လိူၼ်တီႊသႅမ်ႊပိူဝ်ႊ ဝၼ်းတီႈ 10 ဝၼ်းသုၼ်ႇလႆႈၵူၼ်းလုမ်ႈၾႃႉ ၼၼ်ႉ ၵူၼ်းမိူင်းမၢၼ်ႈ ၼႄၾၢင်ႁၢင်ႈ လွင်ႈဢမ်ႇယွမ်းႁပ်ႉ ၸုမ်းသိုၵ်းမၢၼ်ႈ ယိုတ်းဢဝ်ဢႃႇၼႃႇဝၢၼ်ႈမိူင်း ၼႆသေ တင်း ဝၢၼ်ႈ တင်းမိူင်း ၼႄၵၢင်ၸႂ် လူၺ်ႈလၢႆးဢမ်ႇတၵ်းသဵင် Silent Strike ဢမ်ႇဢွၵ်ႇသိုဝ်ႉ ဢမ်ႇဢွၵ်ႇၶၢႆ။
လွင်ႈတူင်ႉၼိုင် ၸိူင်ႉၼင်ႇၼႆ ၼႆႉ ဝဵင်းမူႇၸေႊၵေႃႈၽွမ်ႉသဵင် ပဵင်းပၢၵ်ႇ တင်းဝၢၼ်ႈ တင်းမိူင်း။
ၼႂ်းဝၼ်းၼၼ်ႉ ၽႂ်ဢမ်ႇသေႃႇ ဢမ်ႇသူၼ်း ၵူၼ်းဝၢၼ်ႈၵူၼ်းမိူင်း မူႇၸေႊ တၢင်းလၢႆ ဢွၼ်ၵၼ် ပိၵ်ႉၽၵ်းတူ ယူႇႁိူၼ်း ဢမ်ႇၵွမ်ႉၵႃႈ ႁၢၼ်ႉတၢင်းၶၢႆ ၼႂ်းၵၢတ်ႇ ႁၢၼ်ႉၶၢႆ ၵိုၵ်းႁိူၼ်းယင်းပိၵ်ႉႁပ်း။ ၼိူဝ်ၵၢင်တၢင်းလူင်ၵေႃႈ ယဵၼ်းပဵၼ် တၢင်းပဝ်ႇ တၢင်းၵူင် ဢမ်ႇမီးၽႂ် ၵႂႃႇပႆ – လိူဝ်သေ ၵူၼ်းၵေႃႉ႞သွင်ၵေႃႉ။
ၽွင်းယၢမ်းၼင်ႇၼႆ —- ၽူႈမီး ပုၼ်ႈၽွၼ်း ၾၢႆႇလိူမ်ႈလႆႈ (ၸီႇပိၼ်ႇ) ဝဵင်းမူႇၸေႊ ပိုၼ်ၽၢဝ်ႇ ၼႂ်းၵၢတ်ႇ တင်း ၼႂ်းပွၵ်ႉ ၼႂ်းယွမ်ဝႃႈ –
ဝၼ်းတီႈ 10 လိူၼ် 12 ပီ 2021 ၼႆႉ ဢမ်ႇမီးလွင်ႈ ဢမ်ႇမီးတၢင်းသေ သင်ၽႂ်လႂ် ဢမ်ႇမႃးၶၢႆၶူဝ်းၶွင် ၼႂ်းၵၢတ်ႇလူင် တႂ်ႈႁွင်ႈၵၢၼ်ၾၢႆႇလိူမ်ႈလႆႈ ဝဵင်းမူႇၸေႊၵုမ်းၵမ်ၼႆႉၼႆၸိုင် ဢိင်ဢဝ်မၢႆမီႈ ၾၢႆႇလိူမ်ႈလႂ်ႇဝဵင်း မီးဝႆႉ ၼၼ်ႉသေ တေဢမ်ႇပၼ်ၶၢႆၶူဝ်းၶွင် တႃႇၼိုင်ႈလိူၼ် — ဝႃႈၼႆ။
ဢၼ်ဢမ်ႇမႃးၶၢႆ ၼႂ်းၵၢတ်ႇၼႆႉ ဢမ်ႇၵွမ်ႉၵႃႈ ၵူၼ်းမီးႁၢၼ်ႉတၢင်းၶၢႆ ၵူၺ်း – ၵူၼ်းပႃးႁၢပ်ႇ ထွင်းဢီးလေႃႉၶၢႆၽၵ်းၶၢႆၶဝ်ႈၸိူဝ်းၼႆႉ ၽႂ်ၵေႃႈ ဢမ်ႇလူင်းၵၢတ်ႇၽႄႇၶၢႆ လိူဝ် သေ သဵင်ၵူၼ်းၾၢႆႇမီးပုၼ်ႈၽွၼ်းၶဝ် ပိုၼ်ၽၢဝ်ႇ ၼႂ်းၵၢတ်ႇ ၵေႃႈ ၵူင်ႇသူႇသူႇ ဝႆႉ ၵူႇတႅဝ်း။
ၽွင်း ၵၢင်ဝၼ်း 12 မူင်း ပၢႆ 15 မိၼိတ်ႉၼၼ်ႉ မၢၵ်ႇတႅၵ်ႇ တီႈလုမ်း ၾၢႆႇလိူမ်ႈလႆႇ ဝဵင်းမူႇ ၸေႊ ( မူစယ်မြို့နယ် စည်ပင်သာယာရေးရုံး) တိူဝ်ႉသႂ်ႇ ၵူၼ်းႁၢပ်ႇၵၢၼ်ၼႂ်းလုမ်း (ယိင်း) သွင်ၵေႃႉ။
ၵဵဝ်ႇၵပ်းလွင်ႈၼႆႉသေ ဢူးၽူဝ်းထွင်ႇ ႁူဝ်ပဝ်ႈ ၸုမ်း ၼလူင်းလ ပရႁိတ (နှလုံးလှ ပရဟိတ) ဝဵင်းမူႇၸေႊ လၢတ်ႈၼႄ ၼင်ႇၼႆ။
မီးၵူၼ်းဢဝ်မၢၵ်ႇမႃႇထိုမ်ႈသႂ်ႇ လုမ်းၸီႇပိၼ်ဢေႃႈ။ မၢၵ်ႇတႅၵ်ႇ ၊ မၢၼ်ႇတႅၵ်ႇသေ တိူဝ်ႉသႂ်ႇ ၽူႈယိင်း ဢၼ်ႁၢပ်ႇၵၢၼ် ဝႆႉၼႂ်းလုမ်းၼၼ်ႉ သွင်ၵေႃႉ ဢေႃႈ။ ႁဝ်းၵေႃႈ ၸွႆႈၵႂႃႇဢဝ်သေ သူင်ႇႁူင်းယႃ မွၵ်ႈၼၼ်ႉၵူၺ်းဢေႃႈ။
ႁွင်ႈၵၢၼ်ၾၢႆႇလိူမ်ႈလႆႇ တႂ်ႈၸုမ်းသိုၵ်းမၢၼ်ႈ ယိုတ်းဢႃႇၼႃႇ တဵၵ်းႁႂ်ႈၵူၼ်းမိူင်း ၵႂႃႇၶၢႆၵၢတ်ႇ လွၵ်ႈငိုတ်ႈတဵင်ၵႂၢမ်း ၼၵ်း သေတႃႉ ဢမ်ႇပႆႇဝႃႈတေၵႂႃႇသိုဝ်ႉၶၢႆၼႂ်းၵၢတ်ႇ ၵူၼ်းပိုတ်ႇၽၵ်းတူႁိူၼ်း ယင်းၶႂ်ႈႁႃယၢပ်ႇ။
တေလႆႈဝႃႈ ပၢင်ၼႄၵၢင်ၸႂ် လူၺ်ႈလၢႆးဢမ်ႇတၵ်းသဵင် တင်ႈတႄႇ ၵၢင်ၼႂ် 10 မူင်း တေႃႇ ဝၢႆးဝၼ်း 4 မူင်းၼၼ်ႉ လႆႈဝႃႈ ၵူၼ်းမူႇၸေႊ ၵမ်ႉထႅမ် ဢွင်ႇမၢၼ် ၵႂႃႇ ဝႃႈၼႆၵေႃႈလႆႈ။
လွင်ႈတၢင်းပိူင်ပဵၼ် ၼႂ်းဝဵင်းမူႇၸေႊၼၼ်ႉ ၵူၼ်းၼုမ်ႇ မူႇၸေႊ လၢတ်ႈၼႄ ၵၢင်ၸႂ် မၼ်းၸၢႆး ၼင်ႇၼႆ။
“လႆႈႁၼ်ၼိူဝ်တင်းတႄႉ မီးၵူၼ်းၵိၼ်ၸၢင်ႈ ႁေႃႈတၢင်ႇရူတ်ႉၶိူင်ႈ၊ ၶႄႇ လႅၵ်ႈငိုၼ်း ၵမ်ႈၽွင်ႈ မွၵ်ႈၼၼ်ႉၵူၺ်း။ ဝၢႆး ၾၢႆႇလိူမ်ႈလႆႇ ၶဝ် ပိုၼ်ၽၢဝ်ႇ ဢမ်ႇႁိုင် ၵမ်ႈၽွင်ႈၵူဝ်ပိူၼ်ႈ ယိုတ်းသႅင်ႇၶဝ် ၼႆသေ ၸိူဝ်းၵႂႃႇပိုတ်ႇၵေႃႈ မီးယူႇ ႁွင်ႈ႞ သွင်ႁွင်ႈ။ ဢၼ်မၢၵ်ႇတႅၵ်ႇ တီႈလုမ်းၶဝ် ၼၼ်ႉ ထၢင်ႇတႄႉ ပဵၼ်လွင်ႈသင်ႇသွၼ် ၶဝ် ၼၼ်ႉၵူၺ်း။ ၵမ်ၼမ် တႄႉ ၽႂ်ၵေႃႈ ဢမ်ႇၵႂႃႇပိုတ်ႇၶႃႈ သႅင်ႇတႄႉ” – ဝႃႈၼႆ။
ဢၼ်ၼႄၵၢင်ၸႂ် လူၺ်ႈလၢႆးဢမ်ႇတၵ်းသဵင် ယူႇယဵၼ်ယဵၼ် Silent Strike ၼႆႉ မိူင်းမၢၼ်ႈ ပတ်းပိုၼ်ႉတူဝ်ႈမိူင်း မိူၼ်ၼင်ႇ ဝဵင်းယႂ်ႇ ဝဵင်းလူင် တႃႈၵုင်ႈ တႃႇလိူဝ်ႇ ၸိူဝ်းၼႆႉၵူၺ်းဢမ်ႇၵႃး ၼႂ်းမိူင်းတႆးၵေႃႈ ဢမ်ႇၵွမ်ႉၵႃႈ တီႈဝဵင်းမူႇၸေႊ တီႈဝူင်းလူင်တူၼ်ႈတီး လႃႈသဵဝ်ႈ သီႇပေႃႉ ၵၢတ်ႇလေႃႉ ပၢင်လူင် ၸိူဝ်းၼႆႉ ၵေႃႈ တူင်ႉၼိုင်။