ၽူႈၵွၼ်းဢိူင်ႇ ပၢင်ႇၵေႇတု ၵေႃႉဢၼ်တူင်ႉၼိုင်သႂ်ႇႁႅင်းၸွႆႈထႅမ်ၵူၼ်းပၢႆႈၽေးသိုၵ်းမႃးတႃႇသေႇၼၼ်ႉ ထုၵ်ႇၵူၼ်းဢမ်ႇႁူႉၾၢႆႇ 2 ၵေႃႉ ၶဝ်ႈယိုဝ်းထိုင်ၼႂ်းႁိူၼ်း မၢတ်ႇၸဵပ်းႁၢဝ်ႈႁႅင်း လႆႈႁၢမ်တူဝ်သူင်ႇႁူင်းယႃ။
လုၵ်ႈလၢင်းၵူၼ်းႁိူၼ်းလုင်းၵျီႇတဵင်း ၽူႈၵွၼ်းဢိူင်ႇပၢင်ႇၵေႇတု လၢတ်ႈဝႃႈ ၵူၼ်းသွင်ၵေႃႉၶဝ်ႈမႃးယိုဝ်းပေႃႈၶဝ် ထိုင်ၼႂ်းႁိူၼ်း မိူဝ်ႈဝၼ်းတီႈ 11/12/2021 ယၢမ်းႁူဝ်ၶမ်ႈ မွၵ်ႈ 6 မူင်း။ ၵူၼ်းႁၢႆႉၼၼ်ႉ ပဵၼ်ၽႂ်ဢမ်ႇႁူႉ ၵူၺ်းၵႃႈလၢတ်ႈၵႂၢမ်းတႆးတေႃႇၶဝ် ဝႃႈၼႆ။
“ ၽွင်းၼၼ်ႉ ပေႃႈႁဝ်းယူႇႁိူၼ်းၵေႃႉလဵဝ်ၶႃႈ။ ႁဝ်းၶႃႈသမ်ႉ ဢွၵ်ႇမႃးသိုဝ်ႉၽၵ်း တင်းၼွၵ်ႈ။ ၽွင်းႁဝ်းၶႃႈပွၵ်ႈမိူဝ်းၸမ်ထိုင်ႁိူၼ်းၼၼ်ႉ မုင်ႈႁၼ်ယူႇပဵၼ်ၵူၼ်းၸၢႆးသွင်ၵေႃႉ ၶဝ်ႈမိူဝ်းၼႂ်းႁိူၼ်း ။ ႁဝ်းၶႃႈထၢင်ႇဝႃႈပဵၼ်ၶႅၵ်ႇမႃးလီၵူၺ်းၼႆၵႂႃႈ။ ၽိူဝ်ႇႁဝ်းၶႃႈၽႅဝ်ၽၵ်းတူႁိူၼ်းယဝ်ႉ ယိၼ်းသဵင်ၵွင်ႈ ။ ႁဝ်းၶႃႈၵေႃႈႁွင်ႉသႅၼ်ႇ၊ ၵူၼ်းသွင်ၵေႃႉၼၼ်ႉၶိုၼ်း လၢတ်ႈၵႂၢမ်းတႆးတေႃႇႁႃးသေ လႅၼ်ႈပၢႆႈဢေႃႈ။ ”- ဝႃႈၼႆ။
ဢိင်ၼိူဝ်လွင်ႈၼႆႉၵူၼ်းၼုမ်ႇၸိူဝ်းၶဝ်ႈႁူမ်ႈပႃးၼႂ်းလွင်ႈတူင်ႉၼိုင်ၸွႆႈထႅမ်ၵူၼ်းပၢႆႈၽေးသိုၵ်း ၵေႃႉၼိုင်ႈလၢတ်ႈဝႃႈ လုင်းၵျီႇတဵင်းၼႆႉ ပဵၼ်ၽူႈၵွၼ်းဢိူင်ႇဢၼ်မီးၼမ်ႉၸႂ်ၵေႃႉၼိုင်ႈ၊ တူင်ႉၼိုင်ၸွႆႈထႅမ်ၵူၼ်းပၢႆႈၽေးသိုၵ်းမႃးတႃႇသေႇ။ ဢမ်ႇၸႂ်ႈပဵၼ်ၸႂ်ၽႂ်ၸုမ်းလႂ်လႄႈ ဢမ်ႇယၢမ်ႈၶဝ်ႈပႃးတူင်ႉၼိုင်ၼႂ်းၸုမ်းယိပ်းၵွင်ႈၵၢင်ႇၸုမ်းလႂ် ဝႃႈၼႆ။
ၵူၼ်းႁိူၼ်းလုင်းၵျီႇတဵင်းတႄႉလၢတ်ႈဝႃႈ ၵူၼ်းႁၢႆႉၼၼ်ႉလႅပ်ႈတေပဵၼ်ၽႂ်ၵေႃႈ ဢမ်ႇႁူႉဢမ်ႇမေႃလၢမ်းၶၢတ်ႈ သမ်ႉလၢတ်ႈၵႂၢမ်းတႆးပီႇပႅတ်း ဝႃႈၼႆ။
“မိူဝ်ႈႁဝ်းၶႃႈ ၽႅဝ်မႃးၼႂ်းႁိူၼ်း လႆႈႁၼ်မၼ်း လိူတ်ႈဢွၵ်ႇၼမ် မၢတ်ႇၸဵပ်းႁႅင်းသေ ႁဝ်းၶႃႈ ႁွင်ႉသႅၼ်ႇၶႃႈၵေႃႈ ၵူၼ်းႁၢႆႉ ၼၼ်ႉ လၢတ်ႈ ၵႂၢမ်းတႆးတေႃႇႁႃးဝႃႈ “ယႃႇပေႁွင်ႉ ။ ႁႃးဢမ်ႇႁဵတ်းသင်တေႃႇပႃႈႁဝ်းၶဝ်။ ၶဝ်ႈမႃးလႃႈ” – ၼႆသေ လႅၼ်ႈပၢႆႈ ၵႂႃႇတၢင်းလင်ႁိူၼ်းႁဝ်းပႅတ်ႈၶႃႈဢေႃႈ၊ ၵူၼ်းမႃးယိုဝ်းၼၼ်ႉ ပဵၼ်ၽႂ်ဢၼ်ဝႃႈၼၼ်ႉ ဢမ်ႇလႆႈႁူႉၶႃႈ ”- ၵူၼ်းႁိူၼ်း လုင်းၵျီႇတဵင်း လၢတ်ႈၼႄ ထႅင်ႈၼင်ႇၼႆ။
လုင်းၵျီႇတဵင်းၼႆႉ မၢတ်ႇမၢၵ်ႇၵွင်ႈတင်းမူတ်း 6 တီႈ။ ၶႃၵေႃႈႁၢၵ်း ၊ ၵူၼ်းႁိမ်းႁွမ်းႁိူၼ်းလႆႈဢဝ်တူဝ်ၵႂႃႇသူင်ႇႁူင်းယႃ ။
“မၢၵ်ႇၵွင်ႈတိူဝ်ႉ တီႈၶႃ၊ တီႈပုမ်၊ တီႈမိုဝ်းလႄႈ ၸွမ်းတူဝ် ၸိူဝ်းၼႆႉၶႃႈ။ မိူဝ်ႈဝႃး ယၢမ်းၵၢင်ၼႂ် မေႃယႃၶဝ်ဝႃႈ လုပ်ႇၶႃမၼ်း တင်းသွင်ၾၢႆႇ ႁၢၵ်း ၼႆၶႃႈ”- မၼ်းၼၢင်း သိုပ်ႇလၢတ်ႈထႅင်ႈၼင်ႇၼႆ ။
ထုင်ႉပၢင်ႇၵေႇတု မိူင်းၵိုင်ၼၼ်ႉ ပဵၼ်တီႈဢၼ်ပဵၼ်ပၢင်တိုၵ်းၼႂ်းၵႄႈ တပ်ႉသိုၵ်း SSPP တင်း RCSS ။ ၵူၼ်းပၢႆႈၽေးသိုၵ်းၵေႃႈမႃးမႃးမိူဝ်းမိူဝ်းဢမ်ႇထၢတ်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ