ၶၢမ်ႈၵဵတ်ႉၵွၼ်ႇၶႃႈဢေႃႈ” – ဝႃႈၼႆ။
ပေႃးပဵၼ်ရူတ်ႉၵႃး ဢၼ်တၢင်ႇၶူဝ်းၸွႆႈထႅမ်ၵူၼ်းပၢႆႈၽေးသိုၵ်းၼႆ ၵဵတ်ႉသိုၵ်းမၢၼ်ႈ ၵူတ်ႇထတ်း ၵဵပ်းငိုၼ်းႁၢဝ်ႈႁႅင်းသေဢမ်ႇၵႃး ၵဵပ်းတႅမ်ႈမၢႆဝႆႉပႃး မၢႆရူတ်ႉၵႃးထႅင်ႈလူးၵွၼ်ႇ ။ ၵႂႃႇမႃးဢမ်ႇလွတ်ႈလႅဝ်းလႄႈ ၽႂ်ၵေႃႈဢမ်ႇၶႂ်ႈတၢင်ႇပၼ်ဝႃႈၼႆ။
ယၢမ်းလဵဝ် သင်ဝႃႈ တေၵႂႃႇၸွႆႈၵူၼ်းပၢႆႈၽေးသိုၵ်းၼႆၸိုင် ထုၵ်ႇလီပဵၼ် ရူတ်ႉၵႃးၸုမ်းၶႂၢႆၶႃပႄလႅင် ဝႃႈၼႆ။
“ပႆႇဝႃႈရူတ်ႉၵႃးလႃႈ ၵဵတ်ႉမၢင်ဢၼ်ၵေႃႈ ဢမ်ႇၶႂ်ႈႁပ်ႉထႅင်ႈလူးၵွၼ်ႇ။ ယွၼ်ႉဝႃႈ လႆႈလၢတ်ႈတေႃႇသိုၵ်းမၢၼ်ႈႁႅင်းၼႃႇ။ၸဝ်ႈၵႃး ၶဝ် ၸိူင်ႉၵၢတ်ႈ တူၵ်းလႃႈ တူၵ်းလိုၼ်း။ ၵွပ်ႈၼႆလႄႈ ၵႃးၵဵတ်ႉမၢင်တီႈ ဢမ်ႇႁပ်ႉလုမ်းလုမ်းၵေႃႈမီးဢေႃႈ” – ၽူႈ ၸွႆႈထႅမ် ၵူၼ်းပၢႆႈၽေးသိုၵ်း သိုပ်ႇလၢတ်ႈထႅင်ႈၼင်ႇၼႆ။
ယၢမ်းလဵဝ် ယွၼ်ႉၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ၸုမ်းၵႅတ်ႇၶႄႁႄႉၵၢင်ႈၵူၼ်းမိူင်း ပဵၼ်ပၢင်တိုၵ်းၵၼ်ႁၢဝ်ႈႁႅင်းတၢင်းမိူင်းယၢင်းလႅင်သေ ႁဵတ်းႁႂ်ႈၵူၼ်းပၢႆႈၽေးသိုၵ်း မႃးတၢင်းမိူင်းတႆးပွတ်းၸၢၼ်းတင်းၼမ်။ ထူပ်းတၢင်းယၢပ်ႇၽိုတ်ႇ လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်၊ ၽႃႈႁူမ်ႇၶူဝ်းၼွၼ်း ၶူဝ်းၼုင်ႈတင်းဝႆ ၸိူဝ်းၼႆႉ တင်းၼမ် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ