မိူဝ်ႈၼႆႉဝၼ်းတီႈ 31/10/2022 ယၢမ်းၵၢင်ဝၼ်း 12:37 မူင်း လုၵ်ႈလၢင်းၵူၼ်းႁိူၼ်း ၸွမ်းႁႃတူဝ် ပႃႈၼၢင်းၺူဝ်ႇ ဢႃယု 59 ပီ ၵေႃႉပဵၼ်မႄႈဢၼ်ႁၢႆဝႆႉ၊ ၵႂႃႇႁၼ်ၺႃးယိုဝ်းတၢႆသေပႅတ်ႈဝႆႉ တီႈတၢင်းၶဝ်ႈဝၢၼ်ႈၼမ်ႉလိၼ်း ဢိူင်ႇၼွင်လႅင် ဝဵင်းပၢင်လူင် ၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း  ။

ၵူၼ်းပိုၼ်ႉတီႈ ဝဵင်းပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ – “မၼ်းၼၢင်းၼႆႉ ထုၵ်ႇၵူၼ်းႁၢႆႉ ယိုဝ်းတၢႆပႅတ်ႈဝႆႉ တၢင်းၶဝ်ႈဝၢၼ်ႈၼမ်ႉ လိၼ်း။ တီႈတူဝ်တၢႆမၼ်းၼၢင်းၼၼ်ႉ တိူဝ်ႉၺႃးမၢၵ်ႇၵွင်ႈလုၵ်ႈၼိုင်ႈ တီႈၸိၵ်းႁူဝ် ပွင်ႇမႃးတၢင်းၵႅမ်ႈၾၢႆႇသၢႆႉမၼ်းၼၢင်း။ ပိူၼ်ႈ လႅပ်ႈတေၸႂ်ႉမၼ်းၼင်ႈသေၵွင်ႈ ၸမ်ႈႁူဝ်မၼ်းသေ ယိုဝ်းသႂ်ႇ ၸိူင်ႉၼၼ်ၶႃႈၼႄႈ” – ဝႃႈၼႆ။

ယၢမ်းလဵဝ် တူဝ်တၢႆ ပႃႈၺူဝ်ႇၼႆႉ လႆႈလုမ်းလႃးဝႆႉတီႈႁူင်းယဵၼ် ဝဵင်းပၢင်လူင်ဝႆႉ ယွၼ်ႉဢမ်ႇၸႂ်ႈၵၢၼ်တၢႆ ထမ်ႇမတႃႇ (ယူဝ်းယူဝ်း) လႄႈ လုမ်းလႃးပူၼ်ႉၶၢပ်ႈတူဝ်ၵႂႃႇ တီႈၼၼ်ႈၵမ်းလဵဝ် ၵူၼ်းဝဵင်းပၢင်လူင်လၢတ်ႈ။

မိူဝ်ႈဝႃး ဝၼ်းတီႈ 30/10/2022 ယၢမ်းၵၢင်ၶမ်ႈ 7 မူင်း မီးၵူၼ်းဢမ်ႇႁူႉၾၢႆႇ မႃးၸူးပႃႈၼၢင်းၺူဝ်ႇ တီႈႁိူၼ်း သေလၢတ်ႈဝႃႈ ၶႂ်ႈသိုဝ်ႉသူၼ်၊ ၼႆလႄႈပႃႈၼၢင်းၺူဝ်ႇ ၶီႇၵႃးၵႂႃႇၸွမ်းၶဝ်ႁၢႆၵႂႃႇတင်းၶိုၼ်း၊ လုၵ်ႈလၢင်း ၵူၼ်းႁိူၼ်းၸွမ်းၶႆႈ တေႃႇထိုင် မိူဝ်ႈၼႆႉ ယၢမ်းဝၢႆးဝၼ်း ၸင်ႇတေထူပ်းႁၼ် တူဝ်တၢႆ – ၵူၼ်းပၢင်လူင် သိုပ်ႇလၢတ်ႈၼင်ႇၼႆ။

တေႃႇထိုင်ယၢမ်းလဵဝ် ပဵၼ်ၽႂ်ၵေႃႉမႃးႁွင်ႉမၼ်းၼၢင်းၵႂႃႇသေ ယိုဝ်းတၢႆယွၼ်ႉလူၺ်ႈသင်ဢၼ်ဝႃႈၼၼ်ႉ ၽႂ်ယင်းပႆႇႁူႉလႄႈ ၽူႈတွႆႇႁွၵ်ႈဢမ်ႇၸၢင်ႈယိုၼ်ယၼ်လၢတ်ႈပဵၼ်တၢင်းၵၢၼ်။  ၵူၼ်းပိုၼ်ႉတီႈတႄႉ လၢတ်ႈဝႃႈ ပႃႈၼၢင်းၺူဝ်ႇၶဝ်ၼႆႉပဵၼ် ၸဝ်ႈၵၢၼ်ပၢႆးမၢၵ်ႈမီးယႂ်ႇလႄႈလႅပ်ႈတေပဵၼ် ၵဵဝ်ႇၵပ်း လွင်ႈ ငိုၼ်းတွင်းၵူၺ်းႁိုဝ်ဝႃႈၼႆယူႇ။

ပႃႈၼၢင်းၺူဝ်ႇၼႆႉ ပဵၼ်ၵူၼ်းဝၢၼ်ႈ ပွၵ်ႉ 4 ဝဵင်းပၢင်လူင် မီးလုၵ်ႈလၢင်းဝႆႉ 5 ၵေႃႉ ။ ပဵၼ်ၸဝ်ႈၶွင်ပၢမ်ႉၼမ်ႉမၼ်းဢၼ်မီးတၢင်းၶဝ်ႈ ဢွၵ်ႇဝဵင်းပၢင်လူင် – လၢႆးၶႃႈ လႆႈႁူႉၼင်ႇၼႆ။