ၵူၼ်းဝၢၼ်ႈၵွင်းဝႅပ်ႈ ဢိူင်ႇၶွင်းဢိ ၸႄႈဝဵင်းၾၢႆၶုၼ် ၸိုင်ႈတႆးပွတ်းၸၢၼ်းၵေႃႉၼိုင်ႈၺႃးသိုၵ်းမၢၼ်ႈတီႉၵႂႃႇလႆႈ 4 ဝူင်ႈပၢႆ ပီႈၼွင်ႉၵူၼ်းႁိူၼ်းတိုၵ်ႉၵႂႃႇႁၼ်ၶိုၼ်းတူဝ်တၢႆမၼ်းၸၢႆးတီႈထိူၼ်ႇႁိမ်းဝၢၼ်ႈ သမ်ႉပေႃးတူႇၵႂ်ႈဝႆႉယဝ်ႉ ႁဵတ်းႁႂ်ႈၵူၼ်းႁိူၼ်းမၼ်းတိူဝ်ႉၸႂ်ဢမ်ႇမီးလွင်ႈႁူမ်ႇလူမ်ႈ။
ၵူဝ်ႇလႃႉဝိၼ်း ဢႃယု 30 ပီပၢႆၵူၼ်းဝၢၼ်ႈၵွင်းဝႅပ်ႈၼႆႉ သိုၵ်းမၢၼ်ႈၶဝ်ႈသွၵ်ႈႁိူၼ်းမၼ်းသေ ၵူတ်ႇထတ်းႁၼ်ၶႅပ်းႁၢင်ႈၵွင်ႈၵၢင်ႇ ၼႂ်းမိုဝ်းထိုဝ်မၼ်းၸၢႆးလႄႈ တီႉၺွပ်းၵႂႃႇ မိူဝ်ႈဝၼ်းတီႈ 12/11/2021 ဝႃႈၼႆ။
ၵူၼ်းဝၢၼ်ႈၵွင်းဝႅပ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “မၼ်းပဵၼ်ၵူၼ်းႁဵတ်းၵၢၼ်တူင်ႇဝူင်းၵူၼ်းၵူၺ်း။ မၼ်းႁႃလဵင်ႉတွင်ႉမႄႈမၼ်းလႄႈၼွင်ႉယိင်းမၼ်းသိုဝ်ႈသိုဝ်ႈယူဝ်းယူဝ်း။ သိုၵ်းမၢၼ်ႈမႃးတူၺ်းၾူၼ်းမၼ်း ႁၼ်ၶႅပ်းႁၢင်ႈၵွင်ႈလႄႈ ၼႆသေၼႄးမၼ်းဝႃႈ ပဵၼ် PDF သိုၵ်းၵူၼ်းမိူင်း ၼႆသေၵေႃႉ တီႉမၼ်းၵႂႃႇဢေႃႈ။ ဝၼ်းတီႈ 9 မိူဝ်ႈသိုၼ်းၼႆႉ ႁဝ်းၶႃႈၸင်ႇၵႂႃႇႁၼ်တူဝ်တၢႆမၼ်းတီႈလႅၼ်ဝၢၼ်ႈ”- ဝႃႈၼႆ။
ၽွင်းသိုၵ်းမၢၼ်ႈ တပ်ႉမ 66 မႃးတီႉမၼ်းဢွၵ်ႇႁိူၼ်းၵႂႃႇၼၼ်ႉ သိုၵ်းမၢၼ်ႈၸႂ်ႉမၼ်းပုတ်ႈလၢႆႈၼုင်ႈၶူဝ်းသိုၵ်းၵူၼ်းမိူင်း PDF သေႁွင်ႉၵႂႃႇပႃး ၵူၼ်းႁၼ်တႂ်ႈတႃ လၢတ်ႈၽူႈတွႆႇႁွၵ်ႈၼင်ႇၼႆ။
“တီႈတူဝ်တၢႆမၼ်းၼၼ်ႉမီးႁွႆးပေႃႉထုပ်ႉမၢတ်ႇၸဵပ်း မၢၼ်ႉလိူတ်ႈဝႆႉတင်းၼမ်ဢေႃႈ ။တီႈၵွၵ်းႁူဝ် တီႈၶႃ ၸိူဝ်းၼႆႉဢေႃႈ ။ သိုၵ်းမၢၼ်ႈယိုဝ်းမၼ်းတၢႆဢေႃႈ မီးႁွႆးမၢၵ်ႇၵွင်ႈသေ တီႈတူဝ်မၼ်းၼၼ်ႉ ။ မႄႈမၼ်းလႄႈၼွင်ႉယိင်းမၼ်း တိူဝ်ႉၸႂ်ဝႆႉဢေႃႈ ။ယဝ်ႉၵေႃႈ ၵူဝ်ႁႄ ယွၼ်ႉဢမ်ႇမီးလွင်ႈႁူမ်ႇလူမ်ႈသၢႆၸႂ်သေဢိတ်းယဝ်ႉၶႃႈဢေႃႈ ” ၵူၼ်းဝၢၼ်ႈၵွင်းဝႅပ်ႈလၢတ်ႈၼင်ႇၼႆ။
ၸွမ်းၼင်ႇ ၽူႈတွႆႇႁွၵ်ႈလႆႈဝႆႉသဵၼ်ႈမၢႆတႄႉ တီႈဝဵင်းၾၢႆၶုၼ်ၼႆႉ သိုၵ်းမၢၼ်ႈတီႉၺွပ်းၵႂႃႇၵူၼ်းဝၢၼ်ႈၵူၼ်းမိူင်း မီး 16 ၵေႃႉယဝ်ႉသေ ဢဝ်ၵႂႃႇၶႃႈႁႅမ်တၢႆမီး 2 ၵေႃႉယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ