ဝၼ်းသဝ်ၵၢင်ၶမ်ႈပူၼ်ႉမႃး ၼႆႉသိုၵ်းၶၢင် KIA ၶဝ်ႈယိုဝ်း တပ်ႉပိဝ်ႇႁႃႇ မၢၼ်ႈ ၼႂ်းဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၊ သွင်ၾၢႆႇပဵၼ်ပၢင်တိုၵ်းၵၼ် မၢၵ်ႇလူင် တူၵ်းတိူဝ်ႉၺႃး ၵူၼ်းပႂ်ႉၵဵပ်းငိုၼ်း ဢေႊသျႃႊဝိူဝ်ႊ ၼိူဝ်တၢင်းလူင် လႃႈသဵဝ်ႈ – မူႇၸေႊ။
ဝၼ်းတီႈ 18/12/2021 ယၢမ်းၵၢင်ၶမ်ႈ မွၵ်ႈ 6 မူင်းၶိုင်ႈ တပ်ႉသိုၵ်းၶၢင် KIA ၶဝ်ႈလူမ်ႇယိုဝ်းတပ်ႉပိဝ်ႇႁႃႇ သိုၵ်းမၢၼ်ႈ ဢၼ်ပၵ်းယူႇ ၼႂ်းပွၵ်ႉၼိုင်ႈ ဝဵင်းၵူတ်ႉၶၢႆ ။ ပၢင်တိုၵ်းၼၼ်ႉ ယိုဝ်းၵၼ် ႁိုင် ႁိမ်း ၶိုင်ႈၸူဝ်ႈမူင်း။ ဝၢႆးပၢင်တိုၵ်းယဝ်ႉ လႆႈႁူႉဝႃႈ ၽူႈယိင်းသွင်ၵေႃႉ ဢၼ်ပႂ်ႉၵဵပ်းငိုၼ်း တီႈဢေႊသျႃးဝိူဝ်ႊထူဝ်းၵဵတ်ႉ ဢၼ်မီးၼိူဝ်တၢင်းလူင် လႃႈသဵဝ်ႈ-မူႇၸေႊ ၼၼ်ႉ ၺႃးၸၢၵ်ႇ မၢၵ်ႇလူင်တူၵ်းသႂ်ႇ တိူဝ်ႉမၢတ်ႈ လႆႈႁၢမ်သူင်ႇ ႁူင်းယႃ။
ၵူၼ်းပိုၼ်ႉတီႈ ၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်မၢၵ်ႇလူင်တူၵ်းသႂ်ႇ တီႈႁိမ်းတူဝ်းၵဵတ်ႉၼၼ်ႉ ၽူႈႁၢပ်ႇၵၢၼ် တီႈၼၼ်ႈ တိူဝ်ႉ ၺႃးၸၢၵ်ႇမၢၵ်ႇသေ လႆႈမၢတ်ႇၸဵပ်းသွင်ၵေႃႉၶႃႈ။ ယၢမ်းလဵဝ် လႆႈသူင်ႇယူတ်းယႃတူဝ်ဝႆႉတီႈ ႁူင်းယႃး ၵူတ်ႇၶၢႆ။”- ဝႃႈၼႆ။
ဢိင်ၼိူဝ် လွင်ႈၼႆႉ တီႈၵဵတ်ႉၵဵပ်းငိုၼ်း ႁူဝ်ဝဵင်းၵူတ်ႉၶၢႆ ဢၼ်လုၵ်ႉၵူတ်ႉၶၢႆႇ ၵႂႃႇတၢင်းမူႇၸေႊၼၼ်ႉ မီးၸုမ်းသိုၵ်းမၢၼ်ႈ ၊ ပလိၵ်ႈမၢၼ်ႈ ပႂ်ႉဢဝ်ႁူမ်ႇလူမ်ႈ ၵူတ်ႇထတ်းၵူၼ်းမိူင်း ၸိူဝ်းၵႂႃႇမႃး ႁၢဝ်ႈႁႅင်းႁႅင်း။
“တီႈၵဵတ်းၼၼ်ႉ သိုၵ်းမၢၼ်ႈပလိၵ်ႈမၢၼ်ႈ ၸိူဝ်းၼႆႉ ပႂ်ႉၵူတ်ႇထတ်းၵူၼ်းၵႂႃႇမႃး ယဝ်ႉၵေႃႈ ယွၼ်းငိုၼ်းၸဝ်ႈရူတ်ႉ ၼိုင်ႈလမ်း 7-8 မိုၼ်ႇ ၸိူင်ႉၼႆ ၵေႃႈမီးၶႃႈဢေႃႈ။ ၵွပ်ႈၼၼ် ပိူၼ်ႈၸၢင်ႇဢဝ်မၢၵ်ႇလူင်မႃးလိုင်ႈပၼ်ၶဝ် ၶႃႈယူဝ်ႉ” – ၵူၼ်းၵူတ်ႉၶၢႆ လၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 7/12/2021 ယၢမ်းၵၢင်ၶမ်ႈမွၵ်ႈ 7 မူင်း မၢၵ်ႇတႅၵ်ႇတီႈၵဵတ်ႉ/လၢၼ်ႇ ပလိၵ်ႈမၢၼ်ႈ ပႂ်ႉၵဵပ်းၶွၼ်ႇ တီႈႁိမ်းဝၢၼ်ႈပၢင်ႇလေႃႉ (တၢင်းၽႄၵုၼ်လူင်) ၸဝ်ႈၵႃးတၢင်ႇၵုၼ်ႇမၢတ်ႇၸဵပ်း 2 ၵေႃႉ။ ၵူၼ်းပႂ်ႉၵဵတ်ႉ မၢတ်ႇၸဵပ်းၵေႃႉၼိုင်ႈ။ ၼၼ်ႉတႄႉ ပဵၼ်သိုၵ်းၶႄႇၵဝ်ႈၵၢင်ႉ ဢဝ် မၢၵ်ႇပွႆႇသႂ်ႇ ၵူၼ်းပိုၼ်ႉတီႈလၢတ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ