ဝၼ်းတီႈ 10/1/2022 မိူဝ်ႈဝႃး ႁူဝ်ပဝ်ႈပႃႇတီႇၸိူဝ်ႉၸၢတ်ႈတဢၢင်း TNP မိူင်းၵိုင် မၢႆးၼုမ်ႇႁၢၼ် လႄႈလုၵ်ႈမေးမၼ်း လုၵ်ႉတီႈဝၢၼ်ႈမၢၵ်ႇၶီႈၼူၵ်ႉသေပွၵ်ႈၶိုၼ်းမိူင်းၵိုင် ႁၢႆတူဝ်ဝႆႉ ၵပ်းသိုပ်ႇၵေႃႈဢမ်ႇလႆႈ ၺႃးတီႉႁိုဝ်ပဵၼ်သင်ပႆႇႁူႉ။

ၵူၼ်းမိူင်းၵိုင် ဢၼ်ယူႇႁိမ်းၵိၼ်ၸမ် လႄႈပဵၼ်ပီႈပဵၼ်ၼွင်ႉၵၼ်တင်း မၢႆးၼုမ်ႇႁၢၼ် လၢတ်ႈတီႈ ၽူႈတွႆႇႁွၵ်ႈဝႃႈ – “မၢႆးၼုမ်ႇႁၢၼ် လႄႈလုၵ်ႈမေးမၼ်း မိူဝ်းဝၢၼ်ႈမၢၵ်ႇၶီႈၼူၵ်ႉ ၊မိူဝ်းႁႅၼ်းလူႇတၢၼ်းပၼ် ၵေႃႉပဵၼ်မႄႈ သေပွၵ်ႈမႃးၶိုၼ်းမိူင်းၵိုင်။ မိူဝ်ႈဝႃးမွၵ်ႈၵၢင်ဝၼ်း 11 မူင်း မၼ်းၵပ်းသိုပ်ႇမႃးဝႃႈ ထိုင်တူင်ႇလၢဝ်းယဝ်ႉ ၼႆသေ ဝၢႆးလင်ၼၼ်ႉၵေႃႈ  တိတ်းတေႃႇဢမ်ႇလႆႈယဝ်ႉ။  ၵပ်းသိုပ်ႇတူၺ်း တီႈႁိူၼ်းပီႈၼွင်ႉလႄႈ ၵူၼ်းႁူႉၸၵ်းတီႈမၼ်းၵႆႉမိူဝ်းဢႅဝ်ႇႁႃၵေႃႈဝႃႈဢမ်ႇမႃးဢမ်ႇႁၼ်ၼႆသေတီႈလႄႈ ၶဝ်ဢွၼ်ၵၼ်မႆႈၸႂ်ဝႃႈၺႃးသေၸုမ်းၸုမ်းတီႉႁႃႉဢမ်ႇၼၼ် ပဵၼ်ၽေးဢုပၢတ်ႈႁႃႉၼႆယူႇဢေႃႈ။ တေလႆႈတိူင်ႇတီႈလႂ် လၢတ်ႈတီႈလႂ်ၵေႃႈဢမ်ႇႁူႉ ” – ဝႃႈၼႆ။

မၢႆးၼုမ်ႇႁၢၼ်ၼႆႉ ၵေႃႉပဵၼ်မႄႈမၼ်း ယႃႈထၢၼ်ငဵင်း ဢႃယု 70 ပီ ၺႃးရူတ်ႉၵႃးၽႃႇလူႉတၢႆလႄႈ မၼ်းဢဝ်လုၵ်ႈမေးမၼ်းမိူဝ်းတီႈဝၢၼ်ႈမၢၵ်ႇၶီႈၼူၵ်ႉ ႁႅၼ်းလူႇႁႅၼ်းတၢၼ်းပၼ်ၵေႃႉပဵၼ်မႄႈ။ ၽွင်းပွၵ်ႈႁိူၼ်းၶိုၼ်းၼၼ်ႉ ႁၢႆၵႂႃႇၼႂ်းၵႄႈ တူင်ႇလၢဝ်းလႄႈမိူင်းၵိုင် ။ ပႃးတင်းမေးၼၢင်းမၼ်းလႄႈ လုၵ်ႈဢွၼ်ႇမၼ်းဢႃယု 7 လိူၼ် ဝႃႈၼႆ။

“မေးမၼ်းၵေႃႈ ပၢႆးယူႇလီဢမ်ႇပေႃးၶႅမ်ႉ။ ၶၢဝ်းဝၢၼ်ႈမိူင်းသုၵ်ႉယုင်ႈ ၵၢၼ်သိုၵ်းၵၢၼ်သိူဝ်ႁၢႆႉႁႅင်းၸိူင်ႉၼႆ ဢမ်ႇၸၢင်ႈၵႂႃႇၸႂ်ယႂ်ႇၽႂ်။ သင်ဝႃႈၽႂ်တီႉဝႆႉၵေႃႈ ၶႅၼ်းတေႃႉပွႆႇပၼ်ၶိုၼ်းဝႆးဝႆးသေၵမ်း။ မႆႈၸႂ်ပၢႆးယူႇလီၶဝ်ၶႃႈဢေႃႈ ”- ၵူၼ်းယူႇႁိမ်းၵိၼ်ၸမ် သိုပ်ႇလၢတ်ႈထႅင်ႈၼင်ႇၼႆ။

ႁူဝ်ပဝ်ႈ ပႃႇတီႇတဢၢင်း TNP ၸႄႈဝဵင်းမိူင်းၵိုင် မၢႆးၼုမ်းႁၢၼ်းၼႆႉ ဢၢၼ်းၶဝ်ႈၶေႉၶဵင်ႇလိူၵ်ႈတင်ႈမိူဝ်ႈပီ 2020  တီႈၼေႃႇၽူႈတႅၼ်း သၽႃးၸိူဝ်ႉၸၢတ်ႈ   TNP ၼႂ်းၶဵတ်ႇလိူၵ်ႈတင်ႈၸႄႈတွၼ်ႈလွႆလႅမ် – လၢင်းၶိူဝ်း။ ၵူၺ်းၵႃႈသိုၵ်းမၢၼ်ႈဝႃႈ ပဵၼ်ၼႃႈတီႈဢမ်ႇၵတ်းယဵၼ်ၼႆသေႁၢမ်ႈၸတ်းပၢင်လိူၵ်ႈတင်ႈ လၢႆလၢႆၸႄႈဝဵင်းၼႂ်းၸိုင်ႈတႆး ။ ၼႂ်းၼၼ်ႉပႃးၸႄႈဝဵင်းမိူင်းၵိုင်။