ပျီႇတူႉၸိတ်ႉ ၵႃလီႉ တပ်ႉၸုမ်း 7 ဢဵၼ်ႁႅင်းၼပ်ႉ 10 ပႃးၵွင်ႈၸေးမိုဝ်းသေ ၵႂႃႇၸႂ်ႉၵူၼ်းၼႂ်းၵၢတ်ႇၵဝ်ႇ ၵႃလီႉ ၶၢႆႉၵႂႃႇၶၢႆ ၼႂ်းၵၢတ်ႇမႂ်ႇ၊ ၵူၼ်းၼႂ်းၵၢတ်ႇဢုပ်ႇလၢတ်ႈ တွပ်ႇထဵင် ၾၢႆႇပျီႇတူႉၸိတ်ႉဢမ်ႇႁပ်ႉ ထိုင်တီႈတီႉမတ်ႉ ပေႃႉထုပ်ႉ ၵူၼ်းၶၢႆ ၽၵ်း ၽူႈယိင်း 2 ၵေႃႉ ပဵၼ်လိူတ်ႈ ပဵၼ်ယၢင်။
Photo CJ- ၵူၼ်းၶၢႆၽၵ်းတီႈၵႃႈလီႉ ဢၼ်ၺႃးၸုမ်းသိုၵ်းပျီႇတူႉၸိတ်ႉ ထုပ်ႉလႄႈပဵၼ်ႁွႆးမၢၼ်ႉၵမ်ႇဝႆႉ 
Photo CJ- ၵူၼ်းၶၢႆၽၵ်းတီႈၵႃႈလီႉ ဢၼ်ၺႃးၸုမ်းသိုၵ်းပျီႇတူႉၸိတ်ႉႁဵတ်းႁၢႆႉတေႃႇ မိုဝ်းပေႃးလိူတ်ႈ
မိူဝ်ႈဝႃး ဝၼ်းတီႈ 12/12/2021 ယၢမ်းၵၢင်ၼႂ် တီႈၵၢတ်ႇလူင် ဝဵင်းၵႃလီႉ ဢၼ်ပိုတ်ႇဝႆႉတီႈ ပွၵ်ႉ 1 ၼၼ်ႉ ပျီႇတူႉၸိတ်ႉ တပ်ႉၸုမ်း 7 ဢဵၼ်ႁႅင်းမွၵ်ႈ 20 ၵေႃႉ သႂ်ႇသိူဝ်ႈၶူဝ်းသိုၵ်း ပႃးၵွင်ႈၸေးမိုဝ်းသေ မႃးလၢတ်ႈ ႁႂ်ႈၵူၼ်းၶၢႆၽၵ်းၶဵဝ် ၶၢႆႉၵႂႃႇၶၢႆတီႈၵၢတ်ႇမႂ်ႇ(တိုၼ်းလီ) ဢၼ်မီးတီႈပွၵ်ႉ 4။ ၵူၼ်းၶၢႆၽၵ်း လၢတ်ႈၼႄလွင်ႈတၢင်းယၢပ်ႇၽိုတ်ႇဢွင်ႈတီႈ ၵၢတ်ႇမႂ်ႇ ၊ ၾၢႆႇပျီႇတူႉၸိတ်ႉ ဢမ်ႇႁပ်ႉ တီ့မတ့် ထဝ်ႈယိင်း ဢႃႇယု 60 ပၢႆ ၵေႃႉဢၼ်တွပ်ႇထဵင် ၼၼ်ႉ သႂ်ႇသေႃးလဵၵ်း မတ်ႉမိုဝ်း လၢၵ်ႈႁုၵ်ႉလႄႈ ႁဵတ်းႁႂ်ႈ ၼိူဝ်ႉၼင် သိၵ်ႇလၢၼ်ႉ ပဵၼ်လိူတ်ႈ ပဵၼ်ယၢင်။
ၵူၼ်းၼႂ်းၵၢတ်ႇၵႃလီႉ လၢတ်ႈတီႈၽူႈတွႆႇႁွၵ်ႈဝႃႈ – “ ၽူႈယိင်း ဢသၢၵ်ႈ ပေႃး 60 ပၢႆ ယဝ်ႉၶႃႈ ဢၼ်ၶဝ် ဢဝ်သေႃးလဵၵ်း မတ်ႉၼၼ်ႉ။ သေႃးလဵၵ်းလႄႈ ၶဝ်ၸၼ်ႁုၵ်ႉ ဢဝ်ၶေႃႈမိုဝ်းဢွၼ်ႇမၼ်း လွၵ်ႈလၢၼ်ႉ ပဵၼ်လိူတ်ႈပဵၼ်ယၢင် ၼၼ်ႉၶႃႈၼႃႇ ။ ထႅင်ႈၵေႃႉၵေႃႈ ပဵၼ်ၵူၼ်းထဝ်ႈ ၼင်ႇၵဝ်ႇယဝ်ႉ ဢႃယု 50 ပၢႆယဝ်ႉ။ မၼ်းဝႃႈ ယႃႇမတ်ႉ ၼႆသေၶဝ်ႈႁၢမ်ႈဢေႃႈ။ ပျီႇတူႉ ၸိတ်ႉၵေႃႈ ထုပ်ႉပၼ်မၼ်း ၺႃးလၢႆၵမ်းဢေႃႈ။ မိုဝ်းၵူၼ်းၸၢႆး သမ်ႉမင်ၵူၼ်းထဝ်ႈ ဝူၼ်ႉတူၺ်းၶႃႈလေႃႇ။ ႁဝ်းၶႃႈ တႄႉ ၶႂ်ႈႁႂ်ႈ ၶဝ်ႁပ်ႉပုၼ်ႈၽွၼ်း ယူတ်းယႃ ပၼ် ဢွၼ်ၵၼ်ၵႂႃႇလၢတ်ႈ ၶဝ်ၵေႃႈ ဢမ်ႇႁပ်ႉႁူပ်ႉၶႃႈ”- ဝႃႈၼႆ။
ဢိင်ၼိူဝ် ၸုမ်းပျီႇတူႉၸိတ်ႉ လွႆၽႃ ၵႃလီႉ (တပ်ႉၸုမ်း 7) ပႃးၵွင်ႈပႃးၵၢင်ႇ ၶဝ်ႈႁဵတ်းႁၢႆႉ ၸႂ်ႉလၢႆးၵျၢမ်းတေႃႇ ၵူၼ်းၶၢႆ ၼႂ်းၵၢတ်ႇ၊ ႁဵတ်းႁႂ်ႈပဵၼ်ဢူၼ်ဢၢၼ် မေႃးမႄး သေ ၵူၼ်းၸၢႆး ဢၼ်မီးလူမ်းလိူတ်ႈသုင်ၵေႃႉၼိုင်ႈ ၵေႃႈပဵၼ်လူမ်း လိူတ်ႈၶိုၼ်ႈ ပိၼ်ႈလူမ်ႉ ၼႂ်းၵၢတ်ႇၵႂႃႇၵေႃႉၼိုင်ႈ။ ၵူၼ်းၼႂ်းၵၢတ်ႇ ၸွႆႈၵၼ် ဢဝ်သူင်ႇယူတ်းယႃတူဝ်ဝႆႉတီႈ ႁူင်းယႃ ၵႃလီႉဝႆႉ ဝႃႈၼႆ။
“ၶဝ်တဵၵ်း သႂ်ႇလၢၵ်ႈထိၵ်ႈ သေႃးလဵၵ်းသေ မတ်ႉဢေႃႈ။ ၵူၼ်းမိူင်း ၼႂ်းၵၢတ်ႇ သမ်ႉ မႃးႁၢမ်ႈ ၶဝ်ၵေႃႈ လၢၵ်ႈလၢၵ်ႈႁုၵ်ႉႁၵ်ႉ သေ ပိုတ်ႇပၼ်သေႃးမိုဝ်းၶိုၼ်း။ မိုဝ်းမၼ်း ၶႂ်ႈၸဵပ်းႁႅင်းဝႆႉ ဢေႃႈ။ ၵွပ်ႈၼၼ် လႄႈ ႁႂ်ႈ ၸုမ်းပျီႇတူႉၸိတ်ႉ ၸိူဝ်းၼၼ်ႉ ႁပ်ႉပုၼ်ႈၽွၼ်း ယူတ်းယႃပၼ်ၼၼ်ႉၶႃႈၼႃႈ။ ပေႃးၶဝ် သိုပ်ႇႁၢႆႉတေႃႇ ၵူၼ်းမိူင်း ဢမ်ႇတူၺ်းလူ ပေႃႈမႄႈ ၵူၼ်းမိူင်း တႄႉ ၵူၼ်းမိူင်းတေဢမ်ႇႁပ်ႉၶဝ် တေဢမ်ႇတူၺ်းၶီႈၼႃႈၶဝ်။ ၶဝ်ၵေႃႈ တေမိူၼ် သိုၵ်းမၢၼ်ႈ ၵႂႃႇၼၼ်ႉၶႃႈၼႃႇ ။ ၸိူင်ႉၼင်ႇ ၵူၼ်းမိူင်း ဢမ်ႇၶႂ်ႈႁၼ်ၼၼ်ႉဢေႃႈ” – ၼႆ ၵူၼ်းၵႃႈလီႉ ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈၵေႃႈလၢတ်ႈထႅင်ႈ ၼင်ႇၼႆ။
ပီႈတူႉၸိတ်ႉ ၸုမ်းလွႆၽႃ ၵႃလီႉၼႆႉ ၵမ်ႈၼမ် တေႁူႉဝႃႈ ပဵၼ် ၵူၼ်းတပ်ႉၸုမ်း 7 (SSPP) ၵူႈပွၵ်ႈ။ မိူဝ်ႈပီ 2010 ၼၼ်ႉ ၸွမ်ႁၢၼ်လွႆမၢဝ်း၊ ၸွမ်ႁၢၼ်ၵၢႆႇၾႃႉ ၊ ၸဝ်ႈႁၢၼ်ၸၢႆးဢွၼ်ႇ၊ ၸၢႆးၵွင်တႆး ၶဝ်ဢွၼ်ႁူဝ် တပ်ႉငဝ်ႈငုၼ်း (SSPP) သႅင်ၵႅဝ်ႉ၊ တပ်ႉၸုမ်း 3 မိူင်းၶိူဝ်း၊ တပ်ႉၸုမ်း 7 ၵႃလီႉ ပူတ်းမိၵ်ႈမၢႆ ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA ပႅတ်ႈ သေ လႅၵ်ႈႁဵတ်းပျီႇတူႉၸိတ်ႉ ၶဝ်ႈယူႇတႂ်ႈ ၸုမ်းသိုၵ်းမၢၼ်ႈ။ ၶဝ်ၸဝ်ႈတႄႉ ယုမ်ႇယမ်ဝႃႈ ၶဝ်ႈယူႇတႂ်ႈ ၸုမ်းသိုၵ်းမၢၼ်ႈ သေတႃႉ တေႁဵတ်းတႃႇၸိူဝ်ႉၸၢတ်ႈ တေပူၵ်းပွင်ၵၢၼ်ၸိူဝ်ႉၸၢတ်ႈၵႂႃႇ။ လႅၵ်ႈႁဵတ်းပျီႇတူႉၸိတ်ႉ ၵေႃႈ ပဵၼ်သိုၵ်းၵူၼ်းမိူင်း ၵူၺ်းၼင်ႇၵဝ်ႇ – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ