သိုၵ်းမၢၼ်ႈယိုတ်းမိူင်း ပႂ်ႉတၢင်းၶဝ်ႈ/ဢွၵ်ႇဝဵင်း ဢုမ်ႇပဝ်း( ဢွင်ႇပၢၼ်း) သေ ၵဵပ်းၶွၼ်ႇလေႃႉရူတ်ႉ (ဘီးခွန်) တီႈၸဝ်ႈၵႃးတၢင်ႇၽၵ်းယိူဝ်ႈၼၢင်းၶဵဝ်ဢွၵ်ႇဢုမ်ႇပဝ်း သူင်ႇၶၢႆမိူင်းမၢၼ်ႈ ၼမ်မႃးၵူႈဝၼ်းလႄႈ ၸဝ်ႈၽၵ်းၶဵဝ် ယၢပ်ႇၽိုတ်ႇ။
“ၶဝ်ဝႃႈ ဘီးခွန် ၶွၼ်ႇလေႃႉရူတ်ႉ ၼႆသေ ပႂ်ႉၵဵပ်းတၢင်းၶဝ်ႈဝဵင်း ဢွင်ႇပၢၼ်းဢေႃႈ။ ၵဵပ်းတီႈၸဝ်ႈၵႃးတၢင်ႇၽၵ်းၶဵဝ်တေႃႉၶၢႆမိူင်းမၢၼ်ႈတၢင်းဝဵင်းၽိဝ်း၊ ၵျွၵ်ႉတၶႃး ၸိူဝ်းၼႆႉ။ ရူတ်ႉၵႃးၼိုင်ႈလမ်း ၶဝ်ယွၼ်းပဵၼ် 5000 ပျႃးဢေႃႈ။ ၵူႈပွၵ်ႈ ႁဝ်းလႆႈပၼ် လမ်း 500 ၵူၺ်းၶႃႈၼႃႇ။ တလဵဝ် ပေႃးယိုၼ်ႈပၼ်မၢင် 500 တႄႉ ဢဝ်ၵွင်ႈငႃ သေ ထဵတ်ႈထၢမ်ႁၢဝ်ႈႁႅင်းဢေႃႈ။” ၸဝ်ႈၵႃးတၢင်ႇမၢၵ်ႇၶဝ်ႈတဝ်ႈၼမ်ႉ ၵူၼ်းဢွင်ႇပၢၼ်းၵေႃႉၼိုင်ႈလၢတ်ႈၽူႈတွႆႇႁွၵ်ႈၼင်ႇၼႆ။
ဢိင်ၼိူဝ်လႆႈပၼ်ၵႃႈၶွၼ်ႇလေႃႉရူတ်ႉၼမ်ၼႆႉသေ ၸဝ်ႈၵႃးဢွၼ်ၵၼ်ၶၢင်းပွင်ႉဝႃႈ ဢမ်ႇၵိုတ်းၼမ်ႉတွၼ်းၼမ်ႉမျၢတ်ႈသင်၊ ၵုမ်ႇလႆႈပၼ်ၵႃႈၵဵတ်ႉ/လၢၼ်ႇၵူၺ်း – ဝႃႈၼႆ။
ဝဵင်းဢုမ်ႇပဝ်းၼႆႉ ၽုၵ်ႇမီႇႁေႃ၊ ၶိင်၊ ၽၵ်းၵၢတ်ႇမွၵ်ႇ၊ ၽၵ်းၵၢတ်ႇပီ၊ ၼဵင်ႈ ဢိၵ်ႇပႃးတင်း ၽၵ်းယိူဝ်ႈၼၢင်းၶဵဝ်ဢၼ်ၸႂ်ႉ ဢၼ်ႇၵိၼ်ယူႇၵူႈဝၼ်းၸိူဝ်းၼႆႉ သေ သူင်ႇဢွၵ်ႇၶၢႆ မိူင်းတႂ်ႈမိူင်းၼိူဝ်။ ၸဝ်ႈၵႃးမၢင်လမ်း ၶၢင်းပွင်ႉ ဢမ်ႇမီးၼမ်ႉတွၼ်း ဢမ်ႇၶူပ်းငၢမ်ႇၵႃႈႁႅင်းၼႆသေ ထိုင်တီႈဢမ်ႇၸၢင်ႈတၢင်ႇၵႂႃႇၶၢႆ တၢင်ႇတီႈတၢင်ႇဝဵင်း ။
“ ယွၼ်ႉဢမ်ႇမီးလႄႈ ၸင်ႇႁႃၵိၼ်လဵင်ႉတွင်ႉ။ ယၢမ်းလဵဝ်သမ်ႉ ပႂ်ႉၸွမ်းတၢင်းသေ ယွၼ်းၵႃႈၼၼ်ႉၵႃႈၼႆႉ ၼမ်မႃးလိူဝ်ႁႅင်း၊ ၾၢႆႇၼိုင်ႈၵႃႈၼမ်ႉမၼ်းရူတ်ႉသမ်ႉသုင်လႄႈ ငိုၼ်းၼႆႉ ယႃႇဝႃႈတေလိူဝ်လႃႈ ယင်းၵိၼ်ပႃးၼိူဝ်ႉလႅင်မၼ်းလူးၵွၼ်ႇယဝ်ႉၶႃႈ။ ပေႃးဢမ်ႇပၼ်ဢၼ်ၶဝ်ယွၼ်း သမ်ႉၵူဝ်ၵွင်ႈၶဝ်၊ ပေႃးဢမ်ႇၵႂႃႇၵႃႉၶၢႆယဝ်ႉႁေးၼႆၵေႃႈ သမ်ႉဢမ်ႇၸၢင်ႈဢဝ်သင်ၵိၼ် ယၢပ်ႇတႄႉဢေႃႈ ၵူၼ်းမိူင်းဢွင်ႇပၢၼ်း” ၵူၼ်းၵႃႉၽၵ်း ၸဝ်ႈသူၼ်ၶၢင်းပွင်ႉၼင်ႇၼႆ။
မိူဝ်ႈပၢၼ်လူင်ပွင်ၸိုင်ႈသိုၵ်း ၵွၼ်ႇၼႃႈပီ 2010 ၼၼ်ႉၵေႃႈ ၵဵတ်ႉ/လၢၼ်ႇ ၵဵပ်းငိုၼ်းးၵဵပ်းၶွၼ်ႇ ၼမ်ၼင်ႇၼႆ။ ၽိူဝ်ႇထိုင်ပၢၼ်လူင်ပွင်ၸိုင်ႈၵူၼ်းမိူင်းလိူၵ်ႈတင်ႈမႃး ၵဵတ်ႉ/လၢၼ်ႇ ယွႆႈယႅမ်းလႄႈ လၢၼ်ႇမႆႉပူၵ်ႇမႆႉသၵ်း ယုၵ်ႉလိူၵ်ႈ ပူတ်းဢွၵ်ႇတင်းၼမ်။ ဝၢႆးလင်သိုၵ်းမၢၼ်ႈယိုတ်းမိူင်းမႃးၶၢဝ်းတၢင်း 10 လိူၼ်ပၢႆၼႆႉ ၵဵတ်ႉ/လၢၼ်ႇပႂ်ႉယွၼ်းငိုၼ်းၵၢင်တၢင်း ၶိုၼ်းၼမ်မႃး မိူၼ်ၵဝ်ႇ ၸဝ်ႈၵႃးဢွၼ်ၵၼ်ၶၢင်းပွင်ႉၼင်ႇၼႆ။
 သေ ၵဵပ်းၶွၼ်ႇလေႃႉရူတ်ႉ (ဘီးခွန်) တီႈၸဝ်ႈၵႃးတၢင်ႇၽၵ်းယိူဝ်ႈၼၢင်းၶဵဝ်ဢွၵ်ႇဢုမ်ႇပဝ်း သူင်ႇၶၢႆမိူင်းမၢၼ်ႈ ၼမ်မႃးၵူႈဝၼ်းလႄႈ ၸဝ်ႈၽၵ်းၶဵဝ် ယၢပ်ႇၽိုတ်ႇ။){kind=link}