ဝၢႆးသေ ၵူၼ်းၵဵပ်းၶွၼ်ႇၶွင်သိုၵ်း TNLA ထုၵ်ႇယိုဝ်းတၢႆထင်တီႈ ၼႂ်းၵၢတ်ႇၼမ်ႉၶမ်းယဝ်ႉၼၼ်ႉ ၵူၼ်းၶၢႆၶူဝ်းၼႂ်းၵၢတ်ႇ ၵမ်ႈၽွင်ႈ ဢမ်ႇႁတ်းၵႂႃႇၶၢႆ မၢင် ၵေႃႉ တေႃႉၶူဝ်းၵုၼ်ႇ ပွၵ်ႈၶိုၼ်းႁိူၼ်းယေး ၽႂ်မၼ်း ၵေႃႈမီး ဝႃႈၼႆ။
ၼႂ်းဝၼ်းတီႈ 5-6-/1/2022 ၶၢဝ်းတၢင်း 2 ဝၼ်းမႃးၼႆႉ ၼႂ်းၵၢတ်ႇလူင် ဝဵင်းၼမ်ႉၶမ်း ယဵၼ်သီႇ ၵူၼ်းၵႃႉၶၢႆဢမ်ႇႁတ်းၵႂႃႇပိုတ်ႇႁၢၼ်ႉၶၢႆၶူဝ်း ၊ မႆႈၸႂ်လွင်ႈႁူမ်ႇလူမ်ႈ မၢင်ၵေႃႉတေႃႉၶူဝ်းၵုၼ်ႇ ပွၵ်ႈၶိုၼ်းႁိူၼ်းယေး ၽႂ်မၼ်း ၸိူဝ်းၼႆႉၵေႃႈမီး ၵူဝ်ၵၢတ်ႇပဵၼ်သေၸိူဝ်ႉသေလွင်ႈ ဝႃႈၼႆ။
ၵူၼ်း ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ၵၢတ်ႇလူင်ၼမ်ႉၶမ်းၼႆႉ မိူဝ်ႈဝႃးတင်းမိူဝ်ႈၼႆႉတႄႉ ယဵၼ်သီႇၶႃႈ ဢမ်ႇမီးၽႂ်ၵႂႃႇပိုတ်ႇႁၢၼ်ႉ ၶၢႆၶူဝ်းၵၼ်။ ယွၼ်ႉဢမ်ႇမီးလွင်ႈႁူမ်ႇလူမ်ႈလႄႈ ၵူဝ်ပိူၼ်ႈမႃးႁဵတ်းႁၢႆႉတေႃႇၵူၼ်းၶၢႆၵၢတ်ႇ ယဝ်ႉၵေႃႈ ၵူဝ်ပိူၼ်ႈမႃးၽဝ်ၵၢတ်ႇ ၸိူဝ်းၼႆႉ။ ၸဝ်ႈၵုၼ်ႇၵမ်ႈၽွင်ႈ တေႃႉၶူဝ်းၵုၼ်ႇၶဝ်ပွၵ်ႈၶိုၼ်းႁိူၼ်းယေး ၶႃႈဢေႃႈ။ ၵၢတ်ႇတႄႉ ပိုတ်ႇ ယူႇ ၼႂ်းၶၢဝ်းတၢင်းဝူင်ႈဝၢင်ႈၼႆႉ ၵူၺ်းဢမ်ႇပိုတ်ႇႁၢၼ်ႉၶၢႆၶူဝ်း”- ဝႃႈၼႆ။
မိူဝ်ႈဝၼ်းတီႈ 4/1/2022 ပူၼ်ႉမႃး ၵူၼ်းၵဵပ်းၶွၼ်ႇ သိုၵ်း TNLA မႃးၵဵပ်းၶွၼ်ႇၼႂ်းၵၢတ်ႇလူင် ဝဵင်းၼမ်ႉၶမ်း ယူႇၼၼ်ႉ ထုၵ်ႇၵူၼ်းဢမ်ႇႁူႉၾၢႆႇ မႃးယိုဝ်း။ ၵူၼ်းၶၢဝ်ၶူဝ်းၼႂ်းၵၢတ်ႇလၢတ်ႈဝႃႈ ဢၼ်ပႆႇလႆႈသႂ်ႇၶွၼ်ႇပၼ် TNLA ၼႆႉၵိုတ်းဢိတ်းၼိုင်ႈၵူၺ်းယဝ်ႉဝႃႈၼႆ။
“ၵူၼ်းပႆႇလႆႈသႂ်ႇၶွၼ်ႇၵိုတ်းဢိတ်းဢွၼ်ႇၵူၺ်းယဝ်ႉၶႃႈၼႂ်းၵၢတ်ႇၼႆႉတႄႉ။ မၼ်းမႃးၵဵပ်းလၢႆပွၵ်ႈယဝ်ႉလူး။ ဝၢႆးပဵၼ်ပၼ်ႁႃယိုဝ်းၵၼ်တၢႆယဝ်ႉၼၼ်ႉ ႁၢၼ်ႉၶၢႆၶူဝ်းၼႂ်းၵၢတ်ႇတႄႉပိၵ်ႉၵမ်ႈၼမ်ယဝ်ႉၶႃႈ။ ၸဝ်ႈၽၵ်းၶဵဝ်ၵူၺ်းယဝ်ႉၶႃႈဢေႃႈ ဢၼ်ၶၢႆယူႇၸွမ်းၼွၵ်ႈၵၢတ်ႇၸိူဝ်းၼႆႉ။ ” – ၵူၼ်းၶၢႆၶူဝ်းၼႂ်းၵၢတ်ႇသိုပ်ႇလၢတ်ႈၼင်ႇၼႆ။
ဝၢႆးသေ ၵူၼ်းၵဵပ်းၶွၼ်ႇ သိုၵ်း TNLA ထုၵ်ႇယိုဝ်းတၢႆ ၼႂ်းၵၢင်ၵၢတ်ႇလူင် ဝဵင်းၼမ်ႉၶမ်းယဝ်ႉၼၼ်ႉ မိူဝ်ႈဝႃးဝၼ်းတီႈ 5/1/2022 ယၢမ်းၵၢင်ၼႂ် သိုၵ်း TNLA ဢဝ်ဢဵၼ်ႁႅင်းတင်းၼမ် မႃးလွၵ်ႇငိုတ်ႈ ၼႄၾၢင်ႁၢင်ႈ တူင်ႉၼိုင်ႈၶဝ်ႈမႃးၸွမ်းသၢပ်ႇဝဵင်းၼမ်ႉၶမ်း တၢင်းပွၵ်ႉၵွင်းၼွင်ၸၢင်ႉၼၼ်ႉ သေ ဝၢႆးသေ သိုၵ်းၶဝ် ထွႆထွၼ်ၵႂႃႇပႆႇႁိုင် လႆႈပဵၼ်ပၢင်တိုၵ်းၵၼ်ႁၢဝ်ႈႁႅင်း ၸွမ်းသိုၵ်းမၢၼ်ႈ ႁဵတ်းႁႂ်ႈတိူဝ်ႉတုမ်ႉ ၵူၼ်းမိူင်းၺႃးၸၢၵ်ႇမၢတ်ႇၸဵပ်း ၸွမ်း၊ ႁိူၼ်းယေး ၵူၼ်းဝၢၼ်ႈ ၵမ်ႈၽွင်ႈလူႉၵွႆၸွမ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ