ႁွင်ႈၵၢၼ်ၾၢႆႇႁူင်းႁႅမ်းလႄႈ ဢွၵ်ႇၶၢဝ်းတၢင်း ၶွင်ႇသီႇသိုၵ်းမၢၼ်ႈ ႁူမ်ႈ ၾၢႆႇၽွင်းငမ်း ၸႄႈဝဵင်းၵဵင်းတုင် ဝဵင်းလွႆမူၺ် သေ ႁဵတ်းပွႆးမွၵ်ႇၵွၼ်ႇ ၶၢဝ်းတၢင်း 5 ဝၼ်း၊ ၵူၼ်းဝၢၼ်ႈ ၵူၼ်းမိူင်း ၼႂ်းပိုၼ်ႉတီႈ မႆႈၸႂ် ၵူဝ်တၢင်းပဵၼ် ၶူဝ်ႊဝိတ်ႉ 19 ၽႄႈလၢမ်းထႅင်ႈ။

မိူဝ်ႈၼႆႉ ဝၼ်းတီႈ 6/1/2022 တေႃႇထိုင် ဝၼ်းတီႈ 10/1/2022 ဝဵင်းလွႆမူၺ် ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၸတ်းႁဵတ်းပၢင် ပွႆးမွၵ်ႇၵွၼ် (ချယ်ရီပန်းပွဲတော် ၂၀၂၂) ။ ၵူၼ်းတၢင်ႇတီႈ သီႇလႅၼ် ဢွၼ်ၵၼ် မႃးတူၺ်းမွၵ်ႇ မႃးထၢႆႇႁၢင်ႈ ၵိုၼ်းၶွၼ်ႈဝႆႉလႄႈ ၵူၼ်းၼႂ်းပိုၼ်ႉတီႈ ၵူဝ်တၢင်းပဵၼ် ၶူဝ်ႊဝိတ်ႉ  19 ၽႄႈလၢမ်း။

ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “တီႈၵဵင်းတုင်ၼႆႉ တိုၵ်ႉမီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ 19 ယူႇ။ သင်ဝႃႈ ႁဵတ်းပွႆး ၸိူင်ႉၼႆတႄႉ ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တေၸၢင်ႈၽႄႈလၢမ်းမႃးထႅင်ႈလိူဝ်ၵဝ်ႇၶႃႈဢေႃႈ လွင်ႈၼႆႉပဵၼ်ဢၼ်မႆႈၸႂ်ၸွမ်း တႄႉၶႃႈ”- ဝႃႈၼႆ။

တႄႇဢဝ် လိူၼ်ၻီႊသႅမ်ႊပိူဝ်ႊ 2021 ၼႆႉမႃး တီႈဝဵင်းလွႆမူၺ်ၼႆႉ ၵူၼ်းလၢႆတီႈလၢႆတၢင်း ဢွၼ်ၵၼ်ၶိုၼ်ႈၵႂႃႇဢႅဝ်ႇ တူၺ်း တၢင်းႁၢင်ႈလီ မွၵ်ႇၵွၼ်၊ ထၢႆႇၶႅပ်းႁၢင်ႈ တၢင်ႇၶိုၼ်ႈၼိူဝ်ဢွၼ်ႊလၢႆႊ၊ ၸိူဝ်းသႂ်ႇၽႃႈတူမ်းသူပ်းၵေႃႈမီး၊ ၸိူဝ်းဢမ်ႇသႂ်ႇၵေႃႈၼမ်။

“ၶၢဝ်းမွၵ်ႇၵွၼ် ၵီႈႁၢင်ႈလီလႄႈ ဢွၼ်ၵၼ်ၵႂႃႇဢႅဝ်ႇၼမ်၊ တုၵ်းယွၼ်းထိုင် ၵူႈၵေႃႉ ႁႂ်ႈသႂ်ႇၽႃႈတူမ်း သူပ်းၵၼ် ၵႆႉလၢင်ႉ မိုဝ်း၊ ႁႂ်ႈႁဵတ်းၸွမ်းပိူင်ပၢႆးယူႇလီ တမ်းဝၢင်းဝႆႉၼၼ်ႉ ၼင်ႇႁိုဝ် တၢင်းပဵၼ် ပေႃးတေဢမ်ႇလၢမ်းႁႅင်း”- ၵူၼ်းလွႆမူၺ် ၵဵင်းတုင်တိုၵ်းသူၼ်းၼင်ႇၼႆ။

ပၢင်ပွႆးမွၵ်ႇၵွၼ် တီႈဝဵင်းလွႆမူၺ်ၼႆႉ ယူႇတီႈ ႁွင်ႈၵၢၼ်ၾၢႆႇႁူင်းႁႅမ်း လႄႈ ဢွၵ်ႇတႃႈပႆတၢင်း (ဟိုတယ်နှင့်ခရီးသွား လာရေး၀န်ကြီး ဌာန) တႂ်ႈ ၶွင်ႇသီႇသိုၵ်းမၢၼ်ႈ ယိုတ်းမိူင်း ၸတ်းႁဵတ်း ၼႆႉယဝ်ႉ။

ဝဵင်းလွႆမူၺ်ၼႆႉ ပေႃးထိုင်မႃး ၶၢဝ်းၵတ်းၸိုင် ပဵၼ်ၶၢဝ်းမွၵ်ႇၵွၼ်ၵီႈႁၢင်ႈလီ တီႈၼိုင်ႈ ၼႂ်းၸႄႈဝဵင်းၵဵင်းတုင်သေ ဢမ်ႇဝႃႈ ၵူၼ်းပိုၼ်ႉတီႈ ၵူၼ်း တၢင်ႇတီႇသီႇလႅၼ် တၢင်ႇဝဵင်း ၸိူဝ်းၼႆႉၵေႃႈမႃးဢႅဝ်ႈယႅမ်ႈတူၺ်းၼမ် ။