မိူဝ်ႈၼႆႉ ဝၼ်းတီႈ 4/1/20200 ယၢမ်းဝၢႆးဝၼ်း မွၵ်ႈ 1 မူင်းၶိုင်ႈ ၼႂ်းၵၢတ်ႇလူင် ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ မီး လွင်ႈပိုတ်းယိုဝ်းၵၼ်ၼႂ်းၵၢတ်ႇ ၽူႈၸၢႆး 2 ၵေႃႉလူႉတၢႆ ။
ၵူၼ်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ ဢၼ်ၺႃးယိုဝ်းတၢႆ 2 ၵေႃႉၼႂ်းၵၢတ်ႇၼၼ်ႉ လႆႈႁူႉဝႃႈပဵၼ်ၵူၼ်းမႃး ၵဵပ်းၶွၼ်ႇၶွင်ၸုမ်းသိုၵ်း TNLA ၼႆၶႃႈ။ၵူၺ်း ဢမ်ႇပႆႇႁူႉတႅတ်ႈတေႃးၶႃႈ။ ယွၼ်ႉမီးလွင်ႈပိုတ်းယိုဝ်းၵၼ်ၸိူင်ႉၼၼ်သေလႄႈ ၵူၼ်းၶၢႆႁၢၼ်ႉ ၼႂ်းၵၢတ်ႇ တူၵ်းၸႂ် ဢွၼ်ၵၼ် ၼႅတ်ႈပိၵ်ႉဢိုတ်းႁၢၼ်ႉ မူတ်းၶႃႈဢေႃႈ”- ဝႃႈၼႆ။
ၵူၼ်းဢၼ်မႃးယိုဝ်းၼၼ်ႉတႄႉ ပဵၼ်ၽႂ်လုၵ်ႉလႂ်မႃးတႄႉဢမ်ႇႁူႉ ဝႃႈၼႆ။
လွင်ႈၼႆႉ ၽူႈတွႆႇႁွၵ်ႈၶတ်းၸႂ် တိတ်းတေႃႇတူၺ်းတီႈ ၽူႈၶၢၼ်ပၢၵ်ႇ TNLA ၵေႃႈ ဢမ်ႇလႆႈလႄႈ ပိူင်ပဵၼ်လွင်ႈယိုဝ်းၵၼ်တၢႆၼၼ်ႉ ပဵၼ်ႁိုဝ်၊ ၵူၼ်းတၢႆၼၼ်ႉ ပဵၼ်ၵူၼ်း TNLA တႄႉႁႃႉ ဢမ်ႇၸႂ်ႈၼႆတႄႉ ပႆႇၸၢင်ႈယိုၼ်ယၼ်။
မိူဝ်ႈလိူၼ်ၻီႊသႅမ်ႊပိူဝ်ႊ 2021 ၼၼ်ႉ ယွၼ်ႉသိုၵ်းတဢၢင်း TNLA ၵဵပ်းၶွၼ်ႇၼႂ်းၵၢတ်ႇဝဵင်းၼမ်ႉၶမ်း ႁၢဝ်ႈႁႅင်း။ ယူႇတီႈၵူၼ်းၶၢႆ ၵၢတ်ႇ ဢွၼ်ၵၼ် သၢၼ်ၶတ်းၼႄၵၢင်ၸႂ် ပိၵ်ႉဢိုတ်းႁၢၼ်ႉၶၢႆၼႂ်းၵၢတ်ႇ တႃႇၶၢဝ်းတၢင်း 5 ဝၼ်း ။
ယၢမ်းလဵဝ် ငဝ်းလၢႆးဝၢၼ်ႈမိူင်းၵေႃႈသုၵ်ႉ တၢင်းပဵၼ်ၶူဝ်ႊဝိတ်ႉ 19 ၵေႃႈ ၽႄႈလၢမ်းႁႅင်းသေ ၼွၵ်ႈလိူဝ်ၼႆႉ သိုၵ်းတဢၢင်း TNLA သမ်ႉ ၶဝ်ႈၵဵပ်း ၶွၼ်ႇၼႂ်းၵၢတ်ႇၼမ်ႉၶမ်းႁၢဝ်ႈႁႅင်းထႅင်ႈ ႁဵတ်းၵၢၼ်ၵူၼ်းမိူင်းပိုၼ်ႉတီႈထူပ်းတၢင်းယၢပ်ႇၽိုတ်ႇ ၵိၼ်းၸႂ်မႃးလိူဝ်ၵဝ်ႇ ၵူၼ်းၼမ်ႉၶမ်း လၢတ်ႈ။
