ၵူၼ်းၶႅၵ်းၽြႃးၼေႃႇႁိၼ်ၶၢဝ်မွၵ်ႇမႆႇ ထူပ်းတၢင်းယၢပ်ႇၽိုတ်ႇ ၵၢၼ်ႁႃၵိၼ်လဵင်ႉတွင်ႉ

 ၵူၼ်းၶႅၵ်းႁုၼ်ႇႁၢင်ႈၽြႃးၼေႃႇႁိၼ်ၶၢဝ် တီႈဝဵင်းမွၵ်ႇမႆႇ ၸိုင်ႈတႆးပွတ်းၸၢၼ်းၵေႃႈထူပ်းတၢင်းယၢပ်ႇၽိုတ်ႇ ၵၢၼ်ႁႃၵိၼ်လဵင်ႉတွင်ႉ ယွၼ်ႉၵၢၼ်မိူင်းလႄႈယေႃးၵႃႇတၢင်းပဵၼ် ။  

ၸၢႆးလူင် ၵူၼ်းႁဵတ်းၵၢၼ် ၶႅၵ်းၽြႃးၼေႃႇႁိၼ်ၶၢဝ် တီႈဝဵင်းမွၵ်ႇမႆႇ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းယၢပ်ႇၽိုတ်ႇတႄႉ မီးၼမ်ၶႃႈဢေႃႈ။ ပီၼႆႉ တင်ႈ တႄႇၵႃႇလၶူဝ်ႊဝိတ်ႉပေႃႇမႃးႁႅင်းသေ ဝၢၼ်ႈမိူင်းၵေႃႈ သုၵ်ႉယုင်ႈ ၸိူင်ႉၼႆထႅင်ႈ ၵၢၼ်ႁႃၵိၼ်လဵင်ႉတွင်ႉၼႆႉ ၵပ်ႉၵိၼ်းၶၢၼ်ၸႂ်မႃးလိူဝ်ၵဝ်ႇၶႃႈယဝ်ႉ။ ပီသွင်ပီမႃးၼႆႉ ၵၢၼ်သိုဝ်ႉၵၢၼ်ၶၢႆၵေႃႈ ဢမ်ႇပေႃးပဵၼ်ၵၢၼ် ၵူၼ်းၼွၵ်ႈမိူင်းမႃးလႄႇၵေႃႈဢမ်ႇမီး။ ၵူၼ်းၶဝ်ႈဢွၵ်ႇ ၵေႃႈ ဢမ်ႇမီး လူတ်းယွမ်း လူင်းၼမ်လႄႈ ၵွပ်ႈၼႆ တုမ်ႉယွၼ်ႈၵၢၼ်ႁႃၵိၼ်လဵင်ႉတွင်ႉႁၢဝ်ႈႁႅင်း”- ဝႃႈၼႆ။

ပီၼႆႉ ယွၼ်ႉဢမ်ႇပေႃးလႆႈၶႅၵ်း ႁၢင်ႈၽြႃး ဢမ်ႇလႆႈသူင်ႇၶၢႆတၢင်ႇတီႈ၊  တႃႇတေသိုပ်ႇလဵင်ႉတွင်ႉၵႂႃႇၼၼ်ႉ လႆႈႁႃ ႁဵတ်းၵၢၼ်တၢင်ႇ ဢၼ်မႃးပုတ်ႈတႅၼ်းတၢင် ဢွၼ်ၵၼ်ၶဝ်ႈသူၼ်ၶဝ်ႈၼႃး ၼႆယဝ်ႉ။  

“ယွၼ်ႉၵၢၼ်ၶႅၵ်းႁုၼ်ႁၢင်ႈၽြႃး ဢမ်ႇပေႃးပဵၼ်ၵၢၼ်ယဝ်ႉလႄႈ ဝႃႈတေဢဝ်ၵၢၼ်ၽုၵ်ႇသွမ်ႈမႃးတႅၼ်းတၢင် သေႁဵတ်းၼႆ။ ပီၼႆႉ ၵၢၼ်ၽုၵ်ႇသွမ်ႈ ၵေႃႈ သမ်ႉဢမ်ႇပဵၼ်ၵၢၼ်ထႅင်ႈ။ ပေႃးႁဝ်းမႃးၼပ်ႉတူၺ်းၵူႈပီ မိူၼ်ၼင်ႇပီၵၢႆ ပီဢွၼ်တႄႉ လဵင်ႉၼႃႈႁိူၼ်းတႄႉ ၵုမ်ႇလုမ်ႈလႆႈယူႇ ပီၼႆႉတႄႉ ဢမ်ႇ ၵုမ်ႇယဝ်ႉ လႆႈႁိူဝ်ႉထႅင်ႈ 2 ပုၼ်ႈၵွၼ်ႇၶႃႈဢေႃႈ။ လႆႈႁိူဝ်ႉထႅင်ႈ 2 ပုၼ်ႈဢၼ်ဝႃႈၼႆႉ ႁဝ်းၶႃႈ လႆႈၵႂႃႇႁႃႁဵတ်းၵၢၼ်တၢင်းၼွၵ်ႈထႅင်ႈ။ ယဝ်ႉၵေႃႈ ၵၢၼ် ၽုၵ်ႇသွမ်ႈထႅင်ႈ ႁႂ်ႈမၼ်းၶႅမ်ႉလႅပ်ႈမိူၼ်မိူဝ်ႈၵူႈပွၵ်ႈတႄႉ ဢမ်ႇပဵၼ်ယဝ်ႉၶႃႈ”- ၸၢႆးလူင် သိုပ်ႇလၢတ်ႈၼႄၼင်ႇၼႆ။

မိူဝ်ႈဢွၼ်တၢင်း တီႈၸႄႈဝဵင်းမွၵ်ႇမႆႇၼႆႉ ႁိူၼ်းဢၼ်ၶႅၵ်းႁုၼ်ႁၢင်ႈၽြႃးမီးယူႇ 2-3 လင် ယၢမ်းလဵဝ်တႄႉ ယွၼ်ႉဢမ်ႇလႆႈသူင်ႇၶၢႆတၢင်ႇတီႈလႄႈ ႁိူၼ်းဢၼ်တိုၵ်ႉႁဵတ်းယူႇတႄႉ ၵိုတ်းႁိူၼ်းယေး ၸၢႆးလူင်ၶဝ် လင်လဵဝ်ၵူၺ်း လိူဝ်ၼၼ်ႉ ယွၼ်ႉၵၢၼ်ႁႃၵိၼ်လဵင်ႉတွင်ႉသေ လႆႈၶၢႆႉလၢႆႈႁဵတ်းၵၢၼ် တႅၼ်းထႅင်ႈတၢင်ႇဢၼ်ပႅတ်ႈ ၼႆယဝ်ႉ။

တီႈဝဵင်းမွၵ်ႇမႆႇၼႆႉၸဵမ်ပၢၼ်ပူႇမွၼ်ႇၼၢႆးယႃႈ ဢွၼ်ၵၼ်ႁဵတ်းၵၢၼ်ၶႅၵ်းႁၢင်ႈ ၼေႃႇႁိၼ်ၶၢဝ်မႃးပၢၼ်သိုပ်ႇပၢၼ်။ ၽြႃးၼေႃႇႁိၼ်ၶၢဝ်၊ ႁၢင်ႈၸၢင်ႉႁၢင်ႈမႃႉၶၢဝ် ဢၼ်ၶႅၵ်းဢွၵ်ႇတီႈမွၵ်ႇမႆႇၼႆႉ ၸိုဝ်ႈသဵင်လိုဝ်းလင် မိူဝ်ႈပႆႇပဵၼ်တၢင်းပဵၼ်ၶူဝ်ႊဝိတ်ႉၼၼ်ႉ လႆႈသူင်ႇၶၢႆထိုင် ထုင်ႉလိၼ်ပဵင်း မိူင်းမၢၼ်ႈၸိူဝ်းပုၼ်ႉ။ ပေႃးၵၢၼ်ႁႃၵိၼ်လဵင်ႉတွင်ႉ မိူၼ်ၼႆၵႂႃႇမိူဝ်းၼႃႈတႄႉ ပဵၼ်ဢၼ်လီမႆႈၸႂ်ၵူဝ်ၾိင်ႈႁိတ်ႈ လၢႆးမိုဝ်းတႆး ဝွတ်ႈဝၢႆးၵူၺ်းယဝ်ႉ ၵူၼ်းထဝ်ႈထုင်ႉလၢင်းၶိူဝ်းၵေႃႉၼိုင်ႈၵေႃႈလၢတ်ႈၼင်ႇၼႆ။ 

ၶွင်ႇသီႇသိုၵ်းမၢၼ်ႈ ယိုတ်းမိူင်းမႃးၼႆႉ မီးၶၢဝ်းတၢင်း 10 လိူၼ်ပၢႆယဝ်ႉ ႁဵတ်းႁႂ်ႈဝၢၼ်ႈမိူင်းဢမ်ႇမီးလွင်ႈၼိမ်သဝ်း၊ ၵၢၼ်ၵႃႉၶၢႆ ဢမ်ႇပဵၼ်ၵၢၼ် တူၵ်းတႅမ်ႇ၊ ၵူၼ်းမိူင်းထူပ်းတၢင်းယၢပ်ႇၽိုတ်ႇ ၵိၼ်းၸႂ်၊ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းႁႅင်း၊ ၽူႈလၵ်ႉၵူၼ်းၸူၼ်လိူင်ႇၼမ်မႃး ၼႆယဝ်ႉ။