ၽူႈသိုဝ်ႇၶၢဝ်ႇၵၢမ်ႇပေႃးၸတၢႆး 3 ၵေႃႉလႄႈ ၵူၼ်းၼုမ်ႇ ၵေႃႉ႞ ထုၵ်ႇမၢပ်ႇၼႄးဝႃႈ ပဵၼ်ၽူႈသိုဝ်ႇၶၢဝ်ႇ ၵၢမ်ႇပေႃႉၸတၢႆး ၼႆသေ ထုၵ်ႇသိုၵ်းမၢၼ်ႈတီႉၺွပ်း ဢဝ်လိူင်ႈၸွႆးတြႃးဝႆႉ လူၺ်ႈမတ်ႉတႃ 505 (က) ၼၼ်ႉ သိုၵ်းမၢၼ်ႈ ပၼ်တူတ်ႈတၢမ်ႇၶွၵ်ႈ ၼိုင်ႈၵေႃႉလႂ်သၢမ်ပီ။
မိူဝ်ႈၼႆႉ ဝၼ်းတီႈ 10/12/2021 ယူႇတီႈၶွင်ႇသီႇသိုၵ်းမၢၼ်ႈ ယိုတ်းမိူင်း တီႈၶွၵ်ႈတွင်ႇလေးလူင်း ၸႄႈဝဵင်းယွင်ႁူၺ်ႈ ၸႄႈတွၼ်ႈတူၼ်းတီး ၸိုင်ႈတႆးပွတ်းၸၢၼ်း ပိုၼ်ၽၢဝ်ႇပၼ်တူတ်ႈတၢမ်ႇ ၽူႈသိုဝ်ႇၶၢဝ်ႇ 3 ၵေႃႉလႄႈ ၵူၼ်းၼုမ်ႇ ၵေႃႉၼိုင်ႈၼၼ်ႉလူၺ်ႈတၢင်းၽိတ်း ႁဵတ်းႁႂ်ႈႁၼ်ၽိတ်းပိူင်ႈၼိူဝ်သိုၵ်းမၢၼ်ႈ။
ၵူဝ်ႇၸေႇတၢႆး ၽူႈၵုမ်းထတ်း ႁွင်ႈၵၢၼ်သိုဝ်ႇၶၢဝ်ႇၵၢမ်ႇပေႃးၸတၢႆး လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်ပၼ်တူတ်ႈတၢမ်ႇၵႂႃႇၼႆႉ ဢမ်ႇၶႂ်ႈ လၢတ်ႈသင်ယဝ်ႉ။ ယွၼ်ႉၼႂ်းၸိုင်ႈမိူင်းၼႆႉ ယၢမ်းလဵဝ်ပဵၼ်လွင်ႈဢမ်ႇတြႃးဝႆႉလႄႈ ၵေႃႉဢၼ်ဢမ်ႇၵဵဝ်ႇၵေႃႈ ၺႃးၺွပ်းပဵၼ်ယိူဝ်ႇ။ ထႅင်ႈလွင်ႈ ၼိုင်ႈတႄႉ လၢတ်ႈလႆႈဝႃႈသိုၵ်းမၢၼ်ႈ ယႃႉလႅဝ်ပႅတ်ႈ လွင်ႈလွတ်ႈလႅဝ်းထၢင်ႇႁၢင်ႈ ၶွင်ၽူႈသိုဝ်ႇၶၢဝ်ႇ ၸိုင်ႈမိူင်းလႄႈ ၼႂ်းမိူင်းတႆးယဝ်ႉ။ ယွၼ်ႉႁဵတ်းၵၢၼ်ၶၢဝ်ႇလႄႈ ၺႃးတူၵ်းၶွၵ်ႈ ၼႆၼႆႉ တေလႆႈဝႃႈသိုၵ်းမၢၼ်ႈပူၼ်ႉပႅၼ်မၢႆမီႈသိုဝ်ႇၶၢဝ်ႇၵူၺ်း”- ဝႃႈၼႆ။
ၽူႈသိုဝ်ႇၶၢဝ်ႇၵၢမ်ႇပေႃးၸတၢႆး 3 ၵေႃႉ ဢၼ်ထုၵ်ႇပၼ်တူတ်ႈတၢမ်ႇ တူၵ်းၶွၵ်ႈၼိုင်ႈၵေႃႉလႂ်သၢမ်ပီၼၼ်ႉပဵၼ် ၼၢင်းၼၢင်းတႆး (ႁွင်ႉ) ၼၢင်းၼူၺ်းၼူၺ်းလၢႆႇ ၸၼ်ႉၽူႈထတ်းလိၵ်ႈ၊ ၼၢင်းဝိၼ်းယီႇ ၸၼ်ႉၽူႈသိုဝ်ႇၶၢဝ်ႇ၊ ၵူဝ်ႇတိၼ်ႇဢွင်ႇၵျေႃႇ ၾၢႆႇပိုၼ်ၽႄႈ။ ၵူၼ်းၼုမ်ႇဢၼ်ထုၵ်ႇၼႄးဝႃႈပဵၼ်ၽူႈသိုဝ်ႇၶၢဝ်ႇၼႆသေထုၵ်ႇတီႉၼၼ်ႉသမ်ႉပဵၼ် ၸၢႆးသီႇတူႇ ၊ မၼ်းၸၢႆးဢမ်ႇၸႂ်ႈၽူႈသိုဝ်ႇၶၢဝ်ႇ၊ မၼ်းၸၢႆးပဵၼ်ၵူၼ်းမိူင်းၵူၺ်း ၼၼ်ႉၵေႃႈ ၺႃးတၢမ်ႇၶွၵ်ႇၸွမ်း သၢမ်ပီ ၼႆယဝ်ႉ။
ၵူၼ်း 4 ၵေႃႉၼႆႉ ၺႃးၶွင်ႇသီႇသိုၵ်းမၢၼ်ႈ ယိုတ်းမိူင်း တီႉၺွပ်း မိူဝ်ႈဝၼ်းတီႈ 24/3/2021 ယၢမ်းၵၢင်ၶမ်ႈ တီႈၸႄႈဝဵင်းႁူဝ်ပူင်း ၸိုင်ႈတႆးပွတ်း ၸၢၼ်း၊ သူင်ႇတူဝ်ၵႂႃႇတူၵ်းၶွၵ်ႈဝႆႉတီႈ တွင်ႇလေးလူင်း ၸႄႈဝဵင်းယွင်ႁူၺ်ႈ ၶၢဝ်းတၢင်း 8 လိူၼ် ။ မိူဝ်ႈၼႆႉ သိုၵ်းမၢၼ်ႈၸင်ႇတႅပ်းတတ်းႁင်းၶဝ်ဝႃႈ ပၼ်တူတ်ႈၶွၵ်ႈၶဝ်ၵေႃႉ 3 ပီ။
ၽွင်းသိုၵ်းမၢၼ်ႈယိုတ်းဢႃႇၼႃႇမႃး ၶၢဝ်းတၢင်း 10 လိူၼ်ပၢႆၼႆ့ ၽူႈသိုဝ်ႇၶၢဝ်ႇၼႂ်းမိူင်းတႆး ဢၼ်ၺႃးတီ့ၺွပ်း တင်းမူတ်းမီး 10 ၵေႃႉ။ ၼႂ်းၼၼ့် တိုၵ့်လွတ်ႈဢွၵ်ႇၶိုၼ်း 4 ၵေႃႉၵူၺ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ