ႁိူၼ်းၵူၼ်းဝၢၼ်ႈၸေႈႁႆး ဝဵင်းၼမ်ႉၶမ်း လင်ၼိုင်ႈ ၺႃးၸုမ်းဢမ်ႇႁူႉၾၢႆႇယိုဝ်းသႂ်ႇသွင်ၵမ်းထပ်းၵၼ်၊ ဢမ်ႇမီး မူႇၸုမ်းလႂ် ၵႅတ်ႇၶႄ လွင်ႈႁူမ်ႇလူမ်ႈၵူၼ်းမိူင်း။
မိူဝ်ႈဝၼ်းတီႈ 18/12/2021 ယၢမ်းၵၢင်ၶမ်ႈ မွၵ်ႈ 8:09 မူင်းၼႆႉ ႁိူၼ်းၵူၼ်းဝၢၼ်ႈၸေႈႁႆး လင်ၼိုင်ႈ ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆး ပွတ်းႁွင်ႇ ၺႃးၸုမ်းဢမ်ႇႁူႉၾၢႆႇယိုဝ်းၵွင်ႈ၊ တိူဝ်ႉသႂ်ႇႁိူၼ်းၵူၼ်းဝၢၼ်ႈလင် ၼိုင်ႈ သွင်ၵမ်းထပ်းၵၼ်၊ တိူဝ်ႉသႂ်ႇၽၵ်းတူ ႁိူၼ်း တင်းသွင်ၵမ်း။
ၵူၼ်းၸေႈႁႆး ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ပွၵ်ႈၵမ်းဢွၼ်တၢင်းၼၼ်ႉၵေႃႈ ထုၵ်ႇယိုဝ်းသႂ်ႇ တိူဝ်ႉၺႃးမၢၼ်ႇၽၵ်းတူ ပဵၼ်မၢၵ်ႇၵွင်ႈႁွႆးၼိုင်ႈ။ ၵမ်းၼႆႉ ထႅင်ႈၵမ်ႉၼိုင်ႈ တီႈမၢၼ်ႇ ၽၵ်းတူႁိူၼ်း ၵူၺ်းၼင်ႇၵဝ်ႇ ။ ၸုမ်းဢၼ်ယိုဝ်းသႂ်ႇၼၼ်ႉ ပဵၼ်ၸုမ်းလႂ်မူႇလႂ် ယိုဝ်းသႂ်ႇတႄႉ ဢမ်ႇ လႆႈႁူႉၶႃႈ”- ဝႃႈၼႆ။
ၵူၼ်း ၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈ ဢၼ်ပႂ်ႉတီႈတၢင်း ၶဝ်ႈဝဵင်းၼမ်ႉၶမ်း တီႈမၢၼ်ႈၶမ်းၼၼ်ႉ ၶဝ်ယိုဝ်း ၵွင်ႈၶဝ်ႈၼႂ်းဝၢၼ်ႈၸေႈႁႆးၵႂႃႇၼႆႉ မီးသွင်ပွၵ်ႈယဝ်ႉ။ မိူဝ်ႈပူၼ်ႉမႃး 7 ဝၼ်းၼၼ်ႉ ယိုဝ်းပွၵ်ႈၼိုင်ႈ။ ပူၼ်ႉမႃး 2 ဝၼ်းၼႆႉ ယိုဝ်းထႅင်ႈပွၵ်ႈၼိုင်ႈၶႃႈ။ လႆႈငိၼ်းဝႃႈ တိူဝ်ႉသႂ်ႇႁိူၼ်းၵူၼ်းဝၢၼ်ႈၼႆၶႃႈဢေႃႈ”- ဝႃႈၼႆ။
ၸုမ်းသိုၵ်းမၢၼ်ႈ ဢၼ်ပႂ်ႉတီႈတၢင်းၶဝ်ႈဝဵင်းၼမ်ႉၶမ်း တီႈမၢၼ်ႈၶမ်းၼၼ်ႉ ၵႆႉယိုဝ်းၵွင်ႇ ၵႂႃႇၵူႈႁူးၵူႈတၢင်း မၢင်ပွၵ်ႈသွင် ဝၼ်းသၢမ်ဝၼ်း ၼိုင်ႈပွၵ်ႈ ဢမ်ႇၼၼ် ၶႅၼ်ႈဝၼ်းၼိုင်ႈပွၵ်ႈ ၵူၼ်းပိုၼ်ႉတီႈၼမ်ႉၶမ်းလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ