ႁၢင်ပီ 2021 တႅင်ၸမ်ႇပူႇ ဢၼ်လုၵ်ႉတၢင်းဝဵင်းလိူဝ်ႇ(မၼ်းတလေး) တၢင်ႇၶိုၼ်ႈမိူင်းတႆး ဢၢၼ်းတေႃႉသူင်ႇၶၢႆၸူးလႅၼ်လိၼ်ၶႄႇ လႆႈမႃးပႂ်ႉ တီႈ 105 လၵ်း ၸႄႈဝဵင်းမူႇၸေႊ ႁိုင်လႄႈ တႅင်ၼဝ်ႈပႅတ်ႈလၢႆလႆႈ ထွၵ်ႇပႅတ်ႈ ပဵၼ်ၵေႃႇပဵၼ်ၵွင် ၸွမ်းသဵၼ်ႈတႃႈသၢႆတၢင်း ။
ၸဝ်ႈၵႃး တၢင်ႇတႅင် လၢတ်ႈတီႈၽူႈတွႆႇႁွၵ်ႈဝႃႈ – “တႃႇတေသူင်ႇၶဝ်ႈ တၢင်းမိူင်းၶႄႇၼႆႉ မီးလွင်ႈယၢပ်ႇၽိုတ်ႇတႄႉ။ လႆႈပႂ်ႉၸွမ်းတၢင်းၼႆႉ ႁိုင်ပဵၼ် ၽၢၵ်ႇလိူၼ်ၶႃႈဢေႃႈ။ တႅင်ၼဝ်ႈပႅတ်ႈလၢႆ လႆႈထွၵ်ႇပႅတ်ႈၸွမ်းတၢင်းၽွင်ႈၵေႃႈမီးဢေႃႈ”- ဝႃႈၼႆ။
ၵူၼ်းၵႃႉတႅင် တီႈဝဵင်းမူႇၸေႊ လၢတ်ႈဝႃႈ ပီၼႆႉ ၶၼ်တႅင်သုင်ယူႇသေတႃႉ လုၵ်ႉတီႈသူၼ်သေ တေႃႇထိုင်လႆႈၶၢမ်ႈလႅၼ်လိၼ် ႁိုင်မွၵ်ႈ 15 ဝၼ်း ထိုင်တီႈမၢၵ်ႇတႅင်ပေႃးၼဝ်ႈသေလႆႈဢဝ်ပႅတ်ႈ ဝႃႈၼႆ။
“ဢၼ်ႁဝ်းၶႂ်ႈဝႃႈတႄႉ ၵူၼ်းၶႂ်ႈသိုဝ်ႉတႅင်တႄႉ ၼမ်ယူႇ။ ဢၼ်လႆႈဢဝ်ဢွၵ်ႇၶၢႆသမ်ႉဢေႇၼႃႇ ၼေႃႈ။ ၵွပ်ႈၼႆ ၶၼ်တႅင်ၵေႃႈသုင်ယူႇဢေႃႈတလဵဝ်တႄႉ။ ၵူၺ်းၵႃႈ တႅင်ႁဝ်းသမ်ႉ လႆႈပႂ်ႉၶၢဝ်းယၢမ်းႁိုင်လႄႈ ၼမ်ႉၼၵ်းၵေႃႈလူတ်း၊ ၾၢင်ႁၢင်ႈ မၼ်းၵေႃႈတူၵ်း ၊ ၵႃႈတၢင်ႇ/ ၵႃႈၸႂ်ႉၸၢႆႇသမ်ႉၼမ်။ ၵွပ်ႈၼႆ လႆႈၼမ်ႉမျၢတ်ႈၼမ်ႉတွၼ်းဢေႇ ၶႃႈ။ မၢင်ၸိူဝ်းဢမ်ႇလႆႈၼမ်ႉမျၢတ်ႈသေဢိတ်းၵေႃႈမီးဢေႃႈ”- ၵူၼ်းၵႃႉတႅင် ဝဵင်းမူႇၸေႊသိုပ်ႇလၢတ်ႈၼင်ႇၼႆ။
ယၢမ်းလဵဝ် ယွၼ်ႉၵၢၼ်မိူင်းဢမ်ႇၼိမ်သဝ်း၊ ငဝ်းလၢႆးတၢင်းပဵၼ်ၶူဝ်ႊဝိတ်ႉ 19 ၵေႃႈ ၽႄႈလၢမ်းႁႅင်း တႃႇတေတၢင်ႇၶူဝ်းၵုၼ်ႇၶဝ်ႈတၢင်းမိူင်းၶႄႇ ၼၼ်ႉ ၶၵ်ႉတွၼ်ႈၵေႃႈမီးၼမ် လႆႈသႂၢင်းၶွၼ်ႇ ၸိူဝ်းၼႆႉၵေႃႈၼမ်လႄႈ တွၼ်ႈတႃႇၸဝ်ႈသူၼ် ၵူၼ်းၵႃႉၶၢႆတႅင် ၸိူဝ်းၼႆႉ ထူပ်းတၢင်းလွင်ႈယၢပ်ႇ ၽိုတ်ႇၵၼ် တင်းၼမ် ၼႆယဝ်ႉ။
 တၢင်ႇၶိုၼ်ႈမိူင်းတႆး ဢၢၼ်းတေႃႉသူင်ႇၶၢႆၸူးလႅၼ်လိၼ်ၶႄႇ လႆႈမႃးပႂ်ႉ တီႈ 105 လၵ်း ၸႄႈဝဵင်းမူႇၸေႊ ႁိုင်လႄႈ တႅင်ၼဝ်ႈပႅတ်ႈလၢႆလႆႈ ထွၵ်ႇပႅတ်ႈ ပဵၼ်ၵေႃႇပဵၼ်ၵွင် ၸွမ်းသဵၼ်ႈတႃႈသၢႆတၢင်း ။){kind=link}