ဝၼ်းတီႈ 23/12/2021 ၶမ်ႈဝႃး ယၢင်းၵၢင်ၶိုၼ်းလိုၵ်း သိုၵ်းမၢၼ်ႈႁႅၼ်းသိုၵ်းလေႃႇတိုၵ်း ၸုမ်းသိုၵ်းၵူၼ်းမိူင်း PDF လႄႈသိုၵ်းယၢင်း တီႈထုင်ႉ လေးၵေႉၵေႃႇ ဝဵင်းမျႃႉဝတီႇ မိူင်းယၢင်းၽိူၵ်ႇ လႅၼ်လိၼ် ယၢင်း-ထႆး၊ ၸႂ်ႉၶိူင်ႈမိၼ်ယိုဝ်းသိုၵ်းလၢမ်းယိုဝ်းလူင်းသႂ်ႇဝၢၼ်ႈၵူၼ်း။
သိုၵ်းမၢၼ်ႈယိုဝ်းၵွင်ႈလူင်လူင်းဢမ်ႇယွမ်း 50 ၵမ်း။ တူၵ်းသႂ်ႇႁိမ်းႁွမ်းဝၢၼ်ႈၵူၼ်းယူႇသဝ်း။ ၾၢႆႇသိုၵ်းၵႅတ်ႇၶႄၵူၼ်းမိူင်း PDF တႄႉဢမ်ႇမီးလွင်ႈယိုဝ်းတုမ်ႉတွပ်ႇၶိုၼ်း ၵူၼ်းပိုၼ်ႉတီႈလၢတ်ႈ – ၶၢဝ်ႇယၢင်း KIC ဢွၵ်ႇဝႆႉၼင်ႇၼႆ။
မၢၵ်ႇဢၼ်သိုၵ်းမၢၼ်ႈယိုဝ်းလူင်းၼၼ်ႉပဵၼ်သႅၼ်း 60 mm – 81 mm – 120 mm ၸိူဝ်းၼႆႉ။ တူၵ်းသႂ်ႇၸွမ်းဝၢၼ်ႈ မႄႈထေႃႇသလေး၊ ၽလူးၵျီး၊ ထီးမႄႈဝႃးၶီး လႄႈဝၢၼ်ႈ ရသေႉၵူႇ ဢၼ်မီၼႂ်းၸႄႈဝဵင်းမျႃႉဝတီႇ လႅၼ်လိၼ်ထႆး။
ၵူၼ်းမိူင်းမၢတ်ႇၸဵပ်းလူႉတၢႆတႄႉဢမ်ႇမီး ၵူၺ်းၵႃႈႁိူၼ်းယေးလူႉၵွႆၾႆးမႆႈ မီးတင်းၼမ် ။ ၵူၼ်းမိူင်းဢွၼ်ၵၼ်ပၢႆႈၶဝ်ႈၼႂ်းလိၼ်ထႆး၊ ၸဝ်ႈၼႃႈတီႈ ပႂ်ႉလႅၼ်လိၼ်ထႆးသူင်ႇၸိူဝ်းၶဝ်ဝႆႉတီႈ ပၢင်သဝ်းၵူၼ်းပၢႆႈၽေးသိုၵ်းၸူဝ်ႈၶၢဝ်းယဝ်ႉဝႃႈၼႆ။
ပူၼ်ႉမႃး 2 ဝၼ်း ၸုမ်းယၢင်း KNU ဢွၵ်ႇလိၵ်ႈပိုၼ်ၽၢဝ်ႇတုၵ်းယွၼ်း ၸၢတ်ႈၸိုင်ႈလုမ်ႈၾႃႉ ဝႆႉဝႃႈ ထုင်ႉလေးၵေႉၵေႃႇ ပဵၼ်တီႈၵူၼ်းပၢႆႈၽေးသိုၵ်းသွၼ်ႈယူႇတင်းၼမ်၊ ပၢင်တိုၵ်းၼႆႉၸၢင်ႈတုမ်ႉတိူဝ်ႉၵူၼ်းမိူင်းလႄႈ ႁႂ်ႈ UN ပိုၼ်ၽၢဝ်ႇပၼ်ဝႃႈ – ပိုၼ်ႉတီႈလေးၵေႉၵေႃႈၼႆႉ ပဵၼ်ပိုၼ်ႉတီႈႁၢမ်ႈၶိူင်ႈမိၼ်ၵူႈသႅၼ်းသႅၼ်းမႃးမိၼ် ဝႃႈၼႆဝႆႉ။ ၵူၺ်းၵႃႈသိုၵ်းမၢၼ်ႈဢမ်ႇသႂ်ႇၸႂ်လွင်ႈၼႆႉ ။ ဝၢႆးၶေႃႈပိုၼ်ၽၢဝ်ႇဢွၵ်ႇယသ်ႉ 2 ဝၼ်းၵေႃႈ ဢဝ်ၶိူင်ႈမိၼ်ယိုဝ်းသိုၵ်းမႃးမိၼ်ယိုဝ်းသႂ်ႇဝၢၼ်ႈၵူၼ်း။
တေႃႇထိုင်မိူဝ်ႈၼႆႉ 24/ 12/ 2021 ပၢင်တိုၵ်းတိုၵ်ႉပဵၼ်ႁၢဝ်ႈႁႅင်းတီႈဝၢၼ်ႈ ၵေႃႉၼွႆး ၸႄႈဝဵင်းၵေႃႉၵရဵတ်ႉ ထႅင်ႈယူႇ ။ တီႈဝဵင်းလွႆၶေႃ မိူင်းယၢင်းလႅင်သမ်ႉ သိုၵ်းမၢၼ်ႈယူႇတီႈၶူင်ႇႁိူဝ်းမိၼ်သေ ယိုဝ်းၵွင်ႈလူင်ၵႂႃႇတၢင်းဝၢၼ်ႈ ပႃႇတူဝ်ႇ ။ မၢၵ်ႇလူင်တိူဝ်ႉသႂ်ႇၵူၼ်းဝၢၼ်ႈ တၢႆ ၼိုင်ႈၵေႃႉ မၢတ်ႇၸဵပ်းၼိုင်ႈၵေႃႉ လႆႈႁူႉၸွမ်းၶၢဝ်ႇ ၶိတ်ႉတိတ်ႉဢွၵ်ႇဝႆႉၼင်ႇၼႆ။