မိူဝ်ႈၼႆႉ ဝၼ်းတီႈ 9/12/2021 ယၢမ်းၵၢင်ၼႂ် မွၵ်ႈ 2 မူင်းၶိုင်ႈ ၶွင်ႇသီႇသိုၵ်းမၢၼ်ႈ ယိုတ်းမိူင်း တင်း သိုၵ်းၶၢင် KIA ပဵၼ်ပၢင်တိုၵ်းၵၼ် တီႈႁိမ်း ဝၢၼ်ႈၼမ်ႉပႃၶီး ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ ၼႂ်းၵႄႈၵူတ်ႉၶၢႆ – သႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်သိုၵ်းၶၢင်တင်း သိုၵ်းမၢၼ်ႈ ယိုဝ်းၵၼ် တီႈတၢင်းၶဝ်ႈ ဝၢၼ်ႈၼမ်ႉပႃၶီး ႁိမ်းလွႆသၢမ်သိပ်းၼႆႉၶႃႈ။ ပၢင်တိုၵ်း တေပဵၼ်ႁိုင်မွၵ်ႈ 45 မိၼိတ်ႉၼႆႉၶႃႈ။ လွင်ႈလူႉတၢႆ မၢတ်ႇၸဵပ်းတင်းသွင်ၾၢႆႇတႄႉ ဢမ်ႇလႆႈ ႁူႉၶႃႈ။ ႁၼ်ၵႃးသိုၵ်းမၢၼ်ႈ လမ်းၼိုင်ႈတႄႉ လူႉၵွႆသေ ထိုင်တီႈပေႃးလႆႈတိုတ်ႉလၢၵ်ႈၵႂႃႇ တီႈၵူတ်ႉၶၢႆၶႃႈဢေႃႈ”- ဝႃႈၼႆ။

ပၢင်တိုၵ်း ဢၼ်ပဵၼ်တီႈႁိမ်းဝၢၼ်ႈၼမ်ႉပႃၶီးၼႆႉ ယူႇတီႈသိုၵ်းၶၢင် KIA ပႂ်ႉငွႆးယိုဝ်း ၵႃးသိုၵ်း မၢၼ်ႈဢၼ်ထႅမ်ႁႅင်းသိုၵ်း တေမုင်ႈၼႃႈၸူးတၢင်း မူႇၸေႊ မိူင်းၵူဝ်းၼၼ်ႉ ၵူၼ်းပိုၼ်ႉတီႈ သိုပ်ႇလၢတ်ႈ ၼႄၼင်ႇၼႆ။

ၼႂ်းၵႄႈၵူတ်ႉၶၢႆ – သႅၼ်ဝီၼႆႉ ယူႇတီႈၸုမ်းဢူၺ်းလီပွတ်းႁွင်ႇ မိူၼ်ၼင်ႇ သိုၵ်းၶၢင်၊ ၵဝ်ႈၵၢင်ႉလႄႈ တဢၢင်း ၸိူဝ်းၼႆႉ တူင်ႉၼိုင်ဝႆႉ ယဝ်ႉၵေႃႈ သိုၵ်း မၢၼ်ႈ တပ်ႉမ 99 ထႅင်ႈ ၼႆယဝ်ႉ။

မိူဝ်ႈဝၼ်းတီႈ 7/12/2021 ယၢမ်းၵၢင်ၶမ်ႈ မွၵ်ႈ 7 မူင်း မၢၵ်ႇတႅၵ်ႇတီႈၵဵတ်ႉ/လၢၼ်ႇ ပလိၵ်ႈမၢၼ်ႈ ပႂ်ႉၵဵပ်းၶွၼ်ႇ တီႈႁိမ်းဝၢၼ်ႈပၢင်ႇလေႃႉ (တၢင်း ၽႄ ၵုၼ်လူင်) ၸဝ်ႈၵႃးတၢင်ႇၵုၼ်ႇမၢတ်ႇၸဵပ်း 2 ၵေႃႉ။ ၵူၼ်းပႂ်ႉၵဵတ်ႉ မၢတ်ႇၸဵပ်းၵေႃႉၼိုင်ႈ။ ၼၼ်ႉၵေႃႈ ပဵၼ်သိုၵ်းၶႄႇၵဝ်ႈၵၢင်ႉ ဢဝ်မၢၵ်ႇပွႆႇသႂ်ႇ ၵူၼ်းပိုၼ်ႉတီႈလၢတ်ႈ။

မိူဝ်ႈဝၼ်းတီႈ 1/12/2021 ပူၼ်ႉမႃးၼၼ်ႉၵေႃႈ သိုၵ်းၶႄႇၵဝ်ႈၵၢင်ႉ MNDAA မႃးလူမ်ႇယိုဝ်း တီႈၶူဝ်ဢီႇၼၢႆး ၸႄႈဝဵင်းလႃႈသဵဝ်ႈ ဢၼ်သိုၵ်း မၢၼ်ႈပႂ်ႉဝႆႉၼၼ်ႉ ယွၼ်ႉဝႃႈ သိုၵ်းမၢၼ်ႈ ၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း ထုၵ်ႇလူမ်ႇယိုဝ်း ၵူၼ်းပိုၼ်ႉတီႈ ပွတ်းဢီႇၼၢႆးလၢတ်ႈ။