တႄႇဢဝ် ဝၼ်းတီႈ 8/12/2021 ၼႆႉမႃး ၵႃႈ Package Internet ဢၼ်ၸႂ်ႉတိုဝ်းၸွမ်း ၼႂ်း Sim Card ၾူၼ်း မိူၼ်ၼင်ႇ MPT, Mytel, Ooredoo လႄႈ Telenor ၸိူဝ်းၼႆႉ ပုင်ႈၶိုၼ်ႈ  တူပ်ႉၼႅပ်ႇ။

မိူဝ်ႈၵူႈပွၵ်ႈ ၵႃႈၼႅတ်ႇ(ဢိၼ်ႊထိူဝ်ႊၼႅတ်ႉ) 1 MB ၼႆ လႆႈပၼ်ငိုၼ်း 500 ပျႃး ယၢမ်းလဵဝ် ၶိုၼ်ႈပဵၼ် 1,000 ပျႃး။ ၵူႈပွၵ်ႈ ၵႃႇၼႅတ်ႇ 1 GB ၼႆ 1,000 ပျႃး ယၢမ်းလဵဝ် ၶိုၼ်ႈပဵၼ် 2,000 ပျႃး။ တႃႇၶဝ်ႈတူၺ်းၶၢဝ်ႇ ႁႃတၢင်းႁူႉ လဵပ်ႈႁဵၼ်း တၢင်းဢွၼ်ႊလၢႆႊ ႁူပ်ႉတၢင်းယၢပ်ႇၵူႈလွင်ႈယဝ်ႉၼႆ ၵူၼ်းၼုမ်ႇတႆး ၵေႃႉၼိုင်ႈလၢတ်ႈၼင်ႇၼႆ။

ၵူၼ်းၼုမ်ႇ ၽူႈတူင်ႉၼိုင် ၼႂ်းတူင်ႇဝူင်းတႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တႃႇၵပ်းသိုပ်ႇၵၼ်လႆႈတၢင်းၼိူဝ် ဢွၼ်ႊလၢႆႊၵေႃႈတေယၢပ်ႇယဝ်ႉဢေႃႈပေႃးဢမ်ႇမီးငိုၼ်း။ ပဵၼ်ၵၢၼ် တင်ႈၸႂ်ပိၵ်ႉႁူ/ ပိၵ်ႉတႃ ၵူၼ်းမိူင်းၵူၺ်းၶႃႈယူဝ်ႉ။ ၶဝ်တႄႉ တေလႆႈငိုၼ်းၶဝ်ႈၼမ်ၼၼ်ႉၼႃႇ”- ဝႃႈၼႆ။

လွင်ႈတေၶိုၼ်ႈၵႃႈ ဢိၼ်ႊထိူဝ်ႊၼႅတ်ႉၼၼ်ႉ ၶွမ်ႊပၼီႊ Sim Card ၵူႈဢၼ်ဢၼ် သူင်ႇလိၵ်ႈၸူး ၽူႈၸႂ်ႉ မိုဝ်းထိုဝ် ၵူႈၶိူင်ႈ – “ပေႃးတေၸႂ်ႉၼႅတ်ႇ 524 MB ၼႆႉ တေလႆႈၸၢႆႇငိုၼ်း 1,000 ပျႃး”။

ဢၼ်ၸုမ်းသိုၵ်းမၢၼ်ႈ ၶိုၼ်ႈၵႃႈ ဢိၼ်ႊထိူဝ်ႊၼႅတ်ႉ ၼႆႉ တုမ်ႉတိူဝ်ႉပႃး ၵူၼ်းၼုမ်ႇ ၸိူဝ်းႁဵတ်းၵၢၼ် သိုဝ်ႉၶၢႆၶူဝ်း ၼိူဝ်ဢွၼ်ႊလၢႆႊ တေပွႆႇလၢႆႉၾ် Live ၶၢႆၶူဝ်းၵေႃႈ ႁူပ်ႉတၢင်းယၢပ်ႇမႃး။

ၵူၼ်းၼုမ်ႇ ၶၢႆၶူဝ်းၼိူဝ်ဢွၼ်ႊလၢႆႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၵမ်ႈၼမ် ၵၢၼ်ၶၢႆၶူဝ်းၼိူဝ်ဢွၼ်ႊလၢႆႊၼႆႉ တေဢမ်ႇမီးၼမ်ႉတွၼ်း ၼမ်ႉမျၢတ်ႈ ၶႃႈယဝ်ႉ သင်ဝႃႈ ၵႃႈ Internet ၶိုၼ်ႈၸိူင်ႉ။ သိုဝ်ႉၶၢႆသင်ၵေႃႈၵိၼ်းၸႂ်မႃးတိၵ်းတိၵ်း ယဝ်ႉၶႃႈ”- ဝႃႈၼႆ။

ယၢမ်းလဵဝ် ၵႃႈဢိၼ်ထိူဝ်ႊၼႅတ်ႉမိူင်းမၢၼ်ႈ တီႈဢေႇသုတ်း ပေႃးသိုဝ်ႉ 420 MB တေလႆႈၸၢႆႇငိုၼ်း 799 K ၊ ပေႃးသိုဝ်ႉ 500MB လႆႈၸၢႆႇ 949 K ၊ 525 MB သမ်ႉ  999K (ၼိုင်ႈႁဵင်ယွမ်းပျႃး) ။ လိူၼ်ၼၼ်ႉ ပေႃးသိုဝ်ႉ1585 MB လႆႈၸၢႆႈ 2999 ပျႃး(ၵျၢတ်ႉ) ၊ 3170 MB လႆႈၸၢႆႇငိုၼ်း 5999 K ၊ ၽႅၵ်ႉၶဵတ်ႉ Package 5290 MB သမ်ႉလႆႈၸၢႆႇငိုၼ်း 9999 K (ၼိုင်ႈမိုၼ်ႇ ယွမ်းပျႃး႞) ။