Saturday, July 20, 2024

လုၵ်ႈဢွၼ်ႇတီႈၵေးသီး ယဵပ်ႇၺႃးမၢၵ်ႇမၢတ်ႇၸဵပ်းလိူဝ်ႁႅင်း

Must read

လုၵ်ႈဢွၼ်ႇၸၢႆးဢွၼ်ႇၵေႃႉၼိုင်ႈ ဢႃယု 15 ပီၵူၼ်းဝၢၼ်ႈၵွင်းမူး ၸႄႈဝဵင်းၵေးသီး ဢၢၼ်းၵႂႃႇၸူးပေႃႈမႄႈမၼ်းတီႈႁႆႈသေ ၵႂႃႇယဵပ်ႇၺႃးမၢၵ်ႇမႅင်းလုၵ်ႈၼိုင်ႈ တႅၵ်ႇတိူဝ်ႉသႂ်ႇမၢတ်ႇၸဵပ်းလိူဝ်ႁႅင်းယၢမ်းလဵဝ် ယူတ်းယႃတူဝ်ဝႆႉတီႈႁူင်းယႃၵေးသီး။

ၸၢႆးပၢၼ်းသႅင် လုၵ်ႈဢွၼ်ႇမိူင်းၵိုင်ဢၼ်ယဵပ်ႇၺႃးမၢၵ်ႇၽွင်းၵႂႃႇႁႆႈ

မိူဝ်ႈဝႃး ဝၼ်းတီႈ 13/12/2021 ယၢမ်းၵၢင်ၼႂ် 8 မူင်းပၢႆ ၸၢႆးပၢၼ်းသႅင် ဢႃယု 15 ပီ လုၵ်ႈၸၢႆး လုင်းဝီး ပႃႈသွင်ႇ ယူႇဝၢၼ်ႈၵွင်းမူး ဢိူင်ႇဝၢၼ်ႈၶုမ်ႇ ၸႄႈဝဵင်းၵေးသီး ဢၢၼ်းၵႂႃႇၸူးပေႃႈမႄႈမၼ်းတီႈႁႆႈၶဝ်ႈၵၢပ်ႇ၊ ၵႂႃႇယဵပ်ႇၺႃးမၢၵ်ႇမႅင်းၾင်လိၼ် ဢၼ်ႁၢင်ႈၵၢင်ဝႆႉတၢင်းၵႂႃႇႁႆႈၶဝ်။

- Subscription -

ၵူၼ်းမိူင်းၵေးသီးၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ ၸၢၵ်ႇမၢၵ်ႇတိူဝ်ႉသႂ်ႇၸွမ်းလင် ၸွမ်းၶႅၼ် ၸွမ်းမိုဝ်း ၸွမ်းၶေႃးမၼ်းဢေႃႈ။ တိူဝ်ႉၼမ်ဝႆႉဢေႃႈ ။ ယၢမ်းလဵဝ်တႄႉမီးတီႈႁူင်းယႃ ယဝ်ႉၶႃႈ”ဝႃႈၼႆ။

ပူၼ်ႉမႃးဝၼ်းတီႈ 24/10/2021 ၼၼ်ႉၵေႃႈ ၵူၼ်းဝၢၼ်ႈ ၵုင်းၵေႃႇ ဢိူင်ႇဝၢၼ်ႈၶိင် ၸႄႈဝဵင်းၵေးသီးၵေႃႉၼိုင်ႈ ၼၼ်ႉၵေႃႈယဵပ်ႇၺႃးမၢၵ်ႇၾင်လိၼ်ၽွင်းမၼ်းၵႂႃႇသူၼ်။ မၢၵ်ႇတႅၵ်ႇတိူဝ်ႉၺႃးႁၢဝ်ႈႁႅင်း ၼိဝ်ႉတိၼ်ပုတ်းၶၢတ်ႇ လိူတ်ႈဢွၵ်ႇၼမ် ၊ လူႉသဵင်ၵႂႃႇၽွင်းဢဝ်တူဝ်ၵႂႃႇသူင်ႇႁူင်းယႃ ။

ၼႂ်းၸႄႈဝဵင်းၵေးသီးၼႆႉ ၼႂ်းပီ 2021 ပူၼ်ႉမႃးၼႆႉ သိုၵ်း RCSS-SSPP ပိုတ်းယိုဝ်းၵၼ်ႁၢဝ်ႈႁႅင်းလႄႈ ၵူၼ်းမိူင်းၼပ်ႉႁဵင်လႆႈပၢႆႈယၢၼ်ႁိူၼ်းယေးတီႈယူႇ။  မၢၵ်ႇဢၼ်ၵူၼ်းမိူင်းယဵပ်ႇၺႃးသေ မၢတ်ႇၸဵပ်းလူႉတၢႆၸိူဝ်းၼႆႉပဵၼ်မၢၵ်ႇၽႂ်ၸုမ်းလႂ်ႁၢင်ႈၵၢင်ဢမ်ႇႁူႉသေတႃႉ ၵူၼ်းမိူင်းလၢတ်ႈဝႃႈ ႁႂ်ႈၽဵဝ်ႈပၼ်ၶိုၼ်း ၸိူဝ်းဢၼ်မီးႁိမ်းႁွမ်းဝၢၼ်ႈလႄႈၸွမ်းသဵၼ်ႈတႃႈသၢႆတၢင်း ၵူၼ်းဝၢၼ်ႈတေၵႂႃႇႁဵတ်းၵၢၼ် ၸိူဝ်းၼၼ်ႉၽွင်ႈ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း